ކޮމަންވެލްތު ގައުމުތަކުގެ ޓޫރިޒަމް ހުޅުވާލަން ރާއްޖޭން އެދިއްޖެ

ކޮމަންވެލްތުގެ ހުރިހާ ގައުމެއްގެ ޓޫރިޒަމް އަލުން ހުޅުވާލައި ރައްކާތެރިގޮތުގައި ޓޫރިޒަމް ދާއިރާ އަލުން ފަށައިގަތުމަށް ކޮމަންވެލްތުގެ އެހީ އަށް ޓޫރިޒަމް މިނިސްޓަރު އަލީ ވަހީދު މިއަދު އެދިވަޑައިގެންފި އެވެ.

ކޮމަންވެލްތުގެ ގައުމުތައް ބައިވެރިވެގެން ބޭއްވި ވެބިނާގައި މިނިސްޓަރު ވިދާޅުވީ ކޮމަންވެލްތާއި އަލުން ގުޅުމަކީ ލިބުނު އުފަލެއް ކަމަށެވެ. އަދި މި ހާލަތުގައި އެ ޖަމިއްޔާ އިން ރާއްޖެ އަށް ވެދޭ އެހީ ފާހަގަކުރައްވައި މިނިސްޓަރު ވަނީ ޓޫރިޒަމް ދާއިރާ އަލުން ކުރިއެރުވުމަށް އެ ޖަމިއްޔާގެ އެހީއަށް އެދިވަޑައިގެންފަ އެވެ.

ކޮވިޑް-19އާ ގުޅިގެން ރާއްޖޭގެ ޓޫރިޒަމް އެއްކޮށް މަޑުޖެހިފައިވާ އިރު ރާއްޖޭގެ އިގްތިސާދު ކުރިއެރުވުމަށް ވީހާ ވެސް އަވަހަށް ޓޫރިޒަމް ފަށައިގަތުމަކީ މުހިންމު ކަމެކެވެ. އަލީ ވަހީދު ވިދާޅުވި ގޮތުގައި އެންމެ ގޯސް ހާލަތުގައި، ޓޫރިޒަމް ދާއިރާ 26 ޕަސެންޓު ދަށްވުމަކީ އެކަށީގެންވާ ކަމެކެވެ.

"ކޮވިޑް-19 އިން ސަލާމަތްވުމަށް އަޅުގަނޑުމެން މަސައްކަތް ކުރަން ޖެހޭނީ ވަރަށް ވިސްނައިގެން ވަރަށް ގުޅިގެން. އެހެންކަމުން އަޅުގަނޑުމެން އެދެނީ ރައްކާތެރިކަމުގެ ފިޔަވަޅުތަކާ އެކު ކޮމަންވެލްތުގެ ހުރިހާ ގައުމެއްގެ ވެސް ބޯޑަރު ހުޅުވާލަން،" އަލީ ވަހީދު ވިދާޅުވި އެވެ.

މިނިސްޓަރު ވިދާޅުވި ގޮތުގައި 2004 ވަނަ އަހަރުގެ ސުނާމީ އާއި 2008 ވަނަ އަހަރު ދުނިޔޭގެ އިގްތިސާދަށް ކުރި އަސަރަށްވުރެ ބޮޑު އަސަރެއް މި އަހަރުގެ މާޗު މަހުން ފެށިގެން ރާއްޖެ އަށް ވަނީ ކޮށްފަ އެވެ. އެހެންކަމުން ރާއްޖޭގެ ބޯޑަރު އިތުރު މުއްދަތަކަށް ބަންދުކޮށްފައި ބާއްވަން ޖާގައެއް ނެތް ކަމަށާއި ވީހާވެސް އަވަހަށް ބޯޑަރު ހުޅުވާލަން ސްޓޭކް ހޯލްޑަރުންނާ މަޝްވަރާ ކުރެވެމުންދާ ކަމަށް އޭނާ ވިދާޅުވި އެވެ.

މިނިސްޓަރު މިހެން ވިދާޅުވެފައިވާ އިރު ރާއްޖޭގެ ޓޫރިޒަމް އަންނަ ޖުލައި މަހު ހުޅުވާލުމަށް ޓޫރިޒަމް މިނިސްޓްރީން އަންނަނީ މަސައްކަތް ކުރަމުންނެވެ. އެގޮތުން، އެ މިނިސްޓްރީން އެކުލަވައިލި ގައިޑްލައިންގައިވާ ކަންތައްތަކާ ގުޅޭގޮތުން ޓޫރިޒަމް ދާއިރާގެ އިސް ފަރާތްތަކާ ވަނީ މަޝްވަރާ ކޮށްފަ އެވެ. މި މަސް ނިމުމުގެ ކުރިން އެ ގައިޑްލައިނަށް ގެންނަން ޖެހޭ މުހިންމު ބަދަލުތައް ގެނެސް ކަމާ ބެހޭ އިދާރާތަކާ ހަވާލު ކުރެވޭނެ ކަމަށް ޓޫރިޒަމް މިނިސްޓްރީން ބުނެ އެވެ.

ރާއްޖޭން ކޮމަންވެލްތުގެ ގައުމުތަކުގެ ބޯޑަރު ހުޅުވާލުމަށް އެދިފައިވާއިރު އެ ޖަމިއްޔާގައި 54 ގައުމެއް ހިމެނެ އެވެ. މީގެ ތެރޭގައި އަވައްޓެރި އިންޑިއާ އާއި ޕާކިސްތާނާއި މެލޭޝިއާ އާއި ސިންގަޕޫރާއި ސްރީ ލަންކާ ހިމެނެ އެވެ.