މާލޭގައި ރެންޑަމް ސާމްޕަލް ނަގަން އަލުން ފަށައިފި

ކޮވިޑް-19 ގެ ކޭސްތައް މަދުވާން ފެށުމާ އެކު މަގުމަތީގެ އެކި ހިސާބުތަކުން ރެންޑަމް ސާމްޕަލް އަލުން ނަގަން ފަށައިފާވާ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ބުނެފި އެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާން ޑރ. ނަޒްލާ ރަފީގް ވިދާޅުވީ، އެކްޓިވް ސަވައިލަންސްގެ މަސައްކަތްތަކާ ކޮންޓެކްޓް ޓްރޭސިންގެ މަސައްކަތް ޕޮޒިޓިވްވާ މީހުންގެ އަދަދު އިތުރުވާތީ މަޑުޖައްސާލުމަށް ފަހު މިހާރު އަލުން ފަށާފައިވާ ކަމަށެވެ.

ޕޮޒިޓިވްވާ މީހުންގެ 80 ޕަސަންޓް މީހުންގެ ކޮންޓެކްޓް ޓްރޭސިން 24 ގަޑިއިރު ތެރޭ ނިިންމަން ޖެހޭ ކަމަށް ޑރ. ނަޒްލާ ވިދާޅުވި އެވެ. އަދި 48 ގަޑިއިރު ތެރޭ ހުރިހާ ކޭސްތަކެއްގެ ކޮންޓެކްޓް ޓްރޭސިން ނިންމަން ޖެހޭނެ ކަމަށް ވެސް އޭނާ ވިދާޅުވި އެވެ.

ޑރ. ނަޒްލާ ވިދާޅުވި ގޮތުގައި ކޮންޓެކްޓް ޓްރޭސިން އާއި އެކްޓިވް ސަވައިލަންސް މަޑުޖައްސައިލުމުން މިހާރު ފެންނަ ގިނަ ކޭސްތައް އެހެން ކޭސްތަކާ ގުޅުމެއް ނެތެވެ. އޭނާ ހިއްސާކުރެއްވި ތަފާސްހިސާބުތަކުން ދައްކާ ގޮތުން 62 ޕަސަންޓް ކޭހަކީ އެ ފަދަ "އަންލިންކް" ކޭސްތަކެވެ.

ފްލޫ ކުލިނިކްތަކުން ނަގާ ސާމްޕަލްތައް ނިސްބަތުން މަދުވެފައިވީ ނަމަވެސް 23 ޕަސެންޓްއާ ހަމައަށް ފްލޫ ކުލިނިކުން ޕޮޒިޓިވް ކޭސްތައް ފެނިފައިވެ އެވެ. ފްލޫ ކުލިނިކުތަކުން ސާމަޕަލް ނަގާ މިންވަރު މަދުވެފައިވަނީ ކާފިއު ގަޑިތަކުގައި ބޭރަށް ނުކުންނަ މީހުންގެ އަދަދު މަދުވުމުން ކަމަށް އެޗްއީއޯސީން ބުނެފައިވެ އެވެ.