ހުޅުމާލެ ހޮސްޕިޓަލުގައި ކަށީގެ އޮޕަރޭޝަން ކުރަން ފަށައިފި

ހުޅުމާލެ ހޮސްޕިޓަލުގައި ކަށީގެ އޮޕަރޭޝަން ކުރަން ފަށައިފި އެވެ.

އެ ހޮސްޕިޓަލް ހިންގާ އާސަންދަ ކުންފުނީގެ ޑެޕިއުޓީ ސީއީއޯ މާރިޔާ ސައީދު "މިހާރު" އަށް މިއަދު ވިދާޅުވީ އައިޖީއެމްއެޗާ ގުޅިގެން މިދިޔަ ހަފުތާގެެ ބުރާސްފަތި ދުވަހު އޮޕަރޭޝަން ފަށާފައިވާ ކަމަށެވެ. އަދި ކޮންމެ ހަފުތާއަކު، ސަރުކާރުގެ މައި ހޮސްޕިޓަލުގެ ކަށީގެ ޑޮކްޓަރުން ވެސް ހުޅުމާލެ ހޮސްޕިޓަލުުގައި އޯޕީޑީގައި ބަލި މީހުން ބަައްލަވާނެ ކަމަށް ވިދާޅުވި އެވެ.

އައިޖީއެމްއެޗާ ގުޅިގެން އާސަންދައިން ކަށީގެ ހިދުމަތް ފުޅާކުރީ ހުޅުމާލެ ހޮސްޕިޓަލުގައި ވަސީލަތްތައް ނެތުމުގެ ސަބަބުންނެވެ.

ހުޅުމާލެ ހޮސްޕިޓަލުގައި މިހާރު ވެސް ކަށީގެ ޑޮކްޓަރެއް ހުރެ އެވެ. ނަމަވެސް ކަށީގެ އޮޕަރޭޝަނެއް ކޮށްފައެއް ނުވެ އެވެ. އެ ހޮސްޕިޓަލުގައި އެންމެ ފުރަތަމަ ކަށީގެ އޮޕަރޭޝަންކޮށްދެއްވީ ޑރ. ޔޫސުފް ޝާނެވެ.

މާރިޔާ ވިދާޅުވީ ޑިމާންޑް އޮތް މިންވަރަކުން ކަށީގެ އޮޕަރޭޝަންތައް ކުރިއަށް އޮތް ތަނުގައި ކުރާނެ ކަމަށެވެ.

"ކެޕޭސިޓީ ނެތީމަ އައިޖީއެމްއެޗްގެ އެހީގައި ހިދުމަތް ދޭން މި ފެށީ. މީގެ ކުރިން އޮޕަރޭޝަން ކުރުމަށް އައިޖީއެމްއެޗަށް ރެފާ ކުރާނީ،" މާރިޔާ ވިދާޅުވި އެވެ.

އޭނާ ވިދާޅުވީ ކަށީގެ ހިދުމަތް ފުޅާކުރަން ބޭނުންވާ ވަސީލަތްތައް ދެނެގަތުމުގެ މަސައްކަތް ކުރަމުން އަންނަ ކަމަށެވެ.

ސަރުކާރުގެ އަމާޒަކީ އަނިޔާތަކަށް ފަރުވާދޭ ގައުމީ މަރުކަޒު ހުޅުމާލެ ހޮސްޕިޓަލުގައި ގާއިިމްކުރުމެވެ.