އައްޑޫގައި ޑީޓޮކްސް ސެންޓަރެއް ހަދަން ރެއިންބޯއަށް ދީފި

އައްޑޫގައި ޑީޓޮކްސިފިކޭޝަން ސެންޓަރެއް ހަދަން ރެއިންބޯ ކޮންސްޓްރަކްޝަނާ ހަވާލުކޮށްފި

24 ނޮވެމްބަރ 2020

ސ. ހުޅުދޫގައި ޑްރަގް ޑީޓޮކްސިފިކޭޝަން ސެންޓަރެއް ހަދަން ރެއިންބޯ ކޮންސްޓްރަކްޝަނާ ޕްލޭނިން މިނިސްޓްރީން މިއަދު ހަވާލުކޮށްފި އެވެ.

ލަމްޔާ އަބްދުﷲ

ދިވެހިރާއްޖޭގެ އަޑުގެ ސެނަކޯ މާލަމުގައި ބޭއްވި ރަސްމިއްޔާތެއްގައި ނެޝަނަލް ޕްލޭނިން މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓްރީގެ ޑިރެކްޓަ ޖެނެރަލް ފާތިމަތު ޝާނާ ފާރޫގެވެ. ރެއިންބޯ ކޮންސްޓްރަކްޝަންގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރު މާޒިން އިބްރާހިމް ރަފީގެވެ.

މި މަޝްރޫއަށް 15،099،509ރ. ކަނޑައަޅާފައިވާ އިރު، އޭގެ ތެރެއިން 7.9 މިލިއަން ރުފިޔާ އަކީ އިންޑިއާ އިން ރާއްޖެއަށް ދީފައިވާ ހިލޭ އެހީ އެވެ. ބާކީ 7.1 މިލިއަން ރުފިޔާ އަކީ ދިވެހި ސަރުކާރުން ހޭދަ ކުރާ ފައިސާ އެވެ.

Drug Detox Centre in #Hulhudhoo, Addu - contract awarded within 2 weeks of signing of the MoU on 9 Nov. The MVR 8 million ?? grant project will be executed by M/o National Planning, Housing & Infrastructure; will address rehab & reintegration issues related to drug-addiction. pic.twitter.com/Wezx7HSfKs
— India in Maldives (@HCIMaldives) November 24, 2020

އިންޑިއަން ހައި ކޮމިޝަން އިން މިއަދު ކުރި ޓްވީޓެއް

އިންޑިއާ އިން ރާއްޖެއަށް ކަނޑައަޅުއްވާފައިވާ ސަފީރު ސަންޖޭ ސުދީރު މި ރަސްމިއްޔާތުގައި ވިދާޅުވީ މަސްތުވާތަކެތީގެ ވަބާގައި ޖެހިފައިވާ ޒުވާނުނުންގެ މައްސަލަ އަށް ހައްލެއް ހޯދަން ދިވެހި ސަރުކާރުން ގިނަ މަސައްކަތްކުރާ ކަމަށާއި މިއީ ވެސް އެ މަސައްކަތުގެ ބައެއް ކަމަށެވެ.

"މަސްތުވާތަކެތި ބޭނުންކުރާ ކުޑަކުދިންނާއި ޒުވާނުންގެ އަދަދު މިވަނީ ކަންބޮޑުވާ ވަރަށް އިތުރުވެފައި. މިހާރު ވެސް މިފަދަ ހަތަރު ޑީޓޮކްސް ސެންޓަރެއް ރާއްޖޭގައި ހުރި އިރު، މި ވަބާގައި ޖެހޭ ޒުވާނުންނަށް ފަރުވާ ދެވޭނެ އިތުރު ސެންޓަރުތައް ގާއިމްކުރުމަކީ ކުރަން ޖެހޭ ކަމެއް،" ސަންޖޭ ވިދާޅުވި އެވެ.

ޑިޒައިން އެންޑް ކޮންސްޓްރަކްޝަންގެ އުސޫލުން ހަދަން ހަވާލުކުރި މި މަޝްރޫއު ފުރިހަމަކުރަން ރެއިންބޯ ކޮންސްޓްރަކްޝަނަށް ދީފައި ވަނީ ހަ މަސް ދުވަހުގެ މުއްދަތެކެވެ. ނެޝަނަލް ޕްލެނިން މިނިސްޓްރީން ބުނީ 60 އަށް ވުރެ ގިނަ މީހުންނަށް ފަރުވާ ދިނުމުގެ ކެޕޭސިޓީ އެ ސެންޓަރުގައި ހުންނާނެ ކަމަށެވެ. އަދި 30 މީހުން އެ ސެންޓަރުގައި ބައިތިއްބައިގެން ފަރުވާ ދެވޭނެ ކަމަށް ވެސް ބުންޏެވެ.

އެތަނުގައި ޑޮކްޓަރަށް ހާއްސަ ކޮޓަރިއަކާއި ނަރުހުންގެެ ސްޓޭޝަނަކާއި ކައުންސިލަރުންނަށް ހާއްސަ ކޮޓަރިއެއް ވެސް ހަދާނެ އެވެ. އަދި ކްލިނިކަލް އޮފީހަކާއި ފަސް ކޮޓަރީގެ ސިކް ބޭ އެއް ވެސް ހަދަން ނިންމާފައިވާ ކަމަށް ނެޝަނަލް ޕްލޭނިން މިނިސްޓްރީން ބުންޏެވެ.

އިންޑިއާ އިން ރާއްޖެ އަށް ދީފައިވާ 200 މިލިއަން ރުފިޔާގެ ހިލޭ އެހީ ބޭނުންކޮށްގެން ރާއްޖޭގެ އެކި އަތޮޅުތަކުގައި މިހާތަނަށް 30 އަށް ވުރެ ގިނަ މަޝްރޫއު ވަނީ ފަށައިފަ އެވެ. ސ. ހިތަދޫގައި ހަދަމުން އަންނަ ޕޮލިސް އެކަޑަމީ އަކީ ވެސް އިންޑިއާގެ އެހީގައި ހިންގާ މަޝްރޫއެކެވެ.

Comments