ޗައިނާއިން އަންނަ ޓޫރިސްޓުން މަދުވި ނަމަވެސް ސެޕްޓެމްބަރު މަހު ހަތް ޕަސެންޓް އިތުރުވެއްޖެ

މިދިޔަ ސެޕްޓެމްބަރު މަހު ރާއްޖެ އައި ޗައިނާގެ ޓޫރިސްޓުންގެ އަދަދު މަދުވި ނަމަވެސް ޖުމްލަކޮށް ރާއްޖެ އައި ޓޫރިސްޓުންގެ އަދަދު ހަތް ޕަސެންޓް އިތުރުވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިފި އެވެ.

މަރުކަޒީ ބޭންކުން މިއަދު ނެރުނު، މިދިޔަ މަހުގެ އިގްތިސާދީ ރިވިއުގައި ބުނެފައި ވަނީ ސެޕްޓެމްބަރު މަހު ރާއްޖެ އައިސްފައި ވަނީ 101،909 ޓޫރިސްޓުން ކަމަށެވެ. އެކަމަކު އެއީ މިދިޔަ އޯގަސްޓް މަހަށް ވުރެ ނުވަ ޕަސެންޓް ދަށް އަދަދެއް ކަމަށް ރިވިއުގައި ބުނެފައިވެ އެވެ.

ޓޫރިސްޓުންގެ ތަފާސްހިސާބުތައް ޓޫރިޒަމް މިނިސްޓްރީން އާއްމު ނުކުރާތީ މިދިޔަ ސެޕްޓެމްބަރު މަހު ބައެއް ތަފުސީލްތައް ލިބޭ ގޮތެއް ނުވި އެވެ.

އެމްއެމްއޭގެ ރިވިއުގައިވާ ގޮތުން އަހަރުން އަހަރަށް ބަލާއިރު، މިދިޔަ ސެޕްޓެމްބަރު މަހު އައި ޓޫރިސްޓުންގެ އަދަދު ޖުމްލަކޮށް އިތުރުވެފައި ވަނީ ޔޫރަޕާއި މެދުއިރުމަތިންނެވެ. ނަމަވެސް އެއީ ކިހާ މިންވަރެއް ކަމެއް ރިވިއުގައި ނެތެވެ.

ރިވިއުގައިވާ ގޮތުން ރާއްޖޭގައި ޓޫރިސްޓުން ހޭދަކުރި މުއްދަތު ސެޕްޓެމްބަރު މަހު ވަނީ 5.3 ދުވަހަށް ދަށްވެފަ އެވެ. އެކަމަކު އެ މުއްދަތުގައި ޓޫރިސްޓުން ރާއްޖޭގައި ހޭދަކޮށްފައިވާ ރޭގެ އަދަދު ދެ ޕަސެންޓް އިތުރުވެ، ޖުމްލަ އޮކިއުޕަންސީ 64 ޕަސެންޓަށް މައްޗަށް ޖެހިފައިވާ ކަމަށް ރިވިއުގައިވެ އެވެ.

މިދިޔަ މަހު ރާއްޖެ އައި ޓޫރިސްޓުންގެ ތަފާސްހިސާބުތައް ޓޫރިޒަމް މިނިސްޓްރީން އާއްމުނުކުރާތީ އެ މަހު އެންމެ ގިނައިން ޓޫރިސްޓުން އައީ ކޮން ގައުމަކުން ކަމެއް އަދި ޓޫރިޒަމް މާކެޓަށް އައި ބަދަލުތަކުގެ ތަފުސީލެއް އެނގޭ ގޮތެއް ނުވި އެވެ.