ބަޖެޓު ހުށަހެޅުމުގެ ޖަލްސާ މާދާމާ ބާއްވަނީ

އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހެޅުން ރައްޔިތުންގެ މަޖިލިހުގެ މާދަމާގެ ޖަލްސާ އަށް އެޖެންޑާކޮށްފި އެވެ.

މިއީ ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގެންނެވި ފަހުން، މަޖިލިހަށް ހުށަހަޅާ ދެ ވަނަ ބަޖެޓެވެ. އެކަމަކު މިއީ ފިނޭންސް މިނިސްޓަރު އިބްރާހިމް އަމީރު ހުށަހަޅުއްވައިދެއްވާ ފުރަތަމަ ބަޖެޓެެވެ.

ފިނޭންސް މިނިސްޓްރީން މިދިޔަ ޖުލައި މަހުގެ މަޖިލީހަށް ފޮނުވާފައިވާ ފިސްކަލް ސްޓްރެޓެޖީގައިވާ ގޮތުން އަންނަ އަހަރަށް ލަފާކުރާ ބަޖެޓުގެ އަދަދަކީ 39.6 ބިލިއަން ރުފިޔާ އެވެ.

މި އަހަރަށް ދައުލަތުން ހުށަހެޅީ 29.2 ބިލިއަން ރުފިޔާގެ ބަޖެޓެކެވެ. އެކަމަކު، މަޖިލިހުން ގެނައި އިސްލާހުތަކާ އެކު އެ އަދަދު 30.2 ބިލިއަން ރުފިޔާ އަށް އެރި އެވެ. ސަޕްލިމެންޓްރީ ބަޖެޓުގެ ގޮތުގައި މަފާސްކުރި 1.7 ބިލިއަން ރުފިޔާއާ އެކު ޖުމްލަ ބަޖެޓުގެ އަދަދު 30.9 ބިލިއަން ރުފިޔާ އަށް އަރަ އެވެ.

ގާނޫނުއަސާސީގައިވާ ގޮތުން ކޮންމެ އަހަރެއް ފެށުމުގެ ކުރިން އެ އަހަރަކަށް ދައުލަތުން ހިނގާނެ ކަމަށް ލަފާ ކުރެވޭ ހަރަދާއި ދައުލަތަށް ލިބޭނެ ކަމަށް ލަފާކުރާ އާމްދަނީގެ ހިސާބު ހިމެނޭ ބަޖެޓެއް ހުށަހަޅަންވާނެ އެވެ. މާލިއްޔަތު ގާނޫނު ބުނާ ގޮތުން އޮކްޓޯބަރުގެ ނިޔަލަށް މަޖިލީހަށް ބަޖެޓު ހުށަހަޅަން ޖެހެ އެވެ.

މަޖިލިހުގެ މި ދައުރުގައި މައިގަނޑު ކަމެއްގެ ގޮތުގައި އޮންނާނެ ކަމަށް ބެލެވެނީ ބަޖެޓު ދިރާސާ ކުރުމުގެ މަސައްކަތް އެކަންޏެވެ. އެއީ މި މަސް ނިމުމާއެކު، މެމްބަރުން ޗުއްޓީ އަށް ވަޑައިގަންނަވާނެތީ އޭގެ ކުރިން ބަޖެޓާ މެދު ރައްޔިތުންގެ މަޖިލީހުން ގޮތެއް ނިންމަން ޖެހޭނެތީ އެވެ.