މެސީ ޕީއެސްޖީއާ މަޝްވަރާ ނުކުރާކަމަށް ބުނެފި

މެޑްރިޑް (ނޮވެމްބަރު 12) - ބާސެލޯނާގެ ތަރި ލިއޮނަލް މެސީ ފްރާންސްގެ ޕީއެސްޖީއާ މަޝްވަރާކުރާ ކަމަށް ދެކެވޭ ވާހަަކައިގައި ހަގީގަތެއް ނެތް ކަމަށް މެސީގެ އޭޖެންޓް އަދި އޭނާގެ ބައްޕަ ޖޯޖް މެސީ ބުނެފި އެވެ.

މި ފަހަރުގެ ޓްރާންސްފާ މާކެޓްގައި މެސީ ބާސެލޯނާ ދޫކޮށްލަން މަސައްކަތްކުރި ނަމަވެސް ކާމިޔާބެއްނުވި އެވެ. އޭނާ ހޯދަން އެންމެ މަސައްކަތްކުރީ މެންޗެސްޓާ ސިޓީ އާއި އިންޓަ މިލާން އެވެ. މި ސީޒަނުގެ ނިޔަލަށް މެސީ ބާސެލޯނާއާ އެކު ކޮންޓްރެކްޓްގައި ހުރިއިރު، ޖެނުއަރީ މަހު އޭނާ ބޭނުންނަމަ އިހުތިޔާރުކުރާ ޓީމަކާ އެކު ޕްރީ އެގްރީމެންޓެއްގައި ސޮއިކުރެވޭނެ އެވެ.

އީއެސްޕީއެން އިން ދާދި ފަހުން ރިޕޯޓްކުރި ގޮތުގައި މެސީ އަންނަނީ ފްރާންސްގެ ޗެމްޕިއަން ޕީއެސްޖީއާ ގުޅެން އެ ޓީމުގެ ޑިރެކްޓަރު ލިއޮނާޑޯއާ މަޝްވަރާކުރަމުންނެވެ. އެކަމަކު އެ ވާހަކަތައް ރަނގަޅަށް ވައިގައި ނުހިފަނިސް ޖޯޖް މެސީ ވަނީ އެއީ ދޮގު ހަބަރެއް ކަމަށް ބުނެފަ އެވެ.

"ދޮގު ވާހަކަ ފެތުރުން ހުއްޓާލަން ޖެހޭ. މިއީ ފޭކް ހަބަރެއް،" މެސީ އާއި ޕީއެސްޖީ މަޝްވަރާކުރަމުން އަންނަ ކަމަށް ބުނެ ލިޔެފައިވާ ހަބަރެއްގެ ލިންކް ހިމަނާފައި ޖޯޖް މެސީ ކުރި ޓްވީޓެއްގައިވެ އެވެ.

ބާސެލޯނާގެ މީޑިއާ ރިޕޯޓްތައް ބުނާގޮތުން މިހާރު އެންމެ ފުރުސަތު ބޮޑީ މެސީ އެ ކްލަބްގައި މަޑުކުރުމުގެ އެވެ. މެސީ ކްލަބް ދޫކޮށްލަން ބޭނުންވި އެންމެ ބޮޑު ސަބަބަކީ އެ ކްލަބްގެ ހިންގުމުގައި ހުރި މައްސަލަތަކާއި ކުރީގެ ރައީސް ޖޯސެފް ބާޓޮމެއުގެ ލީޑަޝިޕުން ކުޅުންތެރިންނާ މެދު ގެންގުޅޭ އުސޫލުތައް ރަނގަޅުނުވުމެވެ. ބާޓޮމެއު ބާސެލޯނާގެ ރައީސް ކަމުން އިސްތިއުފާ ދީފައިވާއިރު، އަންނަ އަހަރު ފެށުމުގެ ކުރިން އާ ރައީސަކު ހޮވާ އިންތިހާބު ބާއްވަން އަންނަނީ މަސައްކަތްކުރަމުންނެވެ. އިންތިހާބުގައި ވާދަކުރާ ގިނަ ކެންޑިޑޭޓުން ވަނީ މެސީ އެ ޓީމުގައި މަޑުކުރުވަން ބޭނުންވާ ކަމަށް ބުނެފަ އެވެ.