ކޯޓަށް ގެންދިއުން ލަސްވުުމުން ކްރިކެޓް ކޯޗް ދޫކޮށްލައިިފި

ގައުމީ ކްރިކެޓް ޓީމްގެ ކޯޗް އާސިފް ހާން ޖިންސީ ފުރައްސާރަކުރިކަމުގެ ތުހުމަތަށް އިއްޔެ ހައްޔަރު ކުރުމަށް ފަހު ބަންދުގެ މުއްދަތު ޖަހަން މިއަދު ކްރިމިނަލް ކޯޓަށް ގެންދިޔަ އިރު އޭނާ ބަންދުގައި ހުންނަތާ 24 ގަޑި އިރު ވެފައި ވާތީ ދޫކޮށްލައިފި އެވެ.

ފުލުހުން މިރޭ ބުނީ ސައުތު އެފްރިކާގެ އުމުރުން 46 އަހަރުގެ ފިރިހެން މީހާ ( ކޯޗް އާސިފް ހާން) މުއްދަތު ޖަހަަން މިއަދު މެންދުރު ކޯޓަށް ހާޒިރު ކުރި އިރު އޭނާ ހައްޔަރުކުރިތާ 24 ގަޑި އިރު ވެފައި ވާތީ އޭނާ ބަންދުން ދޫކޮށްލަން ކްރިމިނަލް ކޯޓުން އަމުރުކޮށްްފައިވާ ކަމަށެވެ. އެކަމަކު އޭނާގެ ޕާސްޕޯޓް ހިފަހައްޓައި ރާއްޖޭން ފުރުން 30 ދުވަހަށް މަނާކޮށްފައި ވާތީ އޭނާ ހުރީ ރާއްޖޭގައި ކަމަށް ވެސް ބުންޏެވެ.

ކޯޓަށް ގެންދިއުން ލަސްވުމުގެ ސަބަބުން އޭނާ ދޫވި މައްސަލަ އިދާރީ ގޮތުން ބަލަމުން އަންނަ ކަމަށާއި އެކަން ތަކުރާރުވިޔަ ނުދިނުމަށް ކުރަން ޖެހޭ ކަންތައްތައް ކުރަމުން އަންނަ ކަަމަށް ފުލުހުންގެ މީޑިއާ އޮފިޝަލް ވިދާޅުވި އެވެ.

ފުލުހުން ބުނެފައިވާ ގޮތުގައި ސައުތު އެފްރިކާ މީހާ ހައްޔަރު ކުރީ ކުޑަކުދިންގެ އިތުރުން ބޮޑެތި މީހުންނަށް ވެސް ޖިންސީ ގޯނާ ކުރިކަމުގެ ތުހުމަތަށެވެ.

އާސިފް ޚާން ގައުމީ ކްރިކެޓް ޓީމުގެ ކޯޗުކަން ކުރަމުން އަންނަނީ މިދިޔަ އަހަރުން ފެށިގެންނެވެ. އޭނާގެ ކޯޗު ކަމުގައި ރާއްޖޭން ވަނީ މެލޭޝިއާގައި ޖޫން މަހު އޮތް ބައިނަލްއަގްވާމީ ޓްރި-ނޭޝަންސް ޓީޓްވެންޓީ މުބާރާތުން ދެ ވަނަ ހޯދައިފަ އެވެ.

މީގެ އިތުރުން އިންޑިއާގެ ކުރީގެ ތަރި ޔުވްރާޖް ސިންގް ހިމެނޭ އެއާ އިންޑިއާ ޓީމާ ދެކޮޅަށް ފެބްރުއަރީ މަހު ރާއްޖޭން ކުޅުނު އެކުވެރިކަމުގެ މެޗުގައި ވެސް އިރުޝާދު ދިނީ އޭނާ އެވެ. ގައުމީ ކޯޗުކަމުގެ އިތުރުން ބައެއް މެޗުތަކުގައި އޭނާ އަމްޕަޔަރުކަން ވެސް ކުރެ އެވެ.