އީޕީއޭގެ ނައީމަށް އެންވަޔަރަމެންޓް މިނިސްޓްރީން އިންޒާރު ދީފި

އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަސީރު ދެއްވި އިރުޝާދާ އެއްގޮތަށް އަމަލު ނުކުރާނެ ކަމަށް، އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ)ގެ ޑިރެކްޓަ ޖެނެރަލް މުހައްމަދު ނައީމް ވިދާޅުވުމުން އޭނާގެ މަގާމު ދަށް ކުރަން ނުވަތަ ވަޒީފާ އިން ވަކިކުރަން ޖެހިދާނެ ކަމަށް ބުނެ އެންވަޔަރަމެންޓް މިނިސްޓްރީން ލިޔުމުން ނައީމަށް އިންޒާރު ދީފި އެވެ.

މިނިސްޓްރީގެ ޕާމަނަންޓް ސެކްރެޓަރީ (ޕީއެސް) އަޖުވަދު މުސްތަފާ ސޮއިކުރައްވައި ނައީމަށް ފޮނުއްވި އިންޒާރުގެ ލިޔުމުގައި ބުނެފައިވަނީ ގުޅީފަޅަށް ކޮމާޝަލް ޕޯޓު ބަދަލުކުރުމުގެ މަސައްކަތަށް، އެ ރަށުގެ ފަޅުން ބޮޑު ސަރަހައްދެއް ހިއްކަން ފެށުމާ އެކު ތިމާވެށްޓަށް ނޭދެވޭ އަސަރުކުރަމުންދާ ކަމުގެ ޝަކުވާ ލިބެމުންދިއުމާ ގުޅިގެން ވަޓްސްއަޕް ގުރޫޕެއް މެދުވެރިކޮށް ޑރ. ނަސީރު، ނައީމަށް މިދިޔަ ބުރާސްފަތި ދުވަހުގެ ރޭ ދެއްވި އިރުޝާދަށް އަމަލު ނުކުރައްވާނެ ކަމަށް ނައީމް ވިދާޅުވެފައިވާ ކަމަށެވެ.

ސްޓޭޓް މިނިސްޓަރު ނަސީރަކީ އީޕީއޭގެ ކަންކަން ހިނގާ ނުހިނގާގޮތް ބަލައި އީޕީއޭގެ ވެރިންނަށް އިރުޝާދާއި ލަފާދިނުމަށް މިނިސްޓަރު ޑރ. ހުސައިން ރަޝީދު، ކަނޑައަޅުއްވާފައިވާ ސިޔާސީ އެންމެ އިސް މުވައްޒަފު ކަމަށް ވެސް އެ ލިޔުމުގައި ބުނެފައިވެ އެވެ. އެހެންކަމުން ނަސީރު، ވަކިކަމެއް ވަކިގޮތަށް ކުރުމަށް ލަފާ އެރުވުމުން އެކަމަކީ ގާނޫނާއި ގަވާއިދާ ހިލާފުކަމަކަށް ނުވާ ނަމަ، އެކަން އެގޮތަށް ކުރުމަށް އިންކާރުކުރުމަކީ ނައީމަށް އޮތް އިހުތިޔާރެއް ކަމަށް ގަބޫލު ނުކުރާ ކަމަށް ވެސް ލިޔުމުގައިވެ އެވެ.

ނަސީރުގެ އެންގުމަށް އަމަލު ނުކުރައްވާނެ ކަމަށް ނައީމް ވިދާޅުވިއިރު އެ ގުރޫޕުގައި ޕީއެސް އަޖުވަދާއި ނަސީރުގެ އިތުރުން މިނިސްޓަރު ހުސައިން ރަޝީދާއި އީޕީއޭގެ ޑެޕިއުޓީ ޑިރެކްޓަރު ޖެނެރަލް ޑރ. އިބްރާހީމް މުހައްމަދާއި އީޕީއޭގެ އެސިސްޓެންޓް ޑިރެކްޓަރު މުހައްމަދު ހަމްދާން ޒުހައިރު ވެސް ތިއްބެވިކަމަށް ވެސް ލިޔުމުގައިވެ އެވެ.

"މިއީ އީޕީއޭ ފަދަ ސަރުކާރުގެ މުހިއްމު ރެގިލޭޓަރީ މުއައްސަސާއެއްގެ ޒިންމާދާރު ވެރިއަކަށް ހުރި ފަރާތެއްގެ ކިބައިން ފެނިގެންވާނެ އަމަލެއް ކަމުގައި އަޅުގަނޑު ނުދެކެމެވެ. މިއީ ސިވިލް ސާވިސް ގަވާއިދު 2014 ގެ އިސްލާހީ ފިޔަވަޅު އެޅުމާ ބެހޭ ޗެޕްޓަރުގެ ދަށުން ވަޒީފާގެ ކުށުގެ ދަރަޖަ 2 އަށް ފެތޭ ކުށެކެވެ." އިންޒާރުގެ ލިޔުމުގައިވެ އެވެ.

އެހެންކަމުން، ނައީމްއާ ހާވާލުކޮށްފައިވާ މަސައްކަތްތައް ފަރުވާތެރިކަމާއި ޒިންމާދާރުކަމާ އެކު ކުރުމަށާއި، ވެރިންނަށް އިހުތިރާމް ކުރުމާ އެކު ވެރިން ދޭ ލަފަޔާއި އިރުޝާދު ހެޔޮހިތުން ބަލައިގަތުމަށް ވަނީ އަންގައިފަ އެވެ. އަދި މީގެފަހުން ސިވިލް ސާވިސްގެ ގަވާއިދާއި ކޯޑް އޮފް ކޮންޑަކްޓާއި ހިލާފު ވެއްޖެ ނަމަ އިތުރު އިންޒާރެއް ދިނުމަކާނުލައި ވަޒީފާގެ ފަންތި ދަށްކުރުން ނުވަތަ ވަޒީފާ އަށް ނުކުތުން މަނާކުރުން ނުވަތަ ވަޒީފާ އިން ވަކިކުރުން ފަދަ ފިޔަވަޅެއް އެޅުމުގެ އިހުތިޔާރު ސިވިލް ސާވިސް ކޮމިޝަނަށް ލިބިގެންވާކަން އަންގައި އިންޒާރު ދީފައިވެ އެވެ.

އެކަމާ ގުޅޭގޮތުން "މިހާރު" އިން ގުޅުމުން ނައީމް ވިދާޅުވީ ވަކި އެއްޗެއް ވިދާޅުވާން ބޭނުން ނުވާ ކަމަށެވެ. އެހެންކަމުން ނައީމު އަމަލު ނުކުރާނެ ކަމަށް ވިދާޅުވީ ކޮން ލަފައަކަށް ކަމެއް ނޭނގެ އެވެ.

ޕްލޭނިން މިނިސްޓްރީގެ ޕްރޮޖެކްޓެއްގައި ގުޅީފަޅު ހިއްކަން ފެށުމާ އެކު ވިލިމާލޭ ފަރަށް ބޮޑެތި ގެއްލުންތަކެއް ވާން ވަނީ ފަށައިފަ އެވެ. އެހެންވެ އީޕީއޭން އަންނަނީ އެ މައްސަލަ ބަލަމުންނެވެ.

ރައީސް އަބްދުﷲ ޔާމީންގެ ސަރުކާރުގައި ވެސް އީޕީއޭގެ އެންގުންތަކާއިި ހިލާފަށް ޕްރޮޖެކްޓްތައް ހިންގުމުގެ ސަބަބުން ތިމާވެއްޓަށް ބޮޑެތި ނޭދެވޭ އަސަރުތަކެއް ވަނީ ކޮށްފަ އެވެ. ރައީސް އިބްރާހިމް މުހައްމަދު ސޯލިހް ވަނީ އެފަދަ ކަންކަން ތަކުރާރުވިޔަ ނުދިނުމަށްޓަކައި މިނިސްޓްރީގެ ދަށުން ހިންގާ އީޕީއޭއަކީ މިނިވަން މުއައްސަސާއަކަށް ހައްދަވާނެ ކަމުގެ ވައުދުވެވަޑައިގެންފަ އެވެ. ނަމަވެސް މިހާތަނަށް އެކަން ފެނިފައެއް ނުވެ އެވެ.