ރައީސާއި ނައިބު ރައީސްގެ މުސާރަ ކުޑަކުރި މައްސަލައިގެ އަޑުއެހުންތައް ނިންމާލައި، ހުކުމާ ހަމައަށް

ރައީސާއި ނައިބުު ރައީސްގެ މުސާރަ އާއި އިނާޔަތްތައް ކޮވިޑާ ގުޅިގެން ހަ މަހަށް ކުޑަކުރަން ރައްޔިތުންގެ މަޖިލީހުން ނިންމި ނިންމުން ބާތިލްކުރަން ސުޕްރީމް ކޯޓަށް ހުށަހެޅި މައްސަލާގެ އަޑުއެހުންތައް އެ ކޯޓުން މިއަދު ނިންމާލައިފި އެވެ.

ކޮވިޑް-19 އާ ގުޅިގެން ދައުލަތުގެ ޚަރަދުތައް ކުޑަ ކުރުމުގެ ގޮތުން ރައީސާއި ނައިބު ރައީސާއި ވަޒީރުންނާއި މަޖިލީހުުގެ މެމްބަރުންނާއި މިނިވަން މުއައްސަސާތަކުގެ ވެރިންގެ މުސާރަތައް ހަ މަހަށް ކުޑަކުރި އެވެ. ރައީސާއި ނައިބު ރައީސްގެ މުސާރައަކީ ގާނޫނަކުން ކަނޑައަޅާފައިވާ މުސާރައެއް ކަމަށް ވިޔަސް، އެ ބަދަލު ގެނައީ އެ ގާނޫނު އިސްލާހު ކުރުމެއް ނެތި އެވެ.

މަޖިލީހުގެ އެ ނިންމުން ބާތިލްކުރަން ސިވިލް ކޯޓުގެ ކުރީގެ ގާޒީ މުހައްމަދު ހަލީމް ހުށަހެޅުއްވި މައްސަލާގައި މިއަދު ބޭއްވި އަޑުއެހުމުގައި ފަނޑިޔާރުންގެ ބެންޗުން އިއުލާން ކުރެއްވީ އެ މައްސަލާގެ އަޑުއެހުންތައް ނިމުނީ ކަމަށެވެ. އަދި އިތުރު ކަމެއް ސާފު ކުރަން ނުޖެހޭ ނަމަ ދެން އޮންނާނީ ހުކުމް އިއްވުން ކަމަށް ބެންޗުން އިއުލާން ކުރެއްވި އެވެ.

ދައުވާލިބޭ ފަރާތެއް ނެތް، އެކްސްޕާޓޭ މައްސަލައެއްގެ ގޮތުގައި ކުރިއަށް ގެންދާ އެ މައްސަލާގައި ހަލީމް އެދިވަޑައިގަތީ ރައީސާއި ނައިބު ރައީސާއި ބައެއް މިނިވަން މުއައްސަސާތަކުގެ އިސްވެރިންގެ މުސާރަ ކުޑަކުރީ ގާނޫނާ ޚިލާފަށް ކަމަށް ކަނޑައަޅައި، އެ ނިންމުން ބާތިލްކޮށް ދިނުމަށެވެ.

މިނިވަން މުއައްސަސާތަކުގެ ގޮތުގައި އެ މައްސަލާގައި ހިމަނާފައިވަނީ ހިއުމަން ރައިޓްސް ކޮމިޝަނާއި އިލެކްޝަންސް ކޮމިޝަނާއި ޕްރޮސެކިއުޓާ ޖެނެރަލާއި އެންޓި ކޮރަޕްޝަން ކޮމިޝަން (އޭސީސީ) އާއި ޖުޑީޝަލް ސާވިސް ކޮމިޝަން (ޖޭއެސްސީ) ގެ މެމްބަރުންނާއި އިންފޮމޭޝަން ކޮމިޝަނަރުގެ މުސާރަ އާއި އިނާޔަތްތަކެވެ. އެއީ އެ މަގާމުތަކުގެ ދައުރުގެ ތެރޭގައި މުސާރަ އާއި އިނާޔަތްތައް ކުޑަ ނުކުރެވޭނެ ކަމަށް އެ މަގާމުތަކާބެހޭ ގާނޫނުގައި ބުނެފައިވާތީ އެވެ.

އެ އަޑުއެހުމުގައި ބެންޗުގެ ގިނަ ސުވާލުތަކެއް ހަލީމަށް އަމާޒުވި އެވެ. އެގޮތުން ސުޕްރީމް ކޯޓަށް އަސްލީ އިހްތިސާސް ލިބިގެންވާނީ ގައުމުގެ އާންމު މަސްލަހަތާ ގުޅުންހުރި ދުސްތޫރީ މައްސަލަތައް ކަމަށް ކޯޓުތަކާބެހޭ ގާނޫނުގައި ބުނެފައިވާތީ އެއީ އެފަދަ މައްސަލައަކަށް ވަނީ ކިހިނެއްތޯ އުއްތަމަ ފަނޑިޔާރު އަހުމަދު މުއުތަސިމް އަދުނާން ސުވާލު ކުރެއްވި އެވެ. ޖަވާބުގައި ހަލީމް ވިދާޅުވީ ދައުލަތުގެ ވެރިންގެ މުސާރަތައް ކުއްލި ގޮތަކަށް ކުޑަ ކުރުމަކީ މުޖްތަމައުގެ އާންމު މަސްލަހަތާ ގުޅުންހުރި ކަމެއް ކަމަށެވެ.

އާންމު މަސްލަހަތާ އެކަން ގުޅެނީ ކިހިނެއްތޯ ފަނޑިޔާރުންގެ ބެންޗުން ސުވާލު ކުރެއްވުމުން ހަލީމް ވިދާޅުވީ ގާނޫނު އިސްލާހު ކުރުމެއް ނެތި، އިސް މަގާމުތަކުގެ މުސާރަތައް ކުޑަ ކުރުމުން އެ މަގާމުގައި ތިއްބެވި ބޭފުޅުންގެ ދިރިއުޅުމުގެ ޚަރަދުތައް ހަމަނުޖެހި، ބައެއް ބޭފުޅުންނަށް މާލީ ދަތިތަކާ ކުރިމަތިވެ، އެ ބޭފުޅުންގެ މިނިވަން ކަމަށް ބުރޫ އެރުމުގެ ފުރުސަތު އެބައޮތް ކަމަށެވެ. އެގޮތުން ކުލި ނުދެއްކިގެން ގޭގެ ވެރިފަރާތާ ދެމެދު މައްސަލަތަކެއް ދިމާވެދާނެ ކަމަށް އޭނާ ވިދާޅުވި އެވެ.

އިސް މަގާމުތަކުގެ މުސާރަތަކުގެ އިތުރުން އެހެން ވަޒީފާތަކުގެ މުސާރަތައް ވެސް ކޮވިޑް-19 އާ ގުޅިގެން ކުޑަކުރި ކަން ފާހަގަ ކުރައްވައި، އާންމު މަސްލަހަތު ބޮޑީ ކޮން ކަމަކަށްތޯ ބެންޗުން ސުވާލު ކުރެއްވުމުން ހަލީމް ވިދާޅުވީ އެހެން މަގާމުތަކުގެ މުސާރަ ކުޑަކުރި މައްސަލައަކީ މަޖިލީހާ ބެހޭ ކަމަކަށް ނުވާތީ ދުސްތޫރީ މައްސަލައެއްގެ ގޮތުގައި އެކަން ކޯޓަށް ހުށަހެޅޭނެ ކަމަށް ގަބޫލު ނުކުރައްވާ ކަމަށެވެ.

އެފަދަ ކަމެއް އެއްވެސް ބޭފުޅަކަށް ދިމާވިތޯ އާއި އެފަދަ ބޭފުޅެއްގެ ޝަކުވާއެއް ލިބުނުތޯ އާއި ހަލީމް އެ މައްސަލަ ހުށަހެޅުއްވީ ކީއްވެގެންތޯ ސުވާލު ކުރެއްވުމުން ހަލީމް ވިދާޅުވީ އެފަދަ ޝަކުވާއެއް ލިބިފައިނުވާ ކަމަށެވެ. އެކަމަކު އެފަދަ ކަމެއް ދިމާވުމުގެ ކުރިން އާންމު ފަރުދެއްގެ ހައިސިއްޔަތުން އެކަމަށް ހައްލު ހޯދައި ދިނުމުގެ ގޮތުން މައްސަލަ ހުށަހެޅުއްވީ ކަމަށް ހަލީމް ވިދާޅުވި އެވެ.

ރައީސާއި ނައިބު ރައީސްގެ މުސާރަ އާއި އިނާޔަތްތައް ކަނޑައެޅުމުގެ ގާނޫނު ބުނާގޮތުން ރައީސްގެ މުސާރައަކީ މަހަކު 100،000ރ. އަދި ނައިބު ރައީސްގެ މުސާރައަކީ މަހަކު 75،000ރ. އެވެ. އެކަމަކު އެ ގާނޫނު އިސްލާހު ކުރުމެއް ނެތި މަޖިލީހުން ނިންމީ ރައީސްގެ މުސާރަ 65،000ރ. އަށް އަދި ނައިބު ރައީސްގެ މުސާރަ 48،000ރ. އަށް ހަ މަހަށް ކުޑަ ކުރުމަށެވެ.

އެ މައްސަލަ ބައްލަވަނީ އުއްތަމަ ފަނޑިޔާރު ހިމެނިވަޑައިގަންނަވާ ގޮތަށް ފަސް ފަނޑިޔާރުންގެ ބެެންޗަކުންނެވެ. އެ ބެންޗުގައި ދެން ތިއްބަވަނީ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު މަހާޒް އަލީ ޒާހިރުގެެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.

ގާނޫނުއަސާސީ ބުނާގޮތުން ރައީސާއި ނައިބު ރައީސާއި ވަޒީރުންނާއި މަޖިލިސް މެމްބަރުންނާއި މިނިވަން މުއައްސަސާތަކާއި ފަނޑިޔާރުންގެ މުސާރަ ކަނޑައަޅާނީ މަޖިލީހުންނެވެ. ރައީސާއި ނައިބު ރައީސްގެ މުސާރަ ގާނޫނަކުން ކަނޑައަޅާފައި ވިޔަސް، ދެން ހުރި މަގާމުތަކުގެ މުސާރަ އާއި އިނާޔަތްތައް ކަނޑައަޅަނީ މަޖިލީހުުގެ މާލިއްޔަތު ކޮމެޓީންނެވެ.