ރީއްޗަށް ވާހަކަ ދެއްކުމުން ކޮފީން ޑިސްކައުންޓް

މިއީ ރާއްޖެއަށް ވެސް ރަނގަޅު ކަމަކަށް ވެދާނެ އެވެ. ބައެއް ކޮފީޝޮޕްތަކަށް ޖަމާވާ މީހުންގެ ފަރާތުން ހުތުރު ބަސްތައް އިވުމަކީ އާންމު ކަމެކެވެ. މިކަމަށް ހައްލެއް ހޯދުމަށް ސްޕެއިންގެ ކެފޭ އަކުން ގަވައިދެއް ހަދައިފި އެވެ. ކަކޮފީ އާއި ޕޭސްޓްރީޒް އަށް އޯޑަރު ދޭއިރު ހުތުރުކޮށް ވާހަކަ ދައްކާ ނަމަ އިތުރު ޗާޖެއް ނަގަނީ އެވެ. އަގު ހެޔޮކޮށް ބޭނުން ނަމަ ރީއްޗަށް މުއާމަލާތްކުރަންވީ އެވެ.

ބްލާއު ގްރިފޫ ކެފޭއިން، ހުތުރުކޮށް މުޚާތަބުކުރާ ކަސްޓަމަރުންނަށް ކޮފީއެއް ވިއްކަނީ ފަސް ޕައުންޑަށެވެ. ނަމަވެސް ރީތިކޮށް އިހްތިރާމާ އެކު ވާހަކަ ދައްކާ ކަސްޓަމަރުންނަށް ހަ ޑޮލަރަށެވެ.

އެއްޗެހި ވިއްކަން ހުންނަ މީހާ އަށް ސަލާން ގޮވާލައި "ޕްލީޒް"އޭ ބުނެ އިހްތިރާމާ އެކު ވާހަކަ ދައްކައިފި ނަމަ އެއް ޑޮލަރަކަށް ވެސް ކޮފީއެއް ލިބިދާނެ އެވެ.

މި ރެސްޓޯރަންޓްގެ ވެރިމީހާ މާރިސެލް ވެލެންސިއާ މެޑްރިޑް ބުނެފައިވާ ގޮތުގައި މި ސްކީމްގެ އެދެވޭ ނަތީޖާތައް އަންނަނީ ފެންނަމުންނެވެ.

"މިޒަމާނުގައި އެންމެން ވެސް އުޅެނީ ވަރަށް އަވަސް އަރުވާލައިގެން. އެހެންވެ އެއްޗަކަށް އޯޑަރު ދޭ ވަގުތު "ޕްލީޒް" ކަހަލަ ބަހެއް ބޭނުންކުރާކަށް ގިނަ ފަހަރަށް ހަނދާނެއް ނުހުރޭ،" ރެސްޓޯރަންޓްގެ ވެރިމީހާ ޓައިމްސް އާ ވާހަކަ ދައްކަމުން ބުނެފައިވެ އެވެ.

ކޮލަމްބިއާ އަށް އުފަން 41 އަހަރުގެ މި މީހާ ބުނީ އޭނާގެ އަމިއްލަ ގައުމުގެ މީހުންނަށް ވުރެ ސްޕެއިންގެ މީހުންގެ "ޕްލީޒް" އަދި "ތޭންކް ޔޫ" ފަދަ ބަސްތައް ބުނުމުގެ އާދަ ނުހުންނަ ކަމަށާއި އެ މަންޒަރު ފެނުނީމާ އޭނާއަށް ވަރަށް އަޖައިބު ކަމަށެވެ. އެ މީހާ ބުނާ ގޮތުގައި އޭނާގެ ގައުމުގެ މީހުންނަކީ އުޅުމާއި ބަސްމަގު ތަންކޮޅެއް ރަނގަޅު ބައެކެވެ.

މި ޚިޔާލަކީ ފްރާންސްގެ ޕެރިސްގެ ރެސްޓޯރަންޓަކުން ފުރަތަމަ އުފަންކުރި ޚިޔާލެކެވެ. އެތަނަށް ދާ ކަސްޓަމަރުންގެ އަދަބު އިހްތިރާމަށް ބަލާފައި ޑިސްކައުންޓް ދެ އެވެ.