އެމްއާރުޑީސީގެ ޗެއާމަންގެ މަގާމުން ރިޔާޒު އިސްތިއުފާ ދެއްވައިފި

މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)ގެ ޗެއާމަންގެ މަގާމުން މުހައްމަދު ރިޔާޒު އިސްތިއުފާ ދެއްވައިފި އެވެ.

ސަރުކާރުގެ ކުންފުނިތައް ބަލަހައްޓަމުން އަންނަ ޕްރައިވަޓައިޒޭޝަން ބޯޑުގެ ރައީސް މުހައްމަދު ނިޒާރު ކުރެއްވި ޓްވީޓެއްގައި ވިދާޅުވީ އެމްއާރުޑީސީގެ ޗެއާމަންގެ މަގާމުން ރިޔާޒު އިސްތިއުފާ ދެއްވީ އިއްޔެ ކަމަށާއި އެ މަގާމަށް ވަރަށް އަވަހަށް ބޭފުޅަކު އައްޔަންކުރައްވާނެ ކަމަށެވެ.

"މިހާރު"އާ ވާހަކަދައްކަވަމުން ރިޔާޒު ވިދާޅުވީ ޗެއާމަންގެ މަގާމުން އޭނާ އިސްތިއުފާ ދެއްވީ މަގާމުގައި ހުންނަވަން މި ވަގުތު ބޭނުންނުވާތީ ކަމަށެވެ.

ރިޔާޒު ވަނީ ރާއްޖޭގެ ވޮލީ އަށް ވަރަށް ގިނަ ހިދުމަތްތަކެއް ކުރައްވާފައިވާ، އަދި މިހާރު ވެސް ވޮލީ ބޯލް އެސޯސިއޭޝަންގެ ރައީސެވެ. އެކަމަކު އެސޯސިއޭޝަންގައި އެންމެ ފަހުން ބޭއްވި އިންތިހާބުގައި މައްސަލަތަކެއް ކުރިމަތިވެ އިންިހާބު އަލުން ބާއްވަން ތައްޔާރުވަމުން އަންނަ އިރު، ރިޔާޒު ދެން ވާދައެއް ނުކުރައްވާނެ އެވެ.