ނޫމަޑިން 92 މިލިއަން ރުފިޔާ ދައުލަތަށް ދިންތޯ ސުވާލު އުފައްދައިފި

ސެޓްލްމަންޓް އެގްރީމެންޓެއް ހަދައި ދައުލަތުން 55 މިލިއަން ޑޮލަރު (849،750،000ރ.) ދީފައިވާ ނޫމަޑިން ދައުލަތަށް ދައްކަން ޖެހިފައި އޮތް 92 މިލިއަން ރުފިޔާ އަށް ވީ ގޮތަކާ މެދު ފެލިދޫ ދާއިރާގެ ޕީއެންސީގެ މެމްބަރު ފަޒުލް ރަޝީދު އިއްޔެ ސުވާލު އުފައްދަވައިފި އެވެ.

ނޫމަޑި އަށް ދައުލަތުން ބޮޑު ބަދަލެއް ދިނީ، ރަށްރަށުގައި ހައުސިން ޔުނިޓްތަކެއް އަޅަން ހަވާލުކުރި އެއްބަސްވުން ކުރީގެ ރައީސް އަބްދުﷲ ޔާމީންގެ ސަރުކާރުން އުވާލުމުގެ ބަދަލެއްގެ ގޮތުންނެވެ. ނޫމަޑިން އާބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) އަދި އާބިޓްރޭޝަނާ ގުޅޭ އެހެން ޚަރަދުތައް ހޯދުމަށެވެ. އެކަމަކު މައްސަލަ ހިނގަނިކޮށް މި ސަރުކާރާ އެކު ނޫމަޑިން އެއްބަސްވީ ބަދަލުގެ ގޮތުގައި 55 މިލިއަން ޑޮލަރަށެވެ.

މި މައްސަލައިގައި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީ އަށް އިއްޔެ ހާޒިރުކޮށްފަ އެވެ. އޭނާ އަށް ތުހުމަތު ކުރަނީ، އާބިޓްރޭޝަންގައި ދައުލަތާ ދެކޮޅަށް ބަޔާން ދެއްވި ކަމަށެވެ. އެއީ، އާބިޓްރޭޝަނުން ނިމުނު ނަމަ، ދައުލަތުން 55 މިލިއަނަށް ވުރެ ބޮޑު ބަދަލެއް ދައްކަން ޖެހިދާނެ ކަމެއް ކަމަށް ބުނެ މުއިއްޒަށް ވަނީ ފާޑުކިއުން ވެސް އަމާޒުވެފަ އެވެ.

މި ތުހުމަތުން މުއިއްޒު ދިފާއު ކުރައްވައި، އެ ބަދަލަކީ ރޭވުމެއްގެ ތެރެއިން މި ސަރުކާރުން ހިންގާފައި އޮތް ކަމެއް ކަމަށް ކޮމިޓީގައި ވާހަކަ ދެއްކެވި ފަޒުލް ވަނީ، ނޫމަޑިން ދައުލަތަށް ދައްކަން ޖެހޭ ފައިސާ އަށް ވީ ގޮތާ މެދު ސުވާލު އުފައްދަވައިފަ އެވެ. ސިފައިންނާއި ފުލުހުންގެ ފްލެޓްތައް އަޅަން ނޫމަޑިއާ ހަވާލުކޮށް، އެ މަސައްކަތް ލަސްވެ، އެއްބަސްވުން ބާތިލްކުރި އިރު ނޫމަޑިން އޮތީ ދައުލަތަށް ފައިސާ ދައްކަން ޖެހިފަ އެވެ.

އެންޓި ކޮރަޕްޝަން ކޮމިޝަން (އޭސީސީ) އާއި އޮޑިޓް އޮފީުގެ ރިޕޯޓްތަކުގައި ބުނެފައިވާ ގޮތުގައި، ނޫމަޑިން ދައްކަން އޮތް އަދަދަކީ 92 މިލިއަން ރުފިޔާ އެވެ. މި ފައިސާ ވެސް ސެޓްލްމަންޓް އެގްރީމެންޓް ތެރޭގައި ހިމަނައިގެން މާފްކޮށްދީފައި އޮތުން އެކަށީގެންވާ ކަމަށް ވިދާޅުވެ ފަޒުލް ވަނީ ތުހުމަތު ކުރައްވައިފަ އެވެ.

"ސެޓްލްމަންޓް ކޮމިޓީން ދީލާލީ ނޫމަޑިކޮޅަށް. ސިޔާސީ ގޮތުން ކުލަ ޖައްސަން އުޅޭ މައްސަލައެއްގައި މަންޒަރު އަޅުގަނޑުމެންނަށް ވަރަށް ސާފު. ސިޔާސީ ގޮތުން ވަކި ބޭފުޅަކަށް މައްސަލަ ފަރުމާކުރުމަށްޓަކައި ކުރެވޭ މަސައްކަތް ވެސް ސާފު،" މުއިއްޒު ދިފާއު ކުރައްވައި ފަޒުލް ވިދާޅުވި އެވެ.

އޭނާ ވިދާޅުވި ގޮތުގައި، ނޫމަޑީގެ ކަންކަމުގެ ހަގީގަތް މުޅިން ސާފުވާނީ، ސެޓްލްމަންޓް އެއްބަސްވުން މެމްބަރުންނަށް ލިބިގެންނެވެ. އެ އެއްބަސްވުން މެމްބަރުންނާ ހިއްސާނުކޮށް، ކޮމިޓީ ކުރިއަށް ގެންދާތީ ފަޒުލް ކަންބޮޑުވުންފާޅު ކުރެއްވި އެވެ.

"ސިފްކޯގެ 10 މިލިއަން ޑޮލަރާއި ޕޮލްކޯގެ ފައިސާ ވެސް މި އެގްރީމެންޓްގެ ދަށުން ދީލާލައި މާފުކޮށްދޭ ކަންތައް ވެސް އެބައުޅޭ،" ކޮމިޓީ ބާއްވާ އިރު މައުލޫމާތު ސާފު ނޫން ކަމަށް ވިދާޅުވެ ފަޒުލް ޝަކުވާ ކުރެއްވި އެވެ.

ހައުސިން މިނިސްޓްރީގައި ކުރިން މަސައްކަތް ކުރެއްވި ބޭފުޅަކު ނޫމަޑީގައި މިހާރު މަސައްކަތް ކުރުމާއި ނޫމަޑީގެ ލޯޔަރެއްގެ ގޮތުގައި އުޅުނު ބޭފުޅަކު ރައީސް އޮފީހުގައި މަސައްކަތް ކުރާ ކަމުގެ ތުހުމަތާ އެކު ވެސް ފަޒުލް ވަނީ ކަންބޮޑުވުން ފާޅުކުރައްވައިފަ އެވެ.

ސެޓްލްމަންޓް އެގްރީމަންޓްތައް ކޮމިޓީ އަށް ގެންނަން ހުށަހަޅައި މެމްބަރުން ފާސްކޮށްފި ނަމަ އެ މައުލޫމާތަށް އެދިވަޑައިގަންނަވާނެ ކަމުގެ ޔަގީން ކަން ކޮމިޓީގެ މެމްބަރު މުހައްމަދު ނާޝިޒް އިއްޔެ ވަނީ ދެއްވައިފަ އެވެ. އެއްވެސް ކަމެއް މެމްބަރުންނަށް ފޮރުވައި، ސިއްރުކޮށްގެން ކޮމިޓީން ކުރަން ބޭނުން ނުވާ ކަމުގެ ޔަގީންކަން ވެސް އޭނާ ދެއްވި އެވެ.

ބަދަލު ދިނީ ނޫމަޑިން ފައިސާ ނުދައްކައި އޮއްވައި!

ނޫމަޑިން ދައުލަތަށް ދައްކަން ޖެހިފައި އޮތް ފައިސާއާ ގުޅޭ ގޮތުން ސަރުކާރުގެ ކަމާބެހޭ އިދާރާތަކުން އެއްވެސް ވާހަކައެއް ނުދައްކަ އެވެ. ސެޓްލްމަންޓަކަށް ދާން ޖެހުނު ސަބަބާ ގުޅޭ ގޮތުން، ތަފްސީލްކޮށް ހައުސިން މިނިސްޓްރީން ނެރުނު ބަޔާނުގައި ވެސް ނޫމަޑިން ދައުލަތަށް ދޭން ޖެހުނު ފައިސާ ބަދަލުގެ ތެރޭގައި ހިމެނި ކަމެއް ނުވަތަ ނޫން ކަމެއް ސާފުކޮށެއް ނުދެ އެވެ.

މިނިސްޓްރީތަކުން ބުނާގޮތުގައި، ސެޓްލްމަންޓްތަކާ ގުޅޭ ގޮތުން ވާހަކަ ދައްކާނީ ރައީސް އޮފީހުގައި އޮންނަ ކޮމިޓީންނެވެ.

ސެޓްލްމަންޓް ކޮމިޓީން އަމަލުކުރާނެ ގޮތުގެ އުސޫލެއް އެކުލަވާލައި ވަރަށް ފަހުން އަމަލުކުރަން ފަށާފައިވާ އިރު އެ ކޮމެޓީއަށް ހުށަހެޅޭ މައްސަލަތަކާއި އޭގެ ހުރިހާ ލިޔުންތަކަކީ އެ އުސޫލު އޮތްގޮތުން ސިއްރު އެއްޗެއްސެވެ. އެއިިން އެއްވެސް މައުލޫމާތެއް ކޮމެޓީގެ އެއްވެސް މެމްބަރަކު ހާމަ ކޮށްގެން ނުވާނެ ކަމަށާއި އަދި މީޑިއާ އަށް މައުލޫމާތު ހާމަ ކުރާނީ ވެސް ކޮމެޓީން ގޮތެއް ނިންމުމަށް ފަހު ކަމަށް އެ އުސޫލުގައިވެ އެވެ.

އިތުބާރު ހިފޭ ބޭފުޅަކު ނަން ހާމަނުކުރަން އެދިވަަޑައިގެން "މިހާރު" އަށް ވިދާޅުވީ ނޫމަޑި އަށް ބަދަލުދިން އިރު އެ ކުންފުނިން ދައުލަތަށް ދައްކަން ޖެހޭ 92 މިލިއަން ރުފިޔާ ނުދައްކާ ކަމަށެވެ. މި މައްސަލަ ޝަރީއަަށް ހުށަހެޅުމާ މެދު ޔާމީންގެ ސަރުކާރުން ވަނީ އެޓާނީ ޖެނެރަލްއާ އެކު ވެސް މަޝްވަރާކޮށްފައި ކަމަށް އޭނާ ވިދާޅުވި އެވެ.

92 މިލިއަން ރުފިޔާ އަކީ ނޫމަޑި އަށް އިތުރަށް ދިން ފައިސާ!

ސިފައިންގެ ބޯހިޔާވަހިކަމުގެ މަޝްރޫއު ވެސް ހަވާލުކުރި ނޫމަޑި އަށް، އެ މަޝްރޫއުގައި ނުކުރާ މަސައްކަތްތަކަކަށް ފައިސާ ދީފައިވާ އޮތް ކަން ފަޅާއެރީ، އޮޑިޓަ ޖެނެރަލް ނެރުއްވި އޮޑިޓް ރިޕޯޓުންނެވެ.

އޮޑިިޓުން އޮފީހުން އާއްމު ކުރި، ޑިފެންސް މިިނިސްޓްރީގެ 2015 އަހަރުގެ އޮޑިޓް ރިޕޯޓުގައި ބުނެފައިވާ ގޮތުގައި ސިފްކޯހިޔާގެ މަސައްކަތް ކުރި ނޫމަޑި އަށް ފްލެޓްގެ މަސައްކަތް ނުނިމެނީސް ޑިފެންސް މިނިސްޓްރީން ވަނީ 125 މިލިޔަނަށް ވުރެ ގިނަ ރުފިޔާ ދީފަ އެވެ.

ނޫމަޑީގެ އެއްބަސްވުން ބާތިލް ކުރުމާ ހަަމައަށް އެ ކުންފުނިން ކުރި މަސައްކަތުގެ އަގަކީ 33 މިލިޔަން ރުފިޔާ އެވެ. ބާކީ ފައިސާގެ ގޮތުގައި 92 މިލިޔަން ރުފިޔާ އެ ކުންފުނިން ޑިފެންސް މިނިސްޓްރީ އަށް ދައްކަން ޖެހޭ ކަމަށް ރިޕޯޓުގައިވެ އެވެ. އެ ފައިސާ އަނބުރާ ދައްކަން ނޫމަޑި ރިސޯޓްސް އިން އެއްބަސްވެފައިވީ ނަމަވެސް ފައިސާ ދެއްކުމަށް އެ ކުންފުނިން ދިން ދެ ޗެކު ވެސް ބައުންސްވެފައިވާ ކަަމަށް ރިޕޯޓުގައި ބުނެފައި ވެ އެވެ. މި ފައިސާ ހޯދަން އޭސީސީން ވެސް ވަނީ ސިފްކޯ އަށް އަންގައިފަ އެވެ.

އޭސީސީން ކުރިން އާއްމުކުރި ބަޔާނެއްގައި ބުނެފައި ވަނީ އެ މަޝްރޫއާ ހަވާލުވި ކުންފުންޏަށް ސިފްކޯ އިން 125 މިލިއަން ރުފިޔާ ދީފައިވާ ކަމަށާއި އެކަމަކު އެ މަޝްރޫއު އެކަށީގެންވާ ގޮތެއްގެ ކުރިއަށް ނުދާތީ 2016 ވަނަ އަހަރުގެ ޖެނުއަރީގައި އެއްބަސްވުން ބާތިލް ކޮށްފައިވާ ކަމަށެވެ. އަދި އެއްބަސްވުން ބާތިލްކުރުމާ ހަމައަށް އެ ކުންފުނިން ކޮށްފައިވާ މަސައްކަތްތަކަށް 33 މިލިއަން ރުފިޔާ އުނި ކުރުމަށް ފަހު ބާކީވާ 92 މިލިއަން ރުފިޔާ އަނބުރާ ދެއްކުމުގެ ގޮތުން އެ ކުންފުނިން ސިފްކޯ އަށް ތިން ޗެކެއް ހުށަހެޅި ކަމަށާއި އެކަމަކު ފައިސާ ނެތުމުން އެ ޗެކްތައް ބައުންސްވެފައިވާ ކަމަށް އެ ބަޔާނުގައިވެ އެވެ.

"އެ ފައިސާ ހޯދުމަށްޓަކައި ދިވެހިސަރުކާރުގެ އެއްވެސް ޕްރޮޖެކްޓަކާ ގުޅިގެން އެ ކުންފުންޏަށް ދޭން ޖެހޭ ފައިސާއެއް އޮތް ނަމަ، 92،570،639ރ. އުނި ކުރުމަށް ފަހު އެ ކުންފުންޏަށް ފައިސާ ދޫކުރަން މިނިސްޓްރީ އޮފް ފިނޭންސަށް ވަނީ އެންގިފަ އެވެ،" ތަހުގީގަށް ފަހު އޭސީސީން ނެރުނު ރިޕޯޓުގައިވެ އެވެ.

ސަރުކާރުން އެ ކުންފުންޏަށް ދައްކަން ޖެހޭ ފައިސާއެއް ނުވާ ނަމަ އެ މައްސަލަ ޝަރީއަތަށް ހުށަހަޅަން ވެސް އޭސީސީން އޮތީ ސިފްކޯ އަށް އަންގައިފަ އެވެ.