ގާނޫނީ ޒިންމާ އަދާކުރެވޭނެ ބަޖެޓެއް އަންނަ އަހަރަކަށް ނެތް: އެޗްއާރުސީއެމް

ހިއުމަން ރައިޓްސް ކޮމިޝަން (އެޗްއާރުސީއެމް) އަށް ގާނޫނީ ޒިންމާ އަދާކުރެވޭނެ ވަރުގެ އަދަދެއް ދައުލަތުގެ އަންނަ އަހަރުގެ ބަޖެޓެއްގައި ހިމަނާފައި ނެތް ކަމަށް އެ ކޮމިޝަނުން ރައްޔިތުންގެ މަޖިލީހުގެ ބަޖެޓު ކޮމިޓީގައި މިއަދު ބުނެފި އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓްގެ ގޮތުގައި ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހެޅީ 34 ބިލިއަން ރުފިޔާގެ ބަޖެޓެކެވެ. މަޖިލީހުގެ ބަޖެޓް ދިރާސާ ކުރާ ކޮމެޓީން މިހާރު އަންނަނީ ދައުލަތުގެ މުއައްސަސާތަކާ ބައްދަލު ކުރަމުންނެވެ.

މިއަދު ބޭއްވި ބަޖެޓް ކޮމެޓީގައި، އެޗްއާރުސީއެމްގެ މެމްބަރު މުއުމިނާ ވަހީދު ވިދާޅުވީ، އެ ކޮމިޝަނުން އެދުނީ 30 މިލިއަން ރުފިޔާގެ ބަޖެޓަކަށް ކަމަށާއި އެކަމަކު ފިނޭންސް މިނިސްޓްރީން ބޭނުންވީ 24 މިލިއަން ރުފިޔާ އެ ކޮމިޝަނަށް ދިނުމަށް ކަމަށެވެ. އެ ބަޖެޓުން އެ ކޮމިޝަންގެ މުވައްޒަފުންގެ މުސާރަ އާއި އިމާރާތުގެ ކުލި ދެއްކުން ފިޔަވައި، އިތުރު މާ ބޮޑު ޒިންމާއެއް އަދާ ކުރެވޭނެ ކަމަށް ގަބޫލު ނުކުރައްވާ ކަމަށް އޭނާ ވިދާޅުވި އެވެ. އެ ކޮމިޝަނަށް ގާނޫނުތަކުން މަތިކޮށްފައިވާ ޒިންމާތައް އަދާ ކުރާނެ މިންވަރުގެ ބަޖެޓެއް ނެތް ކަމަށް ވެސް ވިދާޅުވި އެވެ.

"އެންމެ ފުރިހަމަ އަށް ނުދެއްވުނު ކަމުގައި ވިޔަސް، މަސައްކަތްތައް ކުރެވޭނެ މިންވަރަށް ފައިސާ ދެއްވަން ވާނެ ކަމަށް އަޅުގަނޑު ގަބޫލު ކުރަނީ. ސައުވީސް މިލިއަނަކީ އަޅުގަނޑުމެން ހަމައެކަނި މީހުންގެ މުސާރަ ދީފައި އިދާރާގައި ރެންޓް ދައްކާފައި ތިބެންވީ. މިއީކީ އަޅުގަނޑު ގަބޫލުކުރާ ގޮތުގައި ކަން ވެގެންވާނެ ގޮތެއް ނޫން،" މުއުމިނާ ވިދާޅުވި އެވެ.

އޭނާ ވިދާޅުވިގޮތުގައި، އެޗްއާރުސީއެމުން މިހާތަނަށް ވެސް ހިންގަމުން ދަނީ އިމާރާތެއް ކުއްޔަށް ހިފައިގެންނެވެ. ސަރުކާރުގެ އިމާރާތަކުން އެ ކޮމިޝަނަށް ޖާގަ ލިބިފައި ނުވާތީ ކުއްޔަށް ބޮޑު ޚަރަދެއް ކުރަން ޖެހޭ ކަމަށް މުއުމިނާ ވިދާޅުވި އެވެ. އެކަމާ ގުޅިގެން ފިނޭންސް މިނިސްޓަރު އިބްރާހިމް އަމީރާއި އައްޑޫ ސިޓީ ކައުންސިލާ ކުރިން މަޝްވަރާ ކުރިޔަސް، އިމާރާތެއް ލިބިފައިނުވާ ކަމަށް ވިދާޅުވި އެވެ.

"ތި ބޭފުޅުން މަސައްކަތް ކުރައްވައިގެން ސަރުކާރުގެ އިމާރާތެއް ހަމަޖައްސައި ދެއްވައިފިއްޔާ އެއީ ވަރަށް ބޮޑު ލުޔެއް ހިއުމަން ރައިޓްސް ކޮމިޝަންގެ ބަޖެޓަށް އަންނާނެ،" މުއުމިނާ ވިދާޅުވި އެވެ.

އޭނާ ވިދާޅުވީ ކޮމިޝަންގެ ޒިންމާ އަދާކުރުމުގައި ވަރަށް ގިނައިން ތަންތަނަށް ޒިޔާރަތްކޮށް، ދިރާސާތައް ހަދަން ޖެހޭ ކަމަށާއި އެކަމަށް ގިނަ ޚަރަދުތަކެއް ހިނގާ ކަމަށެވެ. ހުރިހާ މަސައްކަތްތަކަކީ އޮންލައިންކޮށް ކުރެވޭނެ މަސައްކަތްތަކެއް ނޫން ކަމަށާއި އާ މެމްބަރުން އައްޔަންކުރި ފަހުން އެ ކޮމިޝަންގެ މަސައްކަތްތަކަށް އައި ބަދަލުތައް ފެންނާނެ ކަމަށް ވެސް މުއުމިނާ ވިދާޅުވި އެވެ.

އެ ކޮމެޓީގައި ވާހަކަ ދައްކަވަމުން އިންފޮމޭޝަން ކޮމިޝަނަރު ހުސައިން ފިޔާޒް މޫސާ ވިދާޅުވި ގޮތުގައި، އަންނަ އަހަރުގެ ބަޖެޓްގައި އެ އޮފީހުން "ނޭވާލާނެ ވަރުގެ" ބަޖެޓެއް ވެސް ނެތެވެ. އެ އޮފީހަށް ދިނީ ހަތަރު މިލިއަން ރުފިޔާ ބަޖެޓް ސީލިންއެއް ކަމަށް އޭނާ ވިދާޅުވި އެވެ. އެ މިންވަރަށް ފެއްތުމަށްޓަކައި އެ އޮފީހުގެ ދެ މަގާމެއް އުވާލުމާއި އޮފީސް ހިންގުމުގެ ޚަރަދުތައް ވެސް ވަރަށް ބޮޑަށް އަމިއްލައަށް ކުޑަ ކޮށްފައިވާނެ ކަމަށް ފިޔާޒް ވިދާޅުވި އެވެ. އަދި އެ އޮފީހުން ކުރާ މަސައްކަތްތަކުގެ ސަބަބުން ދައުލަތުގެ އެތައް ފައިސާއެއް ސަލާމަތް ކުރެވޭނެ ކަމަށާއި އެކަމަށް ވެސް ރިއާޔަތް ކޮށްދޭން އޭނާ އެދިވަޑައިގަތެވެ.

"މި ވަގުތުގެ ހާލަތު އެނގޭ. އަޅުގަނޑުގެ ރިކުއެސްޓަކީ ބޮޑުކޮށް ދެންޏާ އިންފޮމޭޝަން ކޮމިޝަނަރުގެ އޮފީހުގެ ބަޖެޓް ވެސް ބޮޑުކޮށް ދެއްވާށޭ ތި ބޭފުޅުން ބޮޑުކޮށް ދެއްވާ ރޭޝިއޯއަކުން،" ފިޔާޒް ވިދާޅުވި އެވެ.

އޭނާ ވިދާޅުވިގޮތުގައި، ކޮރަޕްޝަނުގެ ސަބަބުން ދައުލަތަށް ގެއްލިގެންދާ ފައިސާ މަދު ކުރުމުގައި އެންމެ ބޮޑު ދައުރެއް އަދާކުރަނީ އިންފޮމޭޝަން ކޮމިޝަނަރުގެ އޮފީސް މެދުވެރިކޮށް މައުލޫމާތު އާންމު ކުރަމުން ދިއުމެވެ. އޭނާ މަގާމާ ހަވާލުވެވަޑައިގެންނެވި ފަހުން ގިނަ ބަދަލުތަކެއް ގެނެސްފައިވާނެ ކަމަށް ފިޔާޒް ވިދާޅުވި އެވެ.

ބަޖެޓް ދިރާސާކޮށް، ނިންމުމަށް ފަހު އަންނަ ބުރާސްފަތި ދުވަހު ކޮމިޓީގެ ރިޕޯޓް މަޖިލީހުގެ ތަޅުމަށް ފޮނުވަން ކޮމެޓީން ވަނީ ނިންމައިފަ އެވެ.