އުރީދޫގެ މުވައްޒަފުން ގޭގައި ތިބެގެން މަސައްކަތް ކުރާ ގޮތަށް ހަމަޖައްސައިފި

ކޮވިޑް-19 އާ ގުޅިގެން ކުރިމަތިވި ހާލަތުގެ ސަބަބުން އުރީދޫގެ ހުރިހާ މުވައްޒަފުން މި އަހަރު ނިމެންދެން ގޭގައި ތިބެގެން މަސައްކަތް ކުރަން ނިންމައިފި އެވެ.

އުރީދޫގެ މި ނިންމުމުގެ ބޭނުމަކީ ޑިޖިޓަލް ވަސީލަތްތައް އެންމެ ފުރިހަމަ އަށް ބޭނުން ކުރެވޭނެ މަގު ތަނަސްކޮށްދީ މަސައްކަތުގެ މާހައުލުގައި އެފަދަ ސަގާފަތެއް ގާއިމް ކުރުމެވެ. އުރީދޫން ބުނީ މިއަހަރު ނިމެންދެން ހުރިހާ މުވައްޒަފުން ވެސް މަސައްކަތް ކުރާނީ ގޭގައި ތިބެގެން ކަމަށެވެ.

އުރީދު އަކީ ގޭގައި ތިބެގެން މަސައްކަތް ކުރުމަށް މިގޮތަށް ނިންމި، މި ސަރަހައްދުގެ ވެސް ފުރަތަމަ ކުންފުންޏެވެ. ގޭގައި ތިބެގެން މަސައްކަތް ކުރުމުގައި ވީހާ ވެސް ބޮޑަށް ފްލެކްސިބަލް ވަގުތުތަކުގައި މުވައްޒަފުންނަށް މަސައްކަތް ކުރެވޭނެ އިންތިޒާމުތައް ވަނީ ހަމަޖައްސައިދީފަ އެވެ.

މުއާސަލާތީ ހިދުމަތް ފޯރުކޮށްދޭ ކުންފުންޏެއްގެ ހައިސިއްޔަތުން މިފަދަ މުހިއްމު ނިންމުމެއް ނިންމުމުގެ ސަބަބުން ކުންފުނީގެ މަސައްކަތްތަކާއި ހިދުމަތްތަކަށް އިތުރު ކުރިއެރުން ލިބޭނެ ކަމަށް އުރީދޫން ބުނެ އެވެ.

އުރީދޫގެ ޗީފް އެގްޒެކެޓިވް އޮފިސާ ޝެއިހް ސައުދު ބިން ނަސީރު އަލް ތާނީ ވިދާޅުވީ، ކޮވިޑް-19 އާ ގުޅިގެން މަސައްކަތްތައް ކުރުމުގައި އަދި ދިރިއުޅުމުގައި ޑިޖިޓަލް ވަސީލަތްތައް ބޭނުން ކުރުން އިތުރު ހަރުފަތަކަށް ޖެހިލައިފާވާ ކަމަށެވެ.

"މިއީ ހިދުމަތްތައް ދިނުމުގައި ޑިޖިޓަލް ވަސީލަތްތަކަށް ބަރޯސާވެ، އެފަދަ ސަގާފަތެއް ތައާރަފު ކުރުމަށް ލިބުނު ރަނުގެ ފުރުސަތެއް. މިއާ އެކު ކުންފުނިން މިހާރު ކުރާ މަސައްކަތްތަކަށް ވެސް ވަރަށް ބޮޑު ބަދަލެއް އަންނާނެ،" އޭނާ ވިދާޅުވި އެވެ.

މިއީ ގައިދުރު ކުރުމުގެ މިންގަނޑާއި ހިދުމަތްތައް ދިނުމުގައި ރައްކާތެރި މާހައުލެއް ގާއިމް ކުރުމަށްޓަކައި އުރީދޫން ނިންމި ނިންމުމެކެވެ.

އުރީދޫން ދޭ ހިދުމަތްތައް ޑިޖިޓަލް ޕްލެޓްފޯމުތައް މެދުވެރިކޮށް ދޭ އިރު މިހާރަށް ވުރެ ހިދުމަތުގެ ފެންވަރު ރަނގަޅު ކުރުމަށް މުހިއްމު ގިނަ މަސައްކަތްތަކެއް ކޮށްފައިވާ ކަމަށް އެ ކުންފުނިން ބުނެ އެވެ. އަދި ކުރިއަށް އޮތްތަނުގައި ވެސް ކަސްޓަމަރުންނަށް ދޭ ހިދުމަތްތައް ފުރިހަމަ ކުރާނެ ކަމަށް އެކުންފުނިން ބުނެ އެވެ.

ގޭގާއި ތިބެގެން އުރީދޫގެ މުވައްޒަފުން އެންމެ ފުރަތަމަ މަސައްކަތް ކުރަން ފެށީ ކޮވިޑް-19 އާ ގުޅިގެން ލޮކްޑައުންގެ ހާލަތަކަށް މާލެ އާއި ހިސާބުން މިދިޔަ މާޗް މަހު އެވެ. އެއަށް ފަހު އުރީދޫގެ ހުރިހާ ހިދުމަތްތަކެއް ހެން އޮންލައިންކޮށް ދެވޭނެ އިންތިޒާމުތައް ވަނީ ހަމަޖައްސައިފަ އެވެ.