ކޮވިޑް-19 ޖެހިގެން 13 ވަނަ މީހާ މަރުވެއްޖެ

ކޮވިޑް-19 ޖެހިގެން 13 ވަނަ މީހަކު ރާއްޖެ އިން މިއަދު މަރުވެއްޖެ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިއަދު މަރުވެފައި ވަނީ 70 އަހަރުގެ ދިވެހި އަންހެނެއް ކަމަށެވެ. އެ މީހާ މިއަދު މެންދުރު 1 ޖެހި އިރު އައިޖީއެމްއެޗަށް ގެންދިޔަ އިރު ވެސް ވަނީ މަރުވެފަ އެވެ. އެ މީހާ ކޮވިޑް-19 އަށް ޕޮޒިޓިވްކަން އެނގުނީ މަރުވި ފަހުން ޓެސްޓް ކުރުމުންނެވެ.

ރާއްޖެއިން މިހާތަނަށް ވަނީ ހަތް ދިވެހިންނާއި ހަ ބިދޭސީން ކޮވިޑް-19 ޖެހިގެން މަރުވެފަ އެވެ. ބިދޭސީންގެ ތެރޭގައި ހިމެނެނީ ބަންގްލަދޭޝްގެ ފަސް މީހުންނާއި ފިލިޕީންސް މީހެކެވެ.

ރާއްޖެއިން މިހާތަނަށް ވަނީ ކޮވިޑް-19 އަށް 2،502 މީހުން ޕޮޒިޓިވްވެފަ އެވެ. އޭގެ ތެރޭން 2،158 މީހުން ވަނީ ބަލިން ރަނގަޅުވެފަ އެވެ. ފަރުވާދެމުން މިހާރު ދަނީ 326 މީހުންނަށެވެ. އައިސޮލޭޝަނުގައި 273 މީހުން ތިބި އިރު ކަރަންޓީނުގައި 107 މީހުން އެބަތިއްބެވެ.