ކުންފުނިތަކުގެ އަހަރީ ފީ ދެއްކުން ޑިސެމްބަރުގެ ނިޔަލަށް ފަސްކޮށްދީފި

ކުންފުނިތަކުގެ މި އަހަރުގެ އަހަރީ ފީ ޑިސެމްބަރު 31 ގެ ކުރިން ދެއްކުމުގެ ފުރުސަތު އިކޮނޮމިކް މިނިސްޓްރީން ހަމަޖައްސައިދީފި އެވެ.

އެ މިނިސްޓްރީން އިއްޔެ ނެރުނު އިއުލާނެއްްގައި ބުނީ، އަހަރީ ފީ ޑިސެމްބަރު މަހުގެ ނިޔަލަށް އެއްވެސް ޖޫރިމަނާއަކާ ނުލައި މީރާ އިން ބަލައިގަންނާނެ ކަމަށެވެ.

ކޮންމެ އަހަރެއްގެ ވެސް އަހަރީ ފީ މާޗު މަހު ދައްކަން ޖެހެ އެވެ. އެ މުއްދަތުގައި ފީ ނުދައްކައިފި ނަމަ ކުންފުނީގެ މަސައްކަތްތައް ހުއްޓުވުމުގެ ބާރު ރެޖިސްޓްރާ އޮފް ކޮމްޕެނީސް އަށް ލިބިގެން ވެ އެވެ. ނަމަވެސް މި އަހަރުގެ ފީ ދައްކަން ޖެހޭ މުއްދަތު އިތުރު ކޮށްދިނީ، ކޮވިޑް-19އާ ގުޅިގެން ކުންފުނިތަކަށް ދިމާވެފައިވާ މާލީ ގޮންޖެހުންތަކުގެ ސަބަބުން ކަމަށް ބެލެވެ އެވެ.

އަހަރީ ފީ ދެއްކުމުގެ ގާނޫނަށް ގެނައި ބަދަލާއެކު، މާޗު މަހު ފީ ނުދައްކާ ކުންފުނިތަކުގެ މަސައްކަތް ހުއްޓުވުމުގެ ބާރު ރެޖިސްޓްރާ އަށް ލިބޭއިރު، މެއި މަހުގެ ކުރިން ފީ ނުދައްކައިފި ނަމަ ކުންފުނި އުވައިލުމުގެ ބާރު ވެސް އޭނާ އަށް ލިބެ އެވެ. މި އުސޫލުން ގިނަ ކުންފުނިތަކެއް މިހާރު ވެސް ވަނީ އުވާލައިފަ އެވެ.

އަމިއްލަ ކުންފުނިތަކުގެ އަހަރީ ފީއަކީ 2،000ރ. އެވެ. ޕަބްލިކް ކުންފުނިތަކުން އަހަރީ ފީގެ ގޮތުގައި 10،000ރ. ދައްކަން ޖެހެ އެވެ.

މާޗް މަހުގެ ފަހުން އޭޕްރީލް މަހު އަހަރީ ފީ ދައްކާ ނަމަ ޖޫރިމަނާއަށް 1،000ރ. އަރަ އެވެ. އޭޕްރީލްގެ ފަހުން ޖޫރިމަނާއަކީ 2،500ރ. އެވެ.

އަލަށް ކުންފުންޏެއް ރަޖިސްޓަރީ ކުރާ އިރު ކުންފުނީގެ ފުރަތަމަ ފީ ދައްކަން ޖެހެނީ އިކޮނޮމިކް މިނިސްޓްރީއަށެވެ. އެއަށް ފަހު ކޮންމެ އަހަރަކު ވެސް އެ ފީ ދައްކަން ޖެހޭނީ މީރާ މެދުވެރިކޮށެވެ.