ސްވެނިއާ ފިހާރަތަކަށް އެހީ ދިނުމަށް ގޮވާލައި ގަރާރެއް ޖާބިރު ހުށަހަޅައިފި

ޓޫރިސްޓުންނަށް ހާއްސަކޮށްގެން ހިންގަމުން އަންނަ ސްވެނިއާ ފިހާރަތަކަށް މާލީ އެހީ ތެރިކަން ދިނުމަށް ގޮވާލައި ގަރާރެއް، ކާށިދޫ ދާއިރާގެ މެމްބަރު އަބްދުﷲ ޖާބިރު މިއަދު މަޖިލީހަށް ހުށަހަޅުއްވައިފި އެވެ.

ޖާބިރުގެ ގަރާރުގައި ބުނެފައި ވަނީ ސްވެނިއާ ފިހާރަތަކަށް ވަނީ އަނބުރާ އިއާދަކުރެވޭނެ ކަމުގެ އުއްމީދެއް ނެތްފަދަ ލޮޅުމެއް އަރާފައި ކަމަށެވެ.

"މި ހިނގާ ޖުލައި މަހުގެ 15 ވަނަ ދުވަހާ ހަމައަށް، ދިވެހި ރާއްޖޭގެ ބޯޑަރުތައް ވެސް ބަންދުކުރެވިގެން ދިޔަ މުއްދަތުގައި ދިވެހި ރާއްޖޭގެ އިގްތިސާދުގެ އެންމެ މައި އެއް ތަނބު ކަމުގައިވާ ދިވެހި ފަތުރުވެރިކަން އަދި ހާއްސަ ގޮތެއްގައި ޓޫރިސްޓް ޝޮޕްތަކުގެ ވިޔަފާރިއަށް މިވަނީ ކުއްލި ލޮޅުމެއް އައިސް އިނދަޖެހިފަވާ ހާލަތެއްގައި،" ގަރާރުގައިވެ އެވެ.

ޖާބިރު ވިދާޅުވެފައި ވަނީ މި ވިޔަފާރިއަކީ ރާއްޖޭގެ އުފެއްދުންތެރިކަމުގެ ދާއިރާގެ ތެރެއިން ލިޔެލާ ޖެހުމާއި ކުނާ ވިޔުން ފަދަ އަތްތެރި މަސައްކަތްތަކާ ސީދާ ގުޅިފައިވާ ވިޔަފާރިތަކެއް ކަމަށެވެ. މި ވިޔަފާރިތަކަށް އޮތް ޑިމާންޑް އެއްކޮށްހެން ހުއްޓި، ޒަމާނުއްސުރެ މި ވިޔަފާރި ކުރަމުންދާ ފަރާތްތައް ހާލުގައި ޖެހިފައިވާ ކަމަށާއި އޭގެ ސަބަބުން އެ އާއިލާތަކަށް ކާންބޯން ލިބުން ދަތިވާ ހާލަތަށް ކަންކަން ގޮސްފައިވާ ކަމަށް ވެސް ގަރާރުގައި ވިދާޅުވެފައިވެ އެވެ.

"ދިވެހި ފަތުރުވެރިކަމާއި އުފެއްދުންތެރިކަމުގެ ސިނާއަތުގެ ތެރެއިން ހިނގަމުންދާ ކޮލެޖް އިންޑަސްޓްރީއަށް، ސްވެނިއާ ޝޮޕްތަކަށް އެހީތެރިކަން ދިނުމަށް އެންމެ މަދުވެގެން އެއް މިލިއަން ރުފިޔާގެ ލޯނެއް ދިނުމަށް ދިވެހި ސަރުކާރުގެ މައްޗަށް ލާޒިމު ކުރުމަށް ގޮވާލަން،" ގަރާރުގައިވެ އެވެ.

އެ ގަރާރު މިއަދު ހުށަހެޅުއްވި ނަމަވެސް މިއީ ބަންދު ދުވަސްތަކެެއް ކަމުން މަޖިލީހުގެ ޖަލްސާއެއް މި ހަފްތާގައި ނުބާއްވާނެ އެވެ. އެހެން ކަމުން އެ ގަރާރު މަޖިލީހަށް ބަލައިގަތުމާމެދު ގޮތެއް ނިންމާނީ ކޮން ދުވަހަކުން ކަމެއް އަދި ނޭނގެ އެވެ.

ކޮވިޑް-19އާ ގުޅިގެން ވިޔަފާރިތަކަށް ކުރިމަތިވެފައިވާ މާލީ ދަތިތަކަށް އެހީތެރިވުމުގެ ގޮތުން ސަރުކާރުން އަންނަނީ ލޯން ދޫކުރަމުންނެވެ. މިހާތަނަށް ވެސް އެތައް ސަތޭކަ ވިޔަފާރިއަކަށް ލޯން ދީފައިވެ އެވެ.