އައްޑޫގެ ދެ އަވަށެއްގެ ގިރާ ސަރަހައްދުގެ ކޮންސަލްޓެންސީ އަށް ބަޔަކު ހޯދަނީ

އައްޑޫ ހިތަދު އާއި މީދޫގެ ގިރާ ސަރަހައްދު ހިމާޔަތްކުރުމަށް ހިންގާ މަޝްރޫއަށް ކޮންސަލްޓެންސީ ދޭން ޝައުގުވެރިވާ ފަރާތްތަކަށް އެކްސްޕްރެސް އޮފް އިންޓަރެސްޓް (އީއޯއީ) ހުށަހެޅުމުގެ ފުރުސަތު ޕްލޭނިން މިނިސްޓްރީން މިއަދު ހުޅުވާލައިފި އެވެ.

އެ މިނިސްޓްރީން ބުނީ ސަރުކާރުން ހަރަދުކޮށްގެން ހިންގާ ޕްރޮޖެކްޓަށް ކޮންސަލްޓަންސީ ދޭން ޝައުގުވެރިވާ ފަރާތްތަކަށް އެކަމަށް ކުރިމަތިލުމުގެ ފުރުސަތު މި މަހުގެ 27 ވަނަ ދުވަހާ ހަމައަށް ހުޅުވާލާފައިވާ ކަމަށެވެ. މި މަސައްކަތާ ގުޅޭ މައުލޫމާތު މިނިސްޓްރީގެ ވެބްސައިޓުން ވެސް މިހާރު ލިބެން ހުންނާނެ ކަމަށް ޕްލޭނިން މިނިސްޓްރީން ބުންޏެވެ.

މަސައްކަތްތަކުގެ ތެރޭގައި މީދު އާއި ހިތަދޫގެ ގިރާ ސަރަހައްދުތައް މަސައްކަތްކުރުމަށް ބޭނުންވާ މިހާރުގެ އެންވަޔަރަމަންޓްގެ ލިޓަރޭޗަ ރިވިއު އާއި އެންވަޔަރަމަންޓަލް ބެތިމެޓްރިކަލް އާއި ހައިޑްރޮލޮޖިކަލް ސާވޭ އާއި މަސައްކަތާ ގުޅޭ ޑޭޓާ ނެގުމާއި ފީސިބިލިޓީ ސްޓަޑީ ހެދުމާއި ކޮންސެޕްޓް އިންޖިނިއަރިން ޑިޒައިނާއި ޑިޒައިން ރިޕޯޓާއި ކުރެހުން ސެޓާއި ބިލް އޮފް ކުއަންޓިޓީޒާއި ސްޕެސިފިކޭޝަނާއި އީއައިއޭ ހެދުން ވެސް ހިމެނެ އެވެ.

ޕްލޭނިން މިނިސްޓްރީން ބުނިގޮތުގައި މި މަސައްކަތަށް ޕްރޮޕޯސަލް ހުށަހެޅުމުގެ ފުރުސަތުދޭނީ ކުރިމަތިލާ ފަރާތްތަކުގެ ތެރެއިން އެންމެ ރަނގަޅު ކަމަށް ފާހަގަކުރެވޭ ފަރާތްތައް ޝޯޓްލިސްޓްކުރުމަށް ފަހު އެވެ.

ހިތަދު އާއި މީދޫގެ ގިރާ ސަރަހައްދު ހިމާޔަތްކުރަން މަސައްކަތްތަކެއް ފަށަން ތައްޔާރުވަމުން އަންނަ އިރު، މި ދެ އަވަށަށް ގިރުމުގެ މައްސަލަ ވަރަށް ބޮޑަށް ދިމާވެފައިވެ އެވެ. ވަކިން ހާއްސަކޮށް ހިތަދު އަށް ދިމާވެފައިވާ މައްސަލަ ބޮޑެވެ.