އަމާންކަން ގާއިމްކުރަން ކޮށްފައިވާ މަސައްކަތްތަކުން އިންޑިއާއަކީ ދުނިޔެއަށް އުއްމީދެއް: ރައީސް

އަމާންކަން ދެމެހެއްޓުމަށް އިންޑިއާއިން ކޮށްފައިވާ މަސައްކަތްތަކަކީ ދުނިޔެއަށް އުއްމީދު ލިބޭ ކަމެއް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

އެ ގައުމުގެ 74 ވަނަ މިނިވަން ދުވަހުގެ ތަހުނިޔާ ފޮނުއްވައި ރައީސް ކުރެއްވި ޓްވީޓުގައި ވިދާޅުވީ އިންޑިއާ އިން ގެންގުޅޭ ޑިމޮކްރެޓިކް އުސޫލުތަކާއެކު ކޮށްފައިވާ މަސައްކަތަކީ އުއްމީދު ލިބޭ ކަމެއް ކަމަށެވެ.

އެމަނިކުފާނު އެހެން ވިދާޅުވިއިރު، ފޮރިން މިނިސްޓަރު އަބްދުﷲ ޝާހިދު އަދި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރާއެކު މިދިޔަ ބުރާސްފަތި ބޭއްވެވި ވީޑިއޯ ކޮންފަރެންސްގައި ވަނީ ރާއްޖެއަށް ބޮޑެތި އެހީތަކެއް ދޭން ނިންމައިފަ އެވެ. އެހީގައި ބަޖެޓު ސަޕޯޓުގެ ގޮތުގައި 250 މިލިއަން ޑޮލަރު (3.8 ބިލިއަން ރުފިޔާ) ލޯނެއް ދިނުމާއި މާލެ އާއި ވިލިމާލެ އާއި ތިލަފުއްޓާއި ގުޅިފަޅު ގުޅުވާލާ ބްރިޖުގެ މަސައްކަތަށް 500 މިލިއަން ޑޮލަރު (7.7 ބިލިއަން ރުފިޔާ) ގެ ޕެކޭޖެއް ދޭން ވަނީ ނިންމައިފަ އެވެ.

އޭގެ ތެރެއިން 400 މިލިއަން ޑޮލަރަކީ ލޯނެވެ. އަނެއް 100 މިލިއަން ޑޮލަރަކީ ހިލޭ އެހީ އެވެ.

މި ވެރިކަން ފެށުމާ އެކު ގާތްގުޅުމެއް ބާއްވަމުން އަންނަނީ ވެސް އިންޑިއާއެވެ. އެގޮތުން ރައީސް އިބްރާހިމް މުހައްމަދު ސޯލިހު ރައީސްކަމުގެ ހުވާކުރެއްވުމަށް ބޭއްވެވި ރަސްމިއްޔާތަށް ވެސް އިންޑިއާގެ ބޮޑުވަޒީރު ނަރެންދްރް މޯދީ ވަޑައިގަތެވެ. އެއީ މޯދީ ރާއްޖެއަށް ކުރެއްވި ފުރަތަމަ ދަތުރުފުޅެވެ. އޭގެ ފަހުން ވެސް މިިދިޔަ އަހަރުގެ ޖޫން މަހުގެ ތެރޭގައި އެމަނިކުފާނު ރާއްޖެ ވަޑައިގެން އެހީގެ އެއްބަސްވުންތަކުގައި ސޮއިކުރެއްވި އެވެ.

އިންޑިއާއިން ރާއްޖެއަށް ވަނީ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީއެއް ދީފަ އެވެ. އެ ޕްކޭޖުގައި ހިމެނޭ އުމްރާނީ ބައެއް މަސައްކަތްތައް މިހާރުވެސް ފަށާފައި ވާއިރު ބައެއް ބޮޑެތި ޕްރޮޖެކްޓްތައް ފަށަން އަންނަނީ ތައްޔާރުވަމުންނެވެ.