ސައުދީ އަރަބިއާގެ ވަޒީރުންގެ މުސާރަ އިން އުނިކުރީ ކިހާވަރެއް؟

ރިޔާޒް (ސެޕްޓެމްބަރު 29) - ތެލުގެ އަގު ދަށްވެ ގައުމަށް ލިބޭ އާމްދަނީ ދަށަށް ދާން ފެށުމުން ސައުދީ އަރަބިއާ އިން ފުރަތަމަ ފަހަރަށް ވަނީ ވަޒީރުންނާއި ޝޫރާ ކައުންސިލްގެ މެންބަރުންގެ މުސާރަ ކުޑަކުރަން ނިންމައިފަ އެވެ.

ސައުދީ ޝާހީ ވެރިކަމުގެ ފަރާތުން ނެރުނު ގަރާރެއްގައި ވަނީ ވަޒީރުންގެ މުސާރަ 20 ޕަސެންޓް އަދި ޝޫރާ ކައުންސިލްގެ މެންބަރުންގެ މުސާރަ އިން 15 ޕަސެންޓް ކުޑަ ކުރަން ނިންމާފައިވާ ކަމަށް ބުނެފަ އެވެ.

ސައުދީ އަރަބިއާގެ ވަޒީރެއްގެ މުސާރަ އަކީ މަހަކު 51،750 ރިޔާލް (ގާތްގަނޑަކަށް 13،780 ޑޮލަރު) އެވެ. ވަޒީރެއްގެ މުސާރަ އިން އުނިކޮށްފައި ވަނީ 10،350 ރިޔާލެވެ. އެހެން ކަމުން ކުޑަ ކުރި މުސާރައާ އެކު ވަޒީރަކަށް ދެން ލިބޭނީ 41،400 ރިޔާލެވެ. ވަޒީރުންގެ ފެންވަރުގައި ސައުދީ ސަރުކާރުގައި 143 ބޭފުޅުން ތިއްބަވަ އެވެ. މުސާރަ ކުޑަނުކުރާ އިރު ސައުދީ ސަރުކާރުގެ ވަޒީރުންނަށް މަހަކު 7.4 މިލިއަން ރިޔާލް ހޭދަވެ އެވެ. މުސާރަ އަށް ގެނައި ބަދަލާ އެކު ދެން ހޭދަވާނީ 5.9 މިލިއަން ރިޔާލެވެ.

ޝޫރާ ކައުންސިލުގެ މެންބަރުންނަށް މުސާރައިގެ ގޮތުގައި މަހަކު 26،450 ރިޔާލު ދެ އެވެ. ކައުންސިލްގެ މެންބަރުންގެ މުސާރަ އިން 15 ޕަސެންޓް އުނިކުރުމުން ކޮންމެ މެންބަރެއްގެ މުސާރަ އިން މަހަކު ވަނީ 3،968 ރިޔާލް ސަލާމަތް ކުރެވިފަ އެވެ. ޝޫރާ ކައުންސިލްގެ މެންބަރުންގެ މުސާރަ އަށް މީގެ ފަހުން ދޭނީ މަހަކު 22،483 ރިޔާލެވެ. ޝޫރާ ކައުންސިލުގައި 150 މެންބަރުން ތިބެ އެވެ. މުސާރަ ކުޑަ ނުކުރާ އިރު މި ކައުންސިލަށް މުސާރައިގެ ގޮތުގައި މަހަކު 3.96 މިލިއަން ހޭދަ ކުރެ އެވެ. ކައުންސިލަށް ދެން ހޭދަވާނީ މަހަކު 3.37 މިލިއަން ރިޔާލެވެ.

ސައުދީ އަރަބިއާގައި ވަޒީފާގައި އުޅޭ މީހުންގެ ތިންބައިކުޅަ ދެބައި އުޅެނީ ސަރުކާރުގެ ވަޒީފާތަކުގަ އެވެ. މިދިޔަ އަހަރުގެ ހިސާބުތައް ދައްކާ ގޮތުން ސަރުކާރުން ކުރި ޚަރަދުގެ ދެބައިކުޅަ އެއްބައި ހޭދަކޮށްފައި ވަނީ ސަރުކާރު މުވައްޒަފުންގެ މުސާރަ އަށެވެ. މުވައްޒަފުންގެ މުސާރަ އަށް ސައުދީން މިދިޔަ އަހަރު ވަނީ 120 ބިލިއަން ޑޮލަރު ޚަރަދުކޮށްފަ އެވެ. ސައުދީގެ ބަޖެޓް ދަރަނި މިހާރު ވަނީ 98 ބިލިއަން ޑޮލަރަށް އަރައިފަ އެވެ.

ތެލުގެ އާމްދަނީ ދަށަށް ދާތީ ވަލީ އަހުދު މުހައްމަދު ބިން ސަލްމާން އޭޕްރީލް މަހު ވަނީ އިގްތިސާދީ އިސްލާހީ ޕްލޭނެއް އާއްމު ކުރައްވައިފަ އެވެ. މި ޕްލޭނުގައިވާ ގޮތުން ސައުދީން ތެލުގެ އާމްދަނީ އަށް ބާރޯސާވުން ވަނީ ކުޑަކޮށްފަ އެވެ.