ޓާޓާ ފްލެޓްތަކުގެ ގުރުއަތު ނަގަން މާދަމާ ފަށަނީ

ޓާޓާ ފްލެޓްތަކަށް ހޮވިފައިވާ މީހުންގެ ތެރެއިން 147 މީހަކަށް ލިބޭ ފްލެޓްތައް ކަނޑައެޅުމަށް މާދަމާ ގުރުއަތު ނަގަން ފަށާ ގޮތަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ނިންމައިފި އެވެ.

ޑިރެކްޓަރު ފައިނޭންސް އަލީ ޝަރީފް ވިދާޅުވީ ލިބޭ ފްލެޓްތައް ކަނޑައެޅުމަށް ގުރުއަތު ނެގުން މޯލްޑިވްސް ނެޝަނަލް ޔުނިވަސިޓީގެ އޮޑިޓޯރިއަމް ގައި ބޭއްވުމަށް މަސައްކަތް ކުރަމުން އަންނަ ކަމަށެވެ.

"އަޅުގަނޑުމެންނަށް މިވަގުތު ހައުސިން އިން ފޮނުވާފައިވާ ލިސްޓުގައި ހިމެނޭ މީހުންނަށް ލިބޭނެ ފްލެޓްތައް ކަނޑައެޅުމަށް މާދަމާ ގުރުއަތު ނެގުން މި ބާއްވަނީ. މީގެ ދެވަނަ ބުރެއް މިމަހުގެ ފަހުކޮޅު ބޭއްވޭތޯ ބަލަމުން މިދަނީ،" އޭނާ ވިދާޅުވި އެވެ.

ޝަރީފް ވިދާޅުވީ މާދަމާގެ ގުރުއަތަށް ދާން ޖެހޭ މީހުންނަށް އެޗްޑީސީން މިހާރު ފޯނުން އަންގަން ފަށާފައިވާ ކަމަށެވެ.

މި އަހަރުގެ މާޗް މަހު ނިމުނު ފްލެޓްތަކަށް ހޮވިފައިވާ މީހުން ވަންނާނެ ފްލެޓްތައް ކަނޑައެޅުން ލަސްވީ، އެތަން އިމާރާތްކުރި އެޕެކްސް ރިއަލިޓީ އަށް ދައްކަން ޖެހޭ 277 މިލިއަން ރުފިޔާ ނުދެއްކިގެންނެވެ.

ސަރުކާރުން ފަހުން ވަނީ އެ ފްލެޓްތައް އެޗްޑީސީއާ ހަވާލުކޮށް، ސަރުކާރުން ނެގި ލޯނެއްގެ ދަށުން އެޕެކްސް ރިއަލިޓީ އަށް ފައިސާ ދައްކައިފަ އެވެ. ދެ އިމާރާތް ތަރައްގީކުރި އެޕެކްސް ރިއަލިޓީ އަކީ ޓާޓާ ހައުސިންގެ ހިއްސާ އޮންނަ ކުންފުންޏެކެވެ. ޝަރީފް ވިދާޅުވީ 20 އަހަރަށް ބަހާލައިގެން ފައިސާ ދެއްކޭނެ ގޮތް ބޭންކްތަކުން ހަމަޖައްސައިދޭނެ ކަމަށެވެ.

"މިހާރު" އަށް އެނގިފައިވާ ގޮތުގައި ފްލެޓްތަކުގެ އަގު ދެ މިލިއަނަށް ވުރެ ބޮޑުނުވާ ގޮތަށް އަގު ކަނޑައެޅުމަށް ވެސް އެޗްޑީސީން އަންނަނީ މަސައްކަތް ކުރަމުންނެވެ. ތިން ކޮޓަރީގެ ފްލެޓެއް މާލޭގައި ދެ މިލިއަން ރުފިޔާއަށް ވުރެ ކުޑަވުމަކީ، މާކެޓްގެ އަގަށް ވުރެ ގާތްގަނޑަކަށް ދެ ގުނަ ދަށް ވުމެކެވެ. އަަރަބިއްޔާ ހުރި ބިމުގައި ހެދި މާލޭ ގްރޭންޑްގައި 90 ފްލެޓް، ގާކޮށީގައި ތަރައްގީކުރި މާލޭ ސްކެއާގައި 190 ފްލެޓް ހިމެނެ އެވެ.