ކުޅިވަރުގެ ފުރުސަތުތައް ހޯދައިދެއްވަން މިނިސްޓަރު ޖަޕާނަށް ވަޑައިގަންނަވަނީ

ކުޅިވަރުގެ އެކި ފުރުސަތުތަކާއި އެހީތައް ހޯދައިދިނުމަށް ޖަޕާނުގައި ބާއްވާ ދުނިޔޭގެ ކުޅިވަރުގެ މިނިސްޓަރުންގެ ބައްދަލުވުމަށް ޔޫތުު މިނިސްޓަރު އިރުތިޝާމް އާދަމް މާދަމާ ފުރައިވަޑައިގަންނަވަން ނިންމަވައިފި އެވެ.

މިއަދާއި މާދަމާ ޖަޕާނުގެ ޓޯކިޔޯގައި އޮންނަ މި ބައްދަލުވުމާ ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން މިނިސްޓަރު މިއަދު ވިދާޅުވީ މި ބައްދަލުވުމުގައި ދުނިޔޭގެ 36 ގައުމަކުން ބައިވެރި ވާއިރު، އެކި ގައުމުތަކުގެ މިނިސްޓަރުންނާ ވާހަކަ ދައްކަވައިގެން ކުޅިވަރުން ރާއްޖެ އަށް ފުރުސަތުތައް ހޯދައިދިނުމަށް މަސައްކަތް ކުރާނެ ކަމަށެވެ.

"މި ބައްދަލުވުމުގައި ޖަޕާނުގެ އަދި އެހެން ގައުމުތަކުގެ މިނިސްޓަރުންނާ ވެސް ބައްދަލުވުމުގެ ފުރުސަތު ލިބޭނެ. އެހެންވެ، އެ މިނިސްޓަރުންނާ ވާހަކަ ދައްކައިގެން، ރާއްޖޭގެ ޒުވާނުންނަށް ފުރުސަތުތައް ހޯދައިދީ، ޒުވާނުން ޓްރެއިން ކުރުމާ ގުޅޭ ގޮތުން މަޝްވަރާތައް ކުރާނަން،" އިރުތިޝާމް ވިދާޅުވި އެވެ.

އޭނާ ވިދާޅުވީ ޖަޕާނުގެ މިނިސްޓަރުންނާ ވެސް ބައްދަލުކޮށް، ކުޅިވަރާއި ސަގާފަތް ކުރިއެރުވުމާ ގުޅޭ ގޮތުން ވާހަކަ ދައްކައި، ސަރުކާރުން މިހާރު އިސްކަންދޭ ކަންކަން ހުށަހަޅާނެ ކަމަށެވެ. އަދި ދެ ގައުމުގެ ކުޅިވަރު ކައުންސިލްތަކުން ކުރިއަށް ގެންދެވިދާނެ ކަންކަން ވެސް ކަނޑައަޅާނެ ކަމަށް ވިދާޅުވި އެވެ.

އިރުތިޝާމް ވިދާޅުވީ ރާއްޖޭގެ ސްކޫލުތަކުގައި ވެސް މިހާރު ވަރަށް ހުނަރުވެރި އެތުލީޓުން އެބަތިބި ކަމަށާއި އެ މިނިސްޓްރީގެ މަގްސަދަކީ އެޑިއުކޭޝަން މިނިސްޓްރީއާ ގުޅިގެން އެ ކުދިން އިތުރަށް ތަމްރީނު ކުރުން ކަމަށެވެ. އަދި ސަރުކާރާއި ކުޅިވަރު އެސޯސިއޭޝަންތަކާ އޮތް ގުޅުން މިހާރަށް ވުރެ ބަދަހިކޮށް، އެ އެސޯސިއޭޝަންތަކުގެ ޕްރޮގްރާމްތަކުގައި އެ ކުދިން ބައިވެރިކުރުމަށް އިސްކަން ދޭ ކަމަށް ވެސް އޭނާ ވިދާޅުވި އެވެ.

ރާއްޖޭގައި ހުންނަވާ ޖަޕާނުގެ ސަފީރު ވެސް ބައިވެރިވެ ވަޑައިގެންނެވި އެ ބައްދަލުވުމުގައި އިރުތިޝާމް ވިދާޅުވީ ކުޅިވަރުގެ ރޮނގުން މީގެ ކުރިން ވެސް ޖަޕާނުގެ ބޮޑެތި އެހީތައް ރާއްޖެ އަށް ލިބިފައިވާ ކަމަށެވެ.