އާބަން ގާޑެނިން ޕްރޮގްރާމް އައިލެންޑާސް އިން ފަށައިފި

ކާނާގެ ޔަގީންކަން ކަށަވަރުކުރަން އެގްރިކަލްޗާ މިނިސްޓްރީން ކުރަމުން އަންނަ މަސައްކަތުގައި އައިލެންޑާސް އެޑިއުކޭޝަން އިން ބައިވެރިވެ، ބިލަބޮންގް އިންޓަނޭޝަނަލް ހައި ސްކޫލްގައި އާބަން ގާޑެނިންގެ ޕްރޮގްރާމް މިއަދު ފަށައިފި އެވެ.

އެ ސްކޫލުގައި ބޭއްވި ރަސްމިއްޔާތެއްގައި އައިލެންޑާސް އިން ތައްޔާރު ކުރި އަމަލީ މޮޑެލް އިފްތިތާހު ކޮށްދެއްވީ ދަނޑުވެރިކަމާ ބެހޭ މިނިސްޓަރު ޒަހާ ވަހީދެވެ. އެ މޮޑެލް ތައްޔާރުކޮށްފައި ވަނީ އެގްރިކަލްޗާ މިނިސްޓްރީގެ އިރުޝާދާއި ލަފައާ އެއްގޮތަށް ކަމަށް އައިލެންޑާސް އިން ބުންޏެވެ.

މިއަދުގެ ރަސްމިއްޔާތުގައި މިނިސްޓަރު ޒަހާ ވިދާޅުވީ ދަނޑުވެރިކަމުގެ މަސައްކަތަށް ސްކޫލް ދަރިވަރުން އަހުލުވެރި ކުރުމަކީ މުހިއްމު ކަމެއް ކަމަށެވެ. ކާނާގެ ޔަގީންކަން ކަށަވަރުކުރަން ފަރުދީ ފެންވަރުގައި ވެސް ގިނަ މަސައްކަތްތަކެއް ކުރެވޭނެ ކަމަށް އޭނާ ވިދާޅުވި އެވެ.

މާލޭގައި އާބަން ގާޑެނިން މޮޑެލެއް ހެދުމުގެ މަސައްކަތުގައި ބައިވެރިވާން އައިލެންޑާސް އެޑިއުކޭޝަނުން އެގްރިކަލްޗާ މިނިސްޓްރީއާ އެކު އެއްބަސްވީ މިދިޔަ މަހެވެ. މި މަޝްރޫއުގައި ކެމިކަލް ފަދަ ތަކެތި ބޭނުން ނުކުރާނެ ކަމަށް އައިލެންޑާސް އިން ބުންޏެވެ. ގަސް ކާނާގެ ގޮތުގައި ބޭނުންކުރާނީ އުކާލާ ކާތަކެތިން ބޭނުންކުރާ ކާބޯތަކެތިން އުފައްދާ ގަސްކާނާ އާއި އޯގޭނިކް ތަކެއްޗެވެ. މި މަޝްރޫއުގައި ކުދި ޖާގަތަށް އެންމެ އެކަށީގެންވާ ގޮތަށް ދަނޑުވެރިކަން ކުރަން އިސްކަންދޭނެ އެވެ.

މި މަސައްކަތް ކުރިއަށް ގެންދާނީ އައިލެންޑާސް އިން ފަށާފައިވާ "ބަން އާތު އެކަޑަމީ" ޕްރޮގްރާމާ ގުޅުވައިގެނެވެ.