ފުލުހުންގެ އިލްތިމާސް: އެޗްޕީއޭގެ އެންގުމާ ހިލާފަށް އެއްވުންތައް ނުބާއްވާތި

މާލޭގައި އެއްވުންތައް ބޭއްވުމަށް ރާވަމުންދާ ކަމުގެ މައުލޫމާތު ލިބިފައިވާ ކަމަށާއި އެކަމަކު ސިއްހީ ކުއްލި ނުރައްކަލުގެ ހާލަތު އިއުލާންކޮށްފައިވާ އިރު، ހެލްތު ޕްރޮޓެކްޝަން އެޖެންސީގެ އެންގުންތަކާ ހިލާފަށް އެ ފަދަ އެއްވުންތައް ނުބޭއްވުމަށް ފުލުހުން އިލްތިމާސްކޮށްފި އެވެ.

މާލީ ހާލަތު ދަށްވެފައިވާ ދުވަސްވަރެއްގައި ރައްޔިތުންގެ މަޖިލީހުގެ މެމްބަރުންނަށް އެކަށީގެންވާ މަސައްކަތް ނުކުރެއްވޭ ކަމަށް ބުނެ އަންނަ ހޯމަ ދުވަހު މަޖިލީހުގެ އިދާރާ ކައިރީގައި މުޒާހަރާ ކުރަން، ސިޔާސީ ހަރަކާތް ހިންގާ "ނަވާނަވައި"ން ވަނީ ނިންމައިފަ އެވެ.

އެ މީހުންގެ ޝަކުވާ އަކީ މާލީ އެހީ އާންމުންނަށް ފޯރުކޮށްދިނުމަށް އެކަށީގެންވާ މަސައްކަތެއް ނުކުރެވި އަދި ކުލި ކޮންޓްރޯލް ކުރުމާއި ތިމާވެށި ހިމާޔަތްކުރަން އެކަށީގެންވާ ފިޔަވަޅުތަކެއް މެމްބަރުން ނޭޅުމެވެ.

ފުލުހުން މިއަދު އާއްމު ކުރި ލިއުމެއްގައި ބުނީ ސިއްހީ ކުއްލި ނުރައްކަލުގެ ހާލަތު އިއުލާންކޮށްފައިވާއިރު އަދި ލޮކްޑައުންގެ ހާލަތަށް ލުއި ދިނުމުގެ ދެ ވަނަ މަރުހަލާގައި ވެސް އާއްމު ތަންތަނުގައި ވެސް އެއްވެ އުޅެވޭނީ އެއް ފަހަރާ ތިން މީހުންނަށް ވުރެ ގިނަ ނުވާ ގޮތަށް ކަމަށެވެ. އެކަމަކު އެޗްޕީއޭގެ އެ އެންގުމާ ހިލާފަށް ބައެއް ފަރާތްތަކުން އެއްވުންތައް ރާވަން އުޅޭކަމުގެ މައުލޫމާތު ލިބިފައިވާ ކަމަށް ބުނެފައި ވެ އެވެ.

ފުލުހުން ވަނީ މި ހާލަތުގައި އެޗްޕީއޭގެ އެންގުންތަކާ ހިލާފަށް އެއް ނުވުމަށް ނަސޭހަތްތެރިވެފަ އެވެ. އަދި ރައްޔިތުންގެ ރައްކާތެރިކަން ކުރިއަށް ނެރެން އިރުޝާދު ދިނެވެ.

ނަވާނަވައިން ވަނީ މުޒާހަރާ ކުރާއިރު އެންމެން މާސްކް އެޅުމަށް އެދިފަ އެވެ. އެކަމަކު މުޒާހަރާ ކުރިއަށް ގެންދާނީ ކިހިނެއް ކަމެއް އެތަނަކުން ނުބުނެ އެވެ.