މެގަން މާކަލްގެ ބައްޕަ އަނެއްކާ ވެސް އޭނާއާ ދެކޮޅަށް

ދަރިކަނބަލުން މޭގަން މާކްލްއާ މެދު މިހާތަނަށް މާ ރަނގަޅު ވާހަތަކެއް ދައްކާފައި ނުވާ ތޯމަސް މާކަލް އަނެއްކާ ވެސް އެ ކަމަނާގެ ފިރިކަލުން ޕްރިންސް ހެރީއާ ބެހޭ ގޮތުން ހިތްހަމަނުޖެހުން ފާޅުކޮށް ވާހަކަތަކެއް ދައްކައިފި އެވެ.

މޭގަން އާއި ހެރީ އެންގޭޖްމަންޓް އިއުލާންކުރުމާއި އެ ދެ ބޭފުޅުން ކައިވެނި ބައްލަވައިގަންވަން އުޅުއްވި ދުވަސްވަރު ވެސް އެކި ވާހަކަތައް ދައްކާފައިވާ ތޯމަސް ބުނީ ޕްރިންސް ހެރީ އާއި މޭގަން ޝާހީ ޒިންމާތައް ދޫކޮށްލައްވައި، އެ އާއިލާއާ އެކަހެރިކޮށް ދިރިއުޅުއްވަން ނިންމެވުމަކީ ރާނީ އެލިޒަބަތަށް ވެސް ކުރެއްވި ފުރައްސާރައެއް ކަމަށެވެ. އަދި އެ ނިންމުން ބަލައި ނުނަގެވޭނެ ކަމަށް ބުންޏެވެ.

އޭނާ މި މި މޭރުމުން ވާހަކަ އަންގާރަ ދުވަހު ދައްކާފައި މި ވަނީ މެކްސިކޯގެ ރެސްޓޯރަންޓަކުން ނުކުތް ތަނުން ނޫސްވެރިންތަކެއް ކުރި ސުވާލުތަކަކާ ގުޅިގެންނެވެ. އެގޮތުން ތޯމަސް، 75، ބުނީ އޭނާ ހުރީ ހެރީ އާއި މޭގަންއާ ދޭތެރޭ ވަރަށް ބޮޑަށް ހިތްހަމަނުޖެހިފައި ކަމަށެވެ. އަދި އެ ބޭފުޅުން ޝާހީ ޒިންމާތައް ދޫކޮށްލައްވައި އަމިއްލަ ވިޔަފާރިން ދިރިއުޅުއްވުން ބިނާކުރައްވަން ނިންމާފައިވާތީ އެ ބޭފުޅުންގެ ވިޔަފާރީގެ ނަމަކަށް "ރޯޔަލް" ބޭނުން ނުކުރެވޭނެ ކަމަށް ވެސް މެގަންގެ ބައްޕަ ބުންޏެވެ.

"އަހަރެން ގަބޫލެއް ނުކުރަން އެ ލަފުޒު ބޭނުންކުރުމުގެ ހައްގެއް އެ މީހުންނަށް މިހާރު އޮތް ކަމަކަށް." ތޯމަސް ބުންޏެވެ. "އަހަރެން ގަބޫލުކުރާ ގޮތުގައި އެ ދެމަފިރިން ޝާހީ ޒިންމާތައް ދޫކޮށްލުމަކީ ރާނީ އާއި މުޅި ޝާހީ އާއިލާގެ އިތުރުން އިނގިރޭސި ރައްޔިތުންނަށް ވެސް ކުރި ފުރައްސާރައެއް."

އޭނާ ބުނީ މޭގަން އަކީ ބައްޕަ އާއި އާއިލާ ވެސް ދޫކޮށްލާފައިވާ މީހެއް ކަމަށާއި އޭނާ އަކީ ރަނގަޅު ދަރިއެއް ނޫން ކަމަށެވެ.

"ކައިވެނިކުރުމުގެ އެއް ދުވަސްކުރިން އޭނާ ވަނީ އަހަންނާ އޮތް ގުޅުމާއި މުޅި އާއިލާއާ ވެސް އޮތް ގުޅުން ކަނޑާލައި، އަހަރެމެންނަކީ ނެތް ބަޔަކަށް ހަދާފައި،" ތޯމަސް ބުންޏެވެ.

ހޮލީވުޑްގެ ބަތަލާއެއްގެ ގޮތުގައި ކުރިން މަސައްކަތްކުރެއްވި މޭގަން އަކީ ކުރިން ވެސް އާއިލާއާ މާ ގާތް ގުޅުމެއް އޮތް ބޭފުޅުންނެއް ނޫނެވެ. އަދި އޭނާގެ ބައްޕަގެ އިތުރުން އާއިލާގެ ބައެއް މީހުން ވެސް މޭގަންއާ ބެހޭ ގޮތުން އެކި ކަހަލަ ވާހަކަތައް މީގެ ކުރިން މީޑިއާތަކުގައި ދައްކާފައިވެ އެވެ.

މޭގަން އާއި ހެރީ މެއި 19، 2018 ގައި ކައިވެނި ބައްލަވައިގަތް އިރު މަންމަ ފިޔަވައި އާއިލާގެ އެއްވެސް ބަޔަކަށް ހަފުލާއަކަށް ދައުވަތެއް ވެސް ނުދެ އެވެ.

ކައިވެންޏަށް ދަރިއަކު ވެސް ލިބިވަޑައިގަތް ފަހުން މިދިޔަ މަހު ޝާހީ ޒިންމާތައް ދޫކޮށްލައްވައި އަމިއްލަ މަސައްކަތްފުޅުން ދިރިއުޅުން ބިނާކުރައްވަން ނިންމެވިކަން އިއުލާންކޮށް، ހެރީ އާއި މޭގަން ކުރިއަށް އޮތް ތަނުގައި ދިރިއުޅުމުގެ ބޮޑުބައި ހޭދަކުރައްވަން ނިންމަވާފައި ވަނީ ކެނެޑާގަ އެވެ.

މިކަމާ ގުޅިގެން އެ ބޭފުޅުންނަށް ޝާހީ އާއިލާގައި އޮތް އިސް މެމްބަރުންގެ މަގާމު އަންނަ މަހު 31 އިން ފެށިގެން ގެއްލޭނެ އެވެ. އަދި ބަކިންހަމް ޕެލަސްގައި ހުރި ދެ ކަނބަލުންގެ އޮފީސް ވެސް ބަންދުވާނެ އެވެ.

ޝާހީ އާއިލާއާ ފެއަށްޖެހިވަޑައިގަންނަވަން ނިންމެވުމުގެ ކުރިން ހެރީގެ ދެކަނބަލުން ވަނީ އެ ބޭފުޅުންގެ ލަގަބު ދަ ޑޫކް އެންޑް ޑަޗެސް އޮފް ސަސިކްސް އަށް ނިސްބަތްވާ ގޮތަށް "ސަސިކްސް ރޯޔަލް" ގެ ނަމުގައި އަމިއްލަ ވިޔަފާރި ޓްރޭޑްމާކެއް ވެސް ރަޖިސްރީކުރައްވަން މަސައްކަތްކުރައްވައިފަ އެވެ. ނަމަވެސް ރިޕޯޓްތައް ބުނާ ގޮތުން އެ ނަން ބޭނުންނުކުރައްވަން ވަނީ މިހާރު ވަނީ ނިންމަވައިފަ އެވެ.