ގދ. އަތޮޅު ކައުންސިލްގެ ރައީސަށް ޔޫތު މިނިސްޓްރީގެ ނައިބުކަން

ގދ. އަތޮޅު ކައުންސިލްގެ ރައީސް ކަމުގައި މިދިޔަ ހަފުތާގެ ނިޔަލަށް ހުންނެވި ގދ. ތިނަދޫ، ޑެން، މުހައްމަދު ނާސިހު ރަޝީދު ޔޫތު މިނިސްޓްރީގެ ޑެޕިއުޓީ މިނިސްޓަރަކަށް މިއަދު ހަމަޖައްސަވައިފި އެވެ. އޭނާ އިސްތިއުފާ ދެއްވާފައި ވަނީ އެމްޑީޕީގެ ޕްރައިމަރީގެ ކުރިންނެވެ. އެ އިންތިހާބުގައި އޭނާ ވާދައެއް ނުކުރައްވަ އެވެ.

ޝަރީއާ އެންޑް ލޯ ކިޔަވާވިދާޅުވަމުން އަންނަ ނާސިހު ވަނީ ޕްރޮޖެކްޓް މެނޭޖްމަންޓުން ޑިޕްލޮމާ އާއި ޔޫތު ޑިވެލޮޕްމަންޓުން އެޑްވާންސް ސެޓްފިކެޓް އާއި އޮފީސް އެޑްމިނިސްޓްރޭޝަން އަދި ޕާކިސްތާނުން ނޭޝަނަލް ސަޕޯޓު ކޯހެއް ފުރިހަމަކުރައްވާފަ އެވެ.

ނާސިހާ އެކު ޔޫތު މިނިސްޓްރީގައި ތިއްބެވި ޑެޕިއުޓީ މިނިސްޓަރުންގެ އަދަދު ހަތަރަކަށް އަރަ އެވެ. އޭގެ އިތުރުން ސްޕޯޓްސް ކޮމިޝަނަރު ހީނާ އަހުމަދު ސަލީމް ވެސް ހުންނެވީ ޑެޕިއުޓީ މިނިސްޓަރުންގެ ފެންވަރުގަ އެވެ.

ޑެޕިއުޓީ މިނިސްޓަރަކަށް މުސާރަ އާއި އެލަވަންސްގެ ގޮތުގައި ކޮންމެ މަހަކު ލިބިވަޑައިގަންނަވާނީ 30،500ރ. އެވެ. އެއީ 18،000ރ. ގެ މުސާރަ އާއި 12،500ރ. ގެ އެލަވަންސެކެވެ.