ހުޅުމާލެ ހޮސްޕިޓަލުގެ ލޮލުގެ ފަރުވާ ދޭ ސެންޓަރު ހުޅުވައިފި

ހުޅުމާލޭ ހޮސްޕިޓަލުގައި ޗައިނާ ސަރުކާރުން ގާއިމްކޮށްދިން ލޮލުގެ ފަރުވާދޭ ސެންޓަރު، ރައީސް އިބްރާހިމް މުހައްމަދު ސޯލިހު މިއަދު ހުޅުއްވައި ދެއްވައިފި އެވެ.

ރާއްޖޭގެ ފުރަތަމަ ލޮލުގެ ޑޮކްޓަރު، ޑރ. އެންޑީ އަބްދުﷲ އަބްދުލް ހަކީމްގެ ނަން ދީފައިވާ އެ ސެންޓަރަކީ، ރާއްޖެ އާއި ޗައިނާއާ ދެމެދު މިދިޔަ އަހަރުގެ ޖުލައި މަހު ސޮއިކުރި އެއްބަސްވުމުގެ ދަށުން ގާއިމްކުރި ތަނެކެވެ.

ލޮލުގެ ސެންޓަރު ހުޅުވަން ބޭއްވި ރަސްމިއްޔާތުގައި، ޗައިނާ އިން ރާއްޖެ ކަނޑައަޅާފައި ހުންނަވާ ސަފީރު ޒާން ލިއޮން ވިދާޅުވީ މިއީ، ޗައިނާގެ އެހީގެ ދަށުން އެ ގައުމުން ބޭރުގައި ގާއިމްކުރި އެފަދަ ފުރަތަމަ ސެންޓަރު ކަމަށެވެ. އޭގެ ސަބަބުން ދިވެހިންނަށް ލުއި ފަސޭހަވެ، ދެ ގައުމުގެ ގުޅުން އިތުރަށް ބަދަހިވާނެ ކަމަށް ވިދާޅުވި އެވެ.

އޭނާ ވިދާޅުވީ ޗައިނާގެ މާހިރުން ދުވަސްކޮޅަކު އެ ސެންޓަރުގައި މަސައްކަތް ކުރާނެ ކަމަށެވެ. އަދި އެ ސެންޓަރުގައި މަސައްކަތްކުރާނެ މުވައްޒަފުންނަށް ތަމްރީނު ދޭނެ ކަމަށް ވެސް ވިދާޅުވި އެވެ.

ސެންޓަރުގައި ފަރުވާ ދިނުމާއި އެތަނަށް ބޭނުންވާ މުވައްޒަފުން ތަމްރީނު ކުރުމުގަައި ބޭނުންކުރާނީ އާޓިފިޝަލް އިންޓެލިޖެންސް (އޭއައި) ގެ ޓެކްނޮލޮޖީ އެވެ.

އޭނާ ވަނީ ސިއްހީ ދާއިރާއިން އެހީތެރިކަން ދިނުމުގައި ޗައިނާ އިން ދެމިތިބޭނެ ކަމަށް ވިދާޅުވެފަ އެވެ.

"މެޑިކަލް ޓްރެއިނިން ދީ ފްރީ ކްލިނިކަލް ސާވިސް އަދި އައި އެވެއާނަސް ކެމްޕެއިން ހިންގާނެ،" ސަފީރު ވިދާޅުވި އެވެ.

ސެންޓަރުން ފަރުވާދޭ ބަލިތަކުގެ ތެރޭގައި ލޯފުސްވުން، ގުލުކޯމާ، އޮސްކިއުލާ ސާފޭސް ޑިޒީޒް ފަދަ ބަލިތައް ހިމެނެ އެވެ.

އެ ރަސްމިއްޔާތުގައި ހެލްތު މިނިސްޓަރު އަބްދުﷲ އަމީން ވިދާޅުވީ ލޮލުގެ ފަރުވާދޭ ސެންޓަރު ގާއިމްކުރަން ޗައިނާ އިން 11 މިލިއަން ރުފިޔާ ހަރަދުކޮށްފައިވާ ކަމަށެވެ.

އަމީން ވިދާޅުވީ 2016 ވަނަ އަހަރު ހެދި ސާވޭއަކުން، ގިނަ ދިވެހިން ލޮލުގެ އެކި ބަލިތައް ތަހައްމަލުކުރަމުން ދާކަން އެނގިގެން ދިޔަ ކަމަށް ކަމަށެވެ. އެހެންވެ މިއީ ރާއްޖެ އަށް ވަރަށް ބޭނުންތެރި މަރުކަޒަކަށް ވެގެންދާނެ ކަމަށާއި އޭގެ ފައިދާ ލޮލުގެ ބަލިތަކުގެ ޑޮކްޓަރުންނަށް ވެސް ކުރާނެކަން ފާހަގަކުރެއްވި އެވެ.

އޭނާ ވިދާޅުވީ މިއީ ބަދަހިވަމުން އަންނަ ރާއްޖެ އާއި ޗައިނާގެ ގުޅުމުގައި ހާއްސަ ދުވަހެއް ކަމަށެވެ.

ޑރ. އެންޑީ އަބްދުﷲ ސިއްހީ ދާއިރާގެ ޚިދުމަތަށް ނުކުންނެވީ 1964 ގަ އެވެ. އޭގެ ފަހުން 2007 އާ ހަމައަށް ޚިދުމަތުގައި ދެމިހުންނެވި އެވެ. އޭނާ އަވަހާރަވީ، އުމުރުފުޅުން 81 އަހަރުގައި، 2016 ވަނަ އަހަރު އެވެ.