ގިނަ އަދަދަކަށް ރަތް މުރަކަ ނަގައިގެން އުޅެނިކޮށް އަތުލައިގެންފި

ރާއްޖޭގައި ހިމާޔަތްކޮށްފައިވާ ބާވަތެއް ކަމަށްވާ ރަތް މުރަކައިގެ ގިނަ އަދަދެއްގެ މުރަކަ މާލެއިން މިއަދު ހަވީރު އަތުލައިގެންފި އެވެ.

އާންމުކޮށް ގަހަނާ އާއި ތަންތަން ޒީނަތްތެރި ކުރުމަށް ބޭނުންކުރާ ރަތް މުރަކައިގެ 42 މުރަކަ މިއަދު އަތުލައިގަތީ، ހެންވޭރު ބޮޑުރަސްގެފާނުމަގުގައި ހުރި ގޯޅިއެއްގެ ތެރެއިންނެވެ. އެތަކެތި އަތުލައިގަތީ ފުޅިމަދު ފޮށިގަނޑުތަކަކަށް އަޅައި، އަވީގައި ހިއްކަން ބަހައްޓާފައި ވަނިކޮށެވެ.

އެންވަޔަރްމެންޓް މިނިސްޓްރީގައި މިރޭ ބޭއްވި ނޫސްވެރިންގެ ބައްދަލުވުމެއްގައި އެންވަޔަރްމަންޓް ޕްރޮޓެކްޝަން އެޖެންސީ (އީޕީއޭ) ގެ ޑިރެކްޓަރު މުހައްމަދު ނައީމް ވިދާޅުވީ ރަތް މުރަކައަކީ ރާއްޖެ އާއި ދުނިޔޭގައި ވެސް ހިމާޔަތްކޮށްފައިވާ ބާވަތެއް ކަމަށެވެ. މިއަދު އަތުލައިގަތް ތަކެއްޗަކީ ރާއްޖެއިން ބޭރަށް އެކްސްޕޯޓް ކުރަން ނަގާފައިވާ އެއްޗެހިތަކެއް ކަމަށް ބެލެވޭ ކަމަށާއި މިފަދަ ކަންކަމުގެ ސަބަބުން ތިމާވެށްޓަށް ވަރަށް ބޮޑަށް ގެއްލުންވާނެ ކަމަށް އޭނާ ވިދާޅުވި އެވެ.

"އިންސާނުންގެ އެކިއެކި އަމަލުތަކުގެ ސަބަބުން ދުނިޔޭގެ ބައެއް ދިރުންތައް އެބަހުރި އެއްކޮށް ނެތިގޮސްފައި. އެއްކޮށް ނެތިއްޖެއްޔާ އޭގެ މާނައަކީ އެ އެއްޗެއް އަނބުރާ ނުގެއް ގެނެވޭނެއޭ. ސަރުކާރުން ވެސް މި އެއްޗެހި މަނާކޮށްފައި މި އޮންނަނީ ވިއްކައިގެން ލިބޭ އާމްދަނީއަށް ވުރެ، ހިމާޔަތްކޮށްފައި މިތަކެތި ބަހައްޓައިގެން ލިބޭ ފައިދާ މާ ބޮޑުވީމަ." ނައީމް ވިދާޅުވި އެވެ.

ފިޝަރީޒް މިނިސްޓްރީގެ އޮފިޝަލަކު ވިދާޅުވީ މިއަދު އަތުލައިގަތް މުރަކަތަކަކީ ހއ. އަތޮޅުގެ ސަރަހައްދަކުން ނަގާފައިވާ ތަކެތި ކަމަށް މައުލޫމާތު ލިބިފައިވާ ކަމަށާއި އެކަން ފުލުހުން ވެސް މިހާރު ތަހުގީގު ކުރަމުން އަންނަ ކަމަށެވެ.

ފުލުހުން ވެސް ބުނީ އެފަދަ މައްސަލައެއް ބަލަމުން އަންނަ ކަމަށެވެ. ނަމަވެސް އޭގެ ތަފްސީލެއް އަދި ލިބޭ ގޮތް ވަނީ ނުވެފަ އެވެ.

ރާއްޖެ ބައިވެރިވެފައިވާ ބައިނަލްއަގްވާމީ މުއާހަދާއަކުންނާއި ރާއްޖޭގެ މަސްވެރިކަމާ ބެހޭ ގާނޫނުގެ ދަށުން ހިމާޔަތްކޮށްފައިވާ ރަތް މުރަކައަކީ އާންމުކޮށް ވެލި ޖަމާނުވާ ނުވަތަ މަދުން ވެލި އުފެދޭ ސަރަހައްދުތަކުގައި އުފެދޭ ބާވަތުގެ މުރަކަ އެކެވެ. އާންމުކޮށް 10 މީޓަރާއި 5،000 މީޓަރާ ދެމެދުގެ މިންވަރަށް ބޮޑުވާ އެ ބާވަތުގެ މުރަކަ ރާއްޖެއިން ފެންނަނީ އާންމުކޮށް ކަނޑުގެ 70 މީޓަރަށް ވުރެ އަޑިންނެވެ.