އުރީދޫ ކަލަންޑަރުން ކުއްޅަވަށްފަލު ރަނިންނާ މި މަހު ޗެޓުކޮށްލެވޭނެ

ރާއްޖޭގެ ފްލޯކު ވާހަކަތަކުގެ ކެރެކްޓާތައް ހިމަނައިގެން އުރީދޫން މި އަހަރަށް ހެދި ކަލަންޑަރުގައި މި މަހަށް ހާއްސަކޮށްފައިވާ އެންމެ ފަހު ކެރެކްޓާ ކުއްޅަވަށްފަލު ރަނިންނާ މިހާރު ޗެޓް ކުރެވޭނެ ކަމަށް އުރީދޫން ބުނެފި އެވެ.

އުރީދޫގެ މިއަހަރުގެ ކަލަންޑަރަކީ އޭގައި ހިމެނޭ ކިއުއާރު ކޯޑު ސްކޭން ކޮށްގެން، އޭއައިގެ އެހީގައި ކެރެކްޓާތަކާ ޗެޓު ކުރެވޭ ފީޗާއާ އެކު ތައާރަފްކުރި ކަލަންޑަރެކެވެ. އެ ކަލަންޑަރު ފަރުމާކޮށްފައި ވަނީ ކޮންމެ މަހަކު ވެސް ޗެޓް ކުރެވޭނެ އާ ކެރެކްޓާއެއް އަންލޮކް ވާ ގޮތަށެވެ. ކޮންމެ މަހަކު ވެސް ޗެޓަށް ތައާރަފްކޮށްފައިވާ ކެރެކްޓާއަކީ އެ މަހަކަށް ހާއްސަކޮށް އިލަސްޓްރޭޓުކޮށްފައިވާ ކެރެކްޓާ އެވެ.

މި ކަލަންޑަރުގައި ހިމެނޭ ކެރެކްޓާތަކާ ޗެޓްކުރުމުގެ ފީޗާ ޑިވެލޮޕް ކުރުމުގައި އެ ކެރެކްޓާއެއްގައި ހިމެނޭ ސިފަތައް ވާހަކަ ދައްކާއިރު އެނގެން ހުންނާނެ ކަމަށް އުރީދޫން ބުންޏެވެ.

އުރީދޫން ބުނީ އެ ކުންފުންޏަކީ ޓެކްނޮލޮޖީގެ އެހީގައި ރާއްޖޭގެ ސަގާފަތާއި ރާއްޖެއާ ގުޅުންހުރި އެކި ކަންތައްތައް ދިރުވުމަށް މަސައްކަތްކުރާ ކުންފުންޏެއް ކަމަށެވެ. އަދި އެ ކުންފުނިން ނެރޭ ކަލަންޑަރުތަކަކީ އެ މަގުސަދު ހާސިލްވާ ގޮތަށް ފަރުމާ ކުރަމުން އަންނަ ކަލަންޑަރުތަކެއް ކަމަށާއި އަމާޒަކީ ތަފާތު ގޮތަކަށް ދިވެހި ސަގާފަތާއި ރާއްޖޭގެ އެކި ކަންތައްތައް ދަސްކުރުމުގެ ފުރުސަތު ފަހިކޮށްދިނުން ކަމަށް ވެސް ބުންޏެވެ.

ފޯކްލޯރަށް ހާއްސަކޮށް އުރީދޫން މިއަހަރަށް ތައްޔާރު ކުރި ކަލަންޑަރުގައި ފޫޅުދިގު ހަންޑި އާއި ސަފަރުކަތްދަ އާއި މާކުންބެ ފަދަ މަޝްހޫރު އެކި ފޯކްލޯރު ކެރެކްޓާތައް ހިމަނާފައިވެ އެވެ. މި މަހުގެ ކެރެކްޓާ އަންލޮކްވުމާ އެކު މިހާރު މި ކަލަންޑަރުން ގެނެސްދިން 12 ކެރެކްޓާއާ ވެސް ޗެޓު ކުރެވޭނެ އެވެ.

އުރީދޫން ނެރުނު ކަލަންޑަރުގެ ކެރެކްޓާތަކާ ޗެޓު ކުރެވޭނީ އޭގައި ހިމެނޭ އެންއެފްސީގައި ފޯނު ޖައްސައިގެން ނުވަތަ ސްކޭންކޮށްގެން ލިބޭ ލިންކަށް ވަދެގެންނެވެ. ކޮންމެ ކެރެކްޓާއަކާ އެކު ކުރާ ޗެޓަކީ ކޮންމެ 24 ގަޑިއިރަކުން ރީސެޓު ވާނެ ޗެޓެކެވެ. އެހެންވެ, އެއް ސުވާލެއް ފަހުން ތަކުރާރު ކުރިޔަސް، ލިބޭ ޖަވާބުތައް ތަފާތުވާނެ އެވެ. އަދި އޭއައިއަށް ވުމުން ކެރެކްޓާއާ ޗެޓުކުރާ ވަރަކަށް އިތުރަށް ކެރެކްޓާތައް ޑިވެލޮޕްވެ, ޗެޓްކުރާ މީހާ ވެސް ދަސްކުރާނެ އެވެ.