ވެހިިކަލް ގަތުމުގައި ތުހުމަތަށް ޖާގަ ނުދޭން އިބޫ އިސްވެ އޭސީސީއަށް

ތިލަފުށީގެ މަގުތައް މަރާމާތުކޮށް ބަލަހައްޓަން ބޭނުންވާ ވެހިކަލްތައް ގެންނަން ބަޔަކާ ހަވާލުކުރުމުގެ ކުރިން އެންޓި ކޮރަޕްޝަން ކޮމިޝަންް (އޭސީސީ)ގެ ރުހުން ހޯދަން ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) އިން އެކަން ކޮމިޝަނަށް ހުށަ ހަޅައިފި އެވެ.

ތލަފުށްޓާއި ގުޅިފަޅު ބަލަހައްޓާ ޖީއެމްއައިޒެޑްއެލްގެ މެނޭޖިން ޑިރެކްޓަރު އިބްރާހީމް ރަޝީދު (އިބޫ) ވިދާޅުވީ ވެހިކަލްތައްް ގެންނަން ބަޔަކާ ހަވާލުކުރުމުގެ ކުރިން އޭސީސީގެ ބަހެއް ހޯދަން ނިންމީ ކުރީގެ ތަޖުރިބާ ތަކުރާރު ވިޔަ ނުދިމުމަށް ކަމަށެވެ. އޭނާ އެ އިޝާރާތް ކުރެއްވީ ކެމިކަލް ގުދަންތައް އަޅަން ބަޔަކާ ހަވާލުކުރި އިރު ކުންފުނީގެ ބޯޑާއި މެނޭޖްމެންޓާ ދެމެދު ޚިޔާލު ތަފާތުވުން އުފެދި އޭސީސީ އަށް ހުށަހެޅި މައްސަލަތަކަށެވެ.

"ކުރިން ކުރިއަށް ގެންދިޔަ މަސަައްކަތްތައް ވެސް އޭސީސީން ފަހުން ވަނީ ރަނގަޅު ކަމަށް ބުނެފައި. އެކަމަކު މެނޭޖްްމަންޓުން ބޭނުމެއް ނުވޭ އެއްވެސް މައްސަލައަކަށް ޖާގަ ދޭކަށް. އެެހެންވެ، އޭސީސީގެ ކޮމެންޓް މި ހޯދަނީ،" އޭނާ ވިދާޅުވި އެވެ.

ތިލަފުށީގެ މަގުތައް މަރާމާތުކޮށް ބެލެހެއްޓުމުގެ މަސައްކަތަށް ހޯދަން އުޅެނީ ދެ ޑަމްޕް ޓްރަކާއި އެކްސްކަވޭޓަރަކާއި ލޯޑަރެކެވެ. އެ ތަކެތި ގެންނަން އިންޑިއާގެ ކުންފުންޏަކާއި ލަންކާގެ ދެ ކުންފުންޏަކުން ވަަނީ ޕްރޮޕޯސަލް ހުށަަހަޅައިފަ އެވެ. އަދި ބިޑްތައް ވަނީ އިވެލުއޭޓްވެސް ކޮށްފަ އެވެ. އެންމެ ކުޑަކޮށް ބިޑް ހުށަހެޅި ފަރާތުން ހުށަހަޅާފައިވާ އަގަކީ އިބޫ ވިދާޅުވި ގޮތުގައި. 8.9 މިލިޔަން ރުފިޔާ އެވެ.

އިބޫ ވިދާޅުވީ ތިލަފުށީގެ މަގުތައް މަރާމާތުކޮށް ބެލެހެއްޓުމަކީ އުނދަގޫ މަަސައްކަތެއް ކަމަށާއި ވިއްސާރަ ދުވަސް ވަރު އެކަން އިތުރަށް އުނދަގޫވާ ކަމަށެވެ. އެ މަސައްކަތް ކުރިން ކުރަމުން އަންނަނީ ވެހިކަލްތައް ކުއްޔަށް ހިފައިގެން ކަމަށް ވެސް އޭނާ ވިދާޅުވި އެވެ.

"ވެހިކަލްތަކުގެ ކުއްޔަށް ކުރިން ހަރަދުވޭ މަހަކު 1.5 މިލިޔަން ރުފިޔާއާ 2.2 މިލިޔަން ރުފިޔާއާ ދެމެދުގެ މިންވަރެއް،" އިބޫ ވިދާޅުވި އެވެ.