"އިންޖީނުގޭ ކުދިންނަށް" މަޖިލީހަށް ސިޓީއެއް ނުފޮނުވޭނެ: ނަޝީދު

ސްޓެލްކޯގެ އިސްވެރިންގެ މުސާރަ ހާމަކޮށް ރައްޔިތުންގެ މަޖިލީހަށް ފޮނުވި ސިޓީއެއް ސޯޝަލް މީޑިއާގައި އާއްމުވި ގޮތް ހޯދައިދިނުމަށް އެދި އެ ކުންފުނިން ރައްޔިތުންގެ މަޖިލީހަށް ސިޓީއެއް ފޮނުވާފައިވާއިިރު އެގޮތަށް އެކަން ނުކުރެވޭނެ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ރައީސް ނަޝީދަށް އެޑްރެސް ކުރައްވައި ސްޓެލްކޯއިން މި މަހުގެ ހަވަނަ ދުވަހު ފޮނުވާފައިވާ ސިޓީގައި ބުނެފައިވަނީ މަޖިލީހުގެ އިދާރާގެ ބޭނުމަށް އެ ކުންފުނިން ފޮނުވި ސިޓީއެއް ސޯޝަލް މީޑިއާގައި ލީކުވުމާ ގުޅިގެން އެ ކުންފުންޏާ މެދު ރައްޔިތުން ދެކޭ ގޮތް ބަދަލު ކުރުމަށް ބަޔަކު މަސައްކަތް ކުރަމުން އަންނަ ކަމަށެވެ. އަދި އެ ސިޓީ ބޭނުންކޮށްގެން ދައުލަތާއި ދައުލަތުގެ އިދާރާތަކާ މެދު ނަފުރަތު އުފައްދަން ބަޔަކު މަސައްކަތް ކުރާތީ ސިޓީ ލީކުވި ގޮތެއް ހޯދައިދިނުމަށް ސްޓެލްކޯއިން ވަނީ އެދިފަ އެވެ.

ރައްޔިތުން މަޖިލީހުގެ މިއަދުގެ ޖަލްސާގައި އެކަމަށް ޖަވާބު ދެއްވަމުން ނަޝީދު ވިދާޅުވީ ސިޓީބިޓީ ލިޔުމާ ގުޅޭގޮތުން 1968 ވަނަ އަހަރު ފާސްކޮށްފައިވާ ގާނޫނު ބުނާގޮތުން "އިންޖީނުގެއިން" އެގޮތަށް މަޖިލީހަށް ސިޓީ ނުފޮނުވޭނެ ކަމަށެވެ.

"ގ. ކެނެރީގޭ މުހައްމަދު ނަޝީދަށް ކޮންމެ ބޭފުޅަކަށް ވެސް ސިޓީ ލިޔެވޭނެ. އަދި ބޭނުންވާ ކޮންމެ އެއްޗެއް ވިދާޅު ވެސް ވެވޭނެ. އެހެން ނަމަވެސް ރައްޔިތުން މަޖިލީހުގެ ރައީސަށް އިންޖީނުގޭ ކުދިން ސިޓީއެއް ނުފޮނުއްވާނެ. 2/68 އެ ޖާގައެއް ނުދޭ،" ނަޝީދު ވިދާޅުވި އެވެ.

ރައްޔިތުންގެ މަޖިލީހަށް ސިޓީ ފޮނުވޭނީ ވަޒީރުންނަށް ކަމަށް ވެސް ނަޝީދު ވިދާޅުވި އެވެ.

މި މަހުގެ ތެރޭގައި ސޯޝަލް މީޑިއާގައި އާއްމުވެެފައިވާ ސްޓެލްކޯގެ ސިޓީގައި ބުނެފައިވާގޮތުގައި އެ ކުންފުނީގެ މެނޭޖިން ޑިރެކްޓަރު ހަސަން މުޣުނީއަށް މުސާރަ އާއި އިނާޔަތްތަކާއެކު މަހަކު މަދުވެގެން 98،000ރ. ލިބެ އެވެ. މިކަމާ ގުޅިގެން ގިނަ ބަޔަކު ވަނީ ސޯޝަލް މީޑިއާގައި މުޣުނީއަށާއި ސަރުކާރަށް ފާޑު ކިޔައިފަ އެވެ.

އެއީ ސިއްރު މައުލޫމާތެއް ކަމާއި އެކަން މަޖިލީހުން ލީކް ކުރީ ކަމަށް ކުރާ ތުހުމަތުތަކަށް ޖަވާބު ދެއްވަމުން ބައެއް މެމްބަރުން ވިދާޅުވެފައިވަނީ ދައުލަތުގެ ކުންފުންޏެއްގެ ވެރިއެއްގެ މުސާރައިގެ އަދަދަކީ ވިޔަފާރީގެ ސިއްރެއް ނޫން ކަމަށެވެ.

މި ސިޓީ ލީކުވުމާ ގުޅިގެން ސްޓެލްކޯއިން ވަނީ މުސްތަގުބަލުގައި މަޖިލީހަށް ފޮނުވާ ލިޔެކިޔުންތަކަކީ އާއްމު ކުރާނެ ލިޔެކިޔުންތަކެއް ކަން ކުރިން އެންގުމަށް ވެސް އެދިފަ އެވެ.