ކޮވިޑް-19: 92 އަހަރުގެ މީހާގެ ދެ ވަނަ ޓެސްޓް ނެގެޓިވް

ނ. ކުޑަފަރިން މާލެ ގެނައި އުމުރުން 92 އަހަރުގެ މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް މި މަހު ކުރީކޮޅު ދެއްކި ނަމަވެސް ފަހުން ނެގި ސާމްޕަލްތަކުގެ ނަތީޖާ ނެގެޓިވް ވެފައިވާ ކަމަށް، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ބުނެފި އެވެ.

ނޫސްވެރިންގެ ބައްދަލުވުމުގައި ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާން ޑރ. ނަޒްލާ ރަފީގު ވިދާޅުވީ ދުވަސްވީ އެ މީހާގެ ދެ ވަނަ ޓެސްޓް ކުރީ ޕޮޒިޓިވްވިތާ ފަސް ދުވަސް ފަހުން ކަމަށެވެ. އެހެންކަމުން ޕޮޒިޓިވްވި ކަމަށް ފުރަތަމަ ލިބުނު ނަތީޖާއަކީ "ފޯލްސް ރިޒަލްޓް" އަކަށް ވުން ނުވަތަ އޭނާ އަކީ އެ ބަލިން ރަނގަޅު ވެފައިވާ މީހަކަށް ވުން ވެސް އެކަށީގެންވާ ކަމަށް ނަޒްލާ ވިދާޅުވި އެވެ.

"ޑަބަލް ނެގެޓިވް ރިޒަލްޓް މިހާރު ލިބިފައި ވަނީ. ނެގެޓިވް ރިޒަލްޓް އައުމާ އެއްކޮށް ދެން އެ ފަރާތަށް އިތުރަށް ބޭނުންވާ ސިއްހީ ފަރުވާ ދިނުމަށް އައިޖީއެމްއެޗްއަށް ޝިފްޓް ކުރެވޭނެ ކަމަށް އަޅުގަނޑުމެންނަށް މައުލޫމާތު ލިބިފައި ވަނީ،" ނަޒްލާ ވިދާޅުވި އެވެ.

އެ މީހާއަކީ ބަލިޖެހި ރަނގަޅުވެފައިވާ މީހަކަށް ވުމުގެ ފުރުސަތު އޮތުމުން އޭނާއާ ކޮންޓެކްޓްވި މީހުންނާ މެދު އަމަލު ކުރަމުން އަންނަނީ ޕޮޒިޓިވްވި މީހެއްގެ ކޮންޓެކްޓާއާ މެދު އަމަލު ކުރާ ގޮތަށް ކަމަށް ވެސް ނަޒްލާ ވިދާޅުވި އެވެ.

"އެ މީހުން ކަރަންޓީން ޕީރިއަޑުގައި ކަރަންޓީން ކޮށްފައި އަދި ކަރަންޓީންގެ މުއްދަތު ހަމަވުމުން ޓެސްޓް ކޮށްފައި ދޫކުރާގޮތަށް މި ވަގުތު ހަމަޖެހިފައި އޮތީ."

އުމުރުން 92 އަހަރުގެ މީހާ ކޮވިޑް-19 އަށް ޕޮޒިޓިވްވުމާ ގުޅިގެން، ކުޑަފަރީން 30 މީހަކާއި އެ އަތޮޅު މަނަދޫން 13 މީހަކު ވަނީ ކަރަންޓީން ކޮށްފަ އެވެ.

އެ މީހާ މާލެ ގެނައީ ވެއްޓި ފަޔަށް ލިބުނު އަނިޔާއަކަށް އިތުރު ފަރުވާ ދިނުމަށެވެ. އެކަމަކު، އޭނާ މާލެ ގެނައުމުގެ ކުރިން މަނަދޫ ހޮސްޕިޓަލުގައި ފަރުވާ ދިނެވެ.

އުމުރުން 92 އަހަރުގެ ކުރީގެ މަޝްހޫރު ކުރެހުންތެރިޔާ ސަރުދާރު ދޮންމަނިކު (ސަރުދާރު ދޮންބެ) ވެސް ވަނީ ކޮވިޑް-19 އިން ރަނގަޅުވެފަ އެވެ. އެއީ އެހާތަނަށް ރާއްޖޭން އެބަލިން ރަނގަޅުވި އެންމެ ދުވަސްވީ މީހާ އެވެ. ކޮވިޑް-19 ގައި ރާއްޖޭން މަރުވި 15 މީހުންގެ ތެރެއިން ގިނަ ދިވެހީންނަކީ އުމުރުން ދުވަސްވީ މީހުންނެވެ.

އެޗްޕީއޭ އިން ބުނީ ވޭތުވެދިޔަ 24 ގަޑިއިރުގެ ތެރޭގައި ޕޮޒިޓިވްވެފައި ވަނީ 44 ދިވެއްސަކާއި ބަންގްލަދޭޝްގެ 14 މީހަކާއި އިންޑިއާގެ އެކަކު ކަމަށެވެ. ރާއްޖެ އިން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 3،103 އަށް އަރައިފަ އެވެ. އޭގެ ތެރެއިން 2،397 މީހުން ވަނީ ރަނގަޅުވެފަ އެވެ.