އުރީދޫގެ ބްރިގޭޑް، މުވައްޒަފުން މަސައްކަތަށް ހިތްޖައްސައިފި

އޮފީސް އޮފީސްތަކުގެ ތެރެއިން އިވެނީ އެއްކަހަލަ އަޑެކެވެ. ފެންނަނީ ވެސް ހަމަ އެއްކަހަލަ މަންޒަރެކެވެ. ކީބޯޑުގައި ތަޅާ އަޑާއި ބާރު ހިނގުމުގައި ކޮޅުކޮޅުމައްޗަށް ހިނގާ މީހުންނެވެ. އެ މީހަކާ ހަވާލުކުރެވިފައިވާ މަސައްކަތަކައިގެން އަވަދިނެތި އުޅޭ ތަނެވެ. ހެނދުނު 8:00 ގައި އޮފީހަށް ވަތް ގޮތަށް އަދި އެ ތަނުން ބޭރަށް ދާނެ ވަގުތެއް ނުވާ މީހުންނެވެ. ކޮންމެ މީހަކު ވެސް މަސައްކަތް ކުރަމުން ދަނީ ގަޑި އަށް މަސައްކަތް ނިންމާލުމަށް ފަހު އަވަހަށް ގެ އަށް ދެވޭތޯ އެވެ.

އެއީ އާދައިގެ މަތިން މިދިޔަ އަންގާރަ ދުވަހު ހުރިހާ އޮފީހެއްގައިހެން ހިނގަމުން ދިޔަ ކަންތައްތަކެވެ. އެންމެންގެ ވެސް ފޯކަސް ހުރީ މަސައްކަތަށެވެ.

ނަމަވެސް، ރާއްޖޭގެ އެންމެ ބޮޑެތި ކުންފުނިތަކުގެ ތެރޭގައި ހިމެނޭ އުރީދޫގެ މުވައްޒަފުންނަށް އެއީ މުޅިން އެހެން ކަހަލަ ދުވަހެކެވެ. ހެނދުނު ހެނދުނާ އޮފީހަށް ވަދެ، ކޮންމެހެން ނިންމަން ހުރި ކަމެއް ވެއްޖިއްޔާ ނިންމާލުމަށް ފަހު، މެންދުރު އަތަށް އަޅާލުމުން އެންމެންހެން މިސްރާބު ޖެހީ ދަރުބާރުގެއާ ދިމާލަށެވެ. އެ ތަނުން ކުއްޔަށް ނަގާފައިވާ ހޯލަކަށް އެންމެން ޖަމާވަމުން ދިޔައީ ކުޅިވަރު ކުޅޭށެވެ. އެއީ އުރީދޫގެ މުވައްޒަފުންގެ "ގޭމް ޑޭ" އެވެ.

ބަލާ ބެލުމަށް އެއީ މުޅިން އާ ކަމެއް ކަމަށް ހީކުރެވުނު ނަމަވެސް، އުރީދޫގެ މުވައްޒަފުންނަށް އޭގެ އެތައް ދުވަހެއް މިހާރު އަތުވެއްޖެ އެވެ. އެ ގޭމް ޑޭ އަކީ އުރީދޫގެ މުވައްޒަފުންގެ އެންގޭޖްމަންޓް ނުވަތަ މަސައްކަތް ކުރުމަށް ހުންނަ ޝައުގުވެރިކަން މަތީ ފެންވަރެއްގައި ހިފެހެއްޓުމަށް އެ ކުންފުނިން ހިންގާ ހަރަކާތްތަކުގެ ބައެކެވެ.

ގަތަރުގެ އުރީދޫ ގްރޫޕުން ރާއްޖޭގައި ހިންގާ ކުންފުނީގެ މުވައްޒަފުން މަސައްކަތަށް ޝައުގުވެރިކަން އުފެއްދުމަށް ހިންގާ ޕްރޮގްރާމްގެ އެއް ބައި ކަމަށްވާ ބްރިގޭޑް މަސައްކަތް ކުރަނީ މިހެންނެވެ؛ ސިފައިންގެ ތެރޭގައި އޮންނަހެން، މުވައްޒަފުން ތިބެނީ ހަތަރު "ބްރިގޭޑް" އަކަށް ބަހާލައިފަ އެވެ. އެކި ޑިޕާޓްމަންޓްތަކުގެ މުވައްޒަފުން އެއްކޮށް، މަސްހުނިކޮށްގެން އެކުލަވާލާފައިވާ ބްރިގޭޑްތައް ވާދަކުރާ ގޮތަށް ތަފާތު މުބާރާތްތައް، އެކި ދުވަސް މަތިން ބާއްވަ އެވެ. ކެރަމް އާއި ރާޒުވާ އާއި ވީޑިއޯ ގޭމް މުބާރާތްތަކުން ފެށިގެން މަސް ރޭހާއި މުނިފޫހިފިލުވުމާއި ހުނަރު ދައްކާލުމުގެ ހަރަކާތްތައް އޭގެ ތެރޭގައި ހިމެނެ އެވެ. އެ މުބާރާތްތަކުން ވަނަތައް ހޯދާ މުވައްޒަފުންނަށް ހަދިޔާއެއް ލިބެ އެވެ.

"އުރީދޫގައި މަސައްކަތް ކުރާ ހުރިހާ މުވައްޒަފުންނަކީ ވެސް ވަރަށް ޒުވާން ބައެއް. ބްރިގޭޑްސް ކަހަލަ ހަރަކާތްތަކުގައި އެންމެން އެއްކޮށް، އެއް ތަނަކުން ދިމާވެ، މަޖާ ވަގުތުކޮޅެއް ހޭދަކޮށްލުމުގެ ފުރުސަތު ލިބޭ. އޭގެ ސަބަބުން ފުރިހަމަ އަށް މަސައްކަތް ކުރުމަށް މޯޓިވޭޓް ވޭ،" އުރީދޫގައި ރެކްރޫޓްމަންޓް އޮފިސަރެއްގެ ވަޒީފާ އަދާކުރާތާ ދެ އަހަރު ވެފައިވާ އައިމިނަތު ރައްސާން ބުންޏެވެ.

މީގެ އަހަރެއްހާ ދުވަސް ކުރިން ބްރިގޭޑްސް އުފެއްދުމުގެ ކުރިން ވެސް އުރީދޫން މުވައްޒަފުން މަަސައްކަތަށް ޝައުގުވެރިކޮށް، އެކަން ދެމެހެއްޓުމަށް ޑިޕާޓްމަންޓްތަކުގެ މެދުގައި ތަފާތު ގިނަ ހަރަކާތްތަކެއް ހިންގާފައިވެ އެވެ. އެކަން ކުރަނީ، މީގެ 11 އަހަރު ކުރިން ރާއްޖޭގެ މާކެޓަށް އެ ކުންފުނި ވަތް ހިސާބުން ފެށިގެން ވެސް ވަރަށް ވާދަވެރި އިންޑަސްޓްރީއެއްގައި ވިޔަފާރި ކުރާ ކުންފުންޏަކަށް އުރީދޫ ވުމާ އެކު، އެ ކުންފުނީގެ މަސައްކަތުގެ މާހައުލަކީ ވަރަށް ބާރަށް ކުރިއަރަމުން ދާ ތަނަކަށް ވާތީ އެވެ. ދޭތެރެ ދޭތެރެއިން ދަތުރު ގޮސް، އަހަރަކު އެއްފަހަރު ފުޓްސަލް މުބާރާތެއް ބޭއްވުން ފަދަ ގިނަ ހަރަކާތްތަކެއް ހިންގަމުން އައިސްފައިވަނީ އެހެންވެ އެވެ.

އެހެން ނަމަވެސް، ކުރިން އެ ހަރަކާތްތައް ބޭއްވީ ޑިޕާޓްމަންޓްތަކުގެ މެދުގަ އެވެ. ސޭލްސް އެގްޒެކެޓިވްއެއްގެ ގޮތުގައި ތިން އަހަރު އުރީދޫގައި މަސައްކަތްކޮށްފައިވާ ފާތިމަތު ޝަފްނާ އަށް ބްރިގޭޑް ހާއްސަވަނީ ޑިޕާޓްމަންޓްތަކުގެ "ބައުންޑްރީން" ބޭރަށް ނުކުމެ، އެކި ތަންތަނުގައި މަސައްކަތް ކުރާ މީހުން އެއްތަންވެ، ގުޅުން ބަދަހިކުރުމުގެ ފުރުސަތު ލިބޭތީ އެވެ. އޭގެ ސަބަބުން، ކުރިން ހަމައެކަނި ޑިޕާޓްމަންޓްގެ ތެރޭގައި ބަދަހިވަމުން ދިޔަ ގުޅުން، ބްރިގޭޑްތައް އައުމާ އެކު މުޅި ކުންފުންޏަށް ފެތުރިގެން ދިޔައީ އެވެ.

"އޮފީސް ތެރެއިން ނުފެންނަ ސްޓާފުންނާ އެކީ ވަގުތު ހޭދަކޮށް، ގުޅުން ބަދަހިކުރުމުގެ ފުރުސަތު ލިބޭ. އެންމެން އެއްކޮށް މަސައްކަތްކޮށް، ޓީމް ވޯކް ވަރުގަދަވޭ. އިތުރަށް މަސައްކަތް ކުރަން ލިބޭ ހިތްވަރަކަށް ވަނީ،" ޝަފްނާ ބުންޏެވެ.

ބްރިގޭޑްސް ފަދަ މުވައްޒަފުން މޯޓިވޭޓްކުރުމުގެ ހަރަކާތްތަކުގެ އިތުރުން، މުވައްޒަފުންނަށް މަތީ ތައުލީމާއި ހުނަރު ހޯދުމުގެ އިތުރު ފުރުސަތުތައް ފަހިކޮށްދިނުމަށް ވެސް އުރީދޫން ގިނަ މަސައްކަތްތަކެއް ކުރެ އެވެ. އޭގެ ތެރޭގައި، ޑިޕްލޮމާ އާއި ޑިގްރީ އަދި މާސްޓާސް ލެވެލްގެ ކޯސްތަކުގައި މުވައްޒަފުން ބައިވެރިކުރުމާއި ހުނަރު ލިއްބައި ދިނުމުގެ ޕްރޮގްރާމްތަކުގައި ގިނަ މުވައްޒަފުންތަކަކަށް ރާއްޖެ އާއި ރާއްޖެ އިން ބޭރުން ފުރުސަތު ހޯދައިދިނުން ހިމެނެ އެވެ. އެ ގޮތުން، މިހާރު ވެސް އުރީދޫގެ 100 ޕަސެންޓް ސޮޕޮންސަޝިޕްގެ ދަށުން 30 މުވައްޒަފުން މަތީ ތައުލީމު ހާސިލުކުރަމުން ގެންދެ އެވެ.

"އަޅުގަނޑުމެންގެ އަމާޒަކީ ކުރިއަށް އޮތް ތަނުގައި އުރީދޫގެ މުވައްޒަފުންނަށް މަތީ ފެންވަރުގެ ތައުލީމާއި ހުނަރު ލިއްބައިދީ، ވަޒީފާ އަދާކުރުމުގެ ގާބިލިއްޔަތުކަން އިތުރުކޮށްދިނުން،" އުރީދޫގެ ހިއުމަން ރިސޯސަސް ޑިރެކްޓަރު މުހައްމަދު ޝާހިދު ވިދާޅުވި އެވެ.

ކޮންމެ އަހަރަކު ދެ މުވައްޒަފަކާއި އެ މީހުންގެ އާއިލާގެ އެކަކަށް ހައްޖު ދަތުރެއް ވެސް ދޭ އުރީދޫގެ މުވައްޒަފުން މަސައްކަތް ކުރަނީ ހުޅުވާލެވިފައިވާ މާހައުލެއްގަ އެވެ. އެކި މީހުންގެ ސިކުނޑި އަށް އަންނަ މޮޅެތި ހިޔާލުތަކާއި ސްޓްރެޓެޖީތައް އަދި ވިޔަފާރީގެ އެންމެ ފަހުގެ މައުލުމާތު އެކި ޑިޕާޓްމަންޓްތަކާ ހިއްސާކުރުމަށް ހާއްސަ ސާވޭއެއް ގެންގުޅެ އެވެ. މުވައްޒަފުންގެ ކަންކަން ބަލަހައްޓާ އެޗްއާރު ޑިޕާޓްމަންޓުން އެކި ދުވަސްވަރު މުވައްޒަފުން އެއްތަންކޮށް، ނުރަސްމީ ބައްދަލުވުންތައް ބާއްވަ އެވެ. އަދި އެންމެ މަތިން، ސީދާ ސީއީއޯ ވެސް ހުރިހާ ފަންތިއެއްގެ މުވައްޒަފުންނާ އެކު "ކޮފީ އަށް އަރަ" އެވެ. ހުރިހާ ވެސް ބޭނުމަކީ މުވައްޒަފުންގެ ޝަކުވާއެއް ނުވަތަ ހިޔާލެއް ވާނަމަ އެންމެ މައްޗަށް ހިސާބަށް ގެންދިއުމުގެ ފުރުސަތު އެންމެ އާދައިގެ މީހާ އަށް ވެސް ފަހިކޮށްދިނުމެވެ.

އެ ހުރިހާ ޕްރޮގްރާމްތަކެއްގެ ނަތީޖާ ވަރަށް ވެސް ރަނގަޅެވެ. ބައިނަލްއަގުވާމީ ކޮންސަލްޓަންޓުން ލައްވާ ކޮންމެ އަހަރަކު މުޅި އުރީދޫ ގްރޫޕްގެ ހުރިހާ ކުންފުނިތައް ހިމަނައިގެން އެމްޕްލޯއީ އެންގޭޖްމަންޓް ސާވޭތައް ހަދަމުން އަންނަ އިރު، މިހާރު އުރީދޫގެ ރާއްޖޭގެ ކުންފުނީގެ އެމްޕްލޯއީ އެންގޭޖްމަންޓް ސްކޯ އުޅެނީ 90 ޕަސެންޓަށް ވުރެ ވެސް މަތީގަ އެވެ. އެހެންކަމުން، ގްރޫޕްގެ ހުރިހާ ކުންފުނިތަކާ އަޅާބަލާއިރު އެންޕްލޯއީ އެންގޭޖްމަންޓް ސްކޯ އެންމެ މަތީގައި އުޅެނީ ރާއްޖޭގެ ކުންފުނީގަ އެވެ.

"މިއީ ދުނިޔޭގެ ފެންވަރުގައި ވެސް 'ހައި ޕާފޯމިން ކޮމްޕެނީސް'ގެ އެންޕްލޯއީ އެންގޭޖްމަންޓް ސްކޯ ހުންނަ މިންގަނޑު،" ޝާހިދު ފާހަގަކުރެއްވި އެވެ.

އެހެން ނަމަވެސް، އެ ވަރުން އުރީދޫން އަދި ނިންމާލީކީ ނޫނެވެ. މެދު އިރުމައްޗާއި އެފްރިކާގެ ގައުމުތައް އަދި ރާއްޖެ ހިމެނޭ ގޮތަށް ޖުމްލަ 12 ގައުމެއްގައި މުވާސަލާތީ ހިދުމަތް ދޭ އުރީދޫގެ ރާއްޖޭގެ ކުންފުނިން މި ހޯދި ބޮޑު ޝަރަފާ އެކު، އެ ކުންފުނިން މުވައްޒަފުންނަށް ދޭ ޔަގީންކަމެއް އަދި ކުރާ ވަރަށް ބޮޑު އުންމީދެއް ވެސް އެބައޮތެވެ؛

"އަޅުގަނޑުމެންގެ އަމާޒަކީ ކުރިއަށް އޮތް ތަނުގައި އުރީދޫގެ މުވައްޒަފުންނަށް މަތީ ފެންވަރުގެ ތައުލީމާއި ހުނަރު ލިއްބައިދީ، ވަޒީފާ އަދާކުރުމުގެ ގާބިލިއްޔަތު އިތުރުކޮށްދިނުން. އޭގެ އިތުރުން ރާއްޖޭގެ ނިސްބަތުން މުވައްޒަފުންނަށް ދޭ މުސާރަ އާއި އިނާޔަތްތައް އެންމެ މަތީ ފެންވަރެއްގައި ދޭ ކުންފުންޏަކަށް އުރީދޫ ވެގެން ދިއުން. އަޅުގަނޑުމެން މަސައްކަތް ކުރަމުން ދަނީ އުރީދޫ އަކީ ރާއްޖޭގެ އެންމެ މަގްބޫލު އެމްޕްލޯޔާ ބްރޭންޑްގެ މަގާމަށް އުރީދޫ ގެނައުމަށް،" ޝާހިދު ވިދާޅުވި އެވެ.