ސިއްހީ ކުއްލި ނުރައްކަލުގެ ހާލަތު އިއުލާންކުރަން މަޖިލީހުގެ ރުހުން ހޯދަން ޖެހޭ ގޮތަށް ހަދަނީ

ސިއްހީ ކުއްލި ނުރައްކަލުގެ ހާލަތު އިއުލާނުކުރާތާ 48 ގަޑި އިރުގެ ތެރޭގައި އެކަމަށް ރައްޔިތުންގެ މަޖިލީހުގެ ރުހުުން ހޯދަން ހުށަހަޅަަން ޖެހޭ ގޮތަށް، އާއްމު ސިއްހަތު ރައްކާތެރިކުރުމުގެ ގާނޫނު އިސްލާހުކުރަން ރައްޔިތުންގެ މަޖިލީހަށް މިއަދު ހުށަހަޅައިފި އެވެ.

ފުވައްމުލަކު އުތުރު ދާއިރާގެ އެމްޑީޕީ މެމްބަރު މުހައްމަދު ރަޝީދު ހުށަހެޅުއްވި ބިލުގައި އޮތީ އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކުރުމުގެ ގަރާރު، ރައްޔިތުންގެ މަޖިލީހުން ފާސްކޮށްގެން އުވައި ވެސް ލެވޭ ގޮތަށެވެ. މަޖިލީހުގެ މިއަދުގެ ޖަލްސާގައި އެ ބިލްގެ ފުރަތަމަ ކިއުން އިއްވި އެވެ.

މުހައްމަދު ރަޝީދު ހުށަހެޅުއްވި ބިލްގައިވާ ގޮތުން އެ ބިލް ފާސްްވެ ގާނޫނަކަށް ވެއްޖެ ނަމަ މިހާރު އިއުލާނުކޮށްފައިވާ ސިއްހީ ކުއްލި ނުރައްކަލުގެ ހާލަތާ މެދުގައި ވެސް އަމަލުކުރަން ޖެހޭނީ ބިލްގައިވާ ގޮތަށެވެ. ރާއްޖޭގައި މިހާރު އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާނުކޮށްފައި އޮތީ މިހައިތަނަށް ވެކްސިނެއް ހޯދިފައި ނުވާ ކޮވިޑް-19 ފެތުރޭތީ އެވެ.

މަޖިލީހަށް ނަގަން ހުށަހަޅާފައިވާ ބާރުތައް

- ގަރާރުގެ ވަކި ބައެއް ނުވަތަ ގަރާރު އެކުގައި ފާސްކުރުން

- ގަރާރުގެ މުއްދަތު އިތުރުކުރުމާއި ނުކުރުން ( އެންމެ ދިގުވެގެން 30 ދުވަހަށް އިތުރު ކުރެވޭ ގޮތަށް)

- ގަރާރު ބާތިލުކުރުން

- ގަރާރަށް ބަދަލު ގެނައުން

ބިލުގައިވާ ގޮތަށް ގާނޫނު ބަދަލުކޮށްފި ނަމަ ސިއްހީ ކުއްލި ނުރައްކަލުގެ ހާލަތު އިއުލާނު ކުރުމަށް ފަހު، އެ ހާލަތުގެ މުއްދަތު އިތުރުކުރަން ޑިރެކްޓާ ޖެނެރަލް އޮފް ޕަބްލިކް ހެލްތު ނިންމެވިޔަސް އެކަން މަޖިލީހަށް ހުށަހަޅަން ޖެހޭނެ އެވެ. ކުއްލި ނުރައްކަލުގެ ހާލަތު އިއުލާނުކޮށް އެ ހާލަތުގައި ދައުލަތުން ހަރަދުކުރި ގޮތުގެ ތަފްސީލް ހިމެނޭ އޮޑިޓް ރިޕޯޓެއް ރައީސަށާއި ރައްޔިތުންގެ މަޖިލީހަށް އަދި އޮޑިޓާ ޖެނެރަލް އަށް ހުށަހަޅަން ޖެހޭ ގޮތަށް ހަދަން ވެސް އެ ބިލުގައި ވެ އެވެ.

އާއްމު ސިއްހަތު ރައްކާތެރިކުރުމުގެ ގާނޫނުގައި މިހާރު އޮތް ގޮތުން އާއްމު ސިއްހަތުގެ ކުއްލި ނުރައްކަލުގެ ހާލަތު ހެލްތު މިނިސްޓަރު އިއުލާނު ކުރެއްވިޔަސް ރައްޔިތުންގެ މަޖިލީހުގެ ރުހުން ހޯދާކަށް ނުޖެހެ އެވެ. އެކަމަކު އެ ހާލަތު ރައީސް އިއުލާނު ކުރައްވައިިފި ނަމަ ރުހުން ހޯދަން ޖެހެ އެވެ.