މުވައްޒަފުންނަށް އަންގަނީ މެނިފެސްޓޯ ތަންފީޒުކުރުމާ ގުޅޭ ޖަލްސާއެއް ކަމަށް!

ޕީޕީއެމްގެ ފަސް ވަނަ އަހަރީ ދުވަސް ފާހަގަކުރަން "އަސްލު" ޖަލްސާގެ ނަމުގައި އެ ޕާޓީގެ މުސްތަޝާރު ރައީސް އަބްދުﷲ ޔާމީންގެ ފެކްޝަނުން ޕްރޮމޯޓް ކުރަމުންދާ ޖަލްސާ އަށް ސަރުކާރުގެ މުވައްޒަފުން ދާން އަންގަނީ އެއީ މެނިފެސްޓޯ ތަންފީޒުކުރުމާ ގުޅޭ ޖަލްސާއެއް ކަމަށް ބުނެ ކަން ހާމަވެއްޖެ އެވެ.

ހާޒިރީ ބަލައި ޖަލްސާ އަށް ނުދާ މުވައްޒަފުންނާ ދޭތެރޭ ފިޔަވަޅު އަޅާނެ ކަން ސަރުކާރު ހިއްސާވާ ބައެއް ކުންފުނިތަކުން އަންގާފައިވާއިރު، ޔޫތު މިިނިސްޓްރީގެ ހުރިހާ މުވައްޒަފުން ދާން އަންގާފައިވާ މެމޯއެއް ސޯޝަލް މީޑިއާގައި ވަނީ އާއްމުވެފަ އެވެ.

މެމޯގައި ބުނެފައި ވަނީ ޕީޕީއެމްގެ ޖަލްސާ ބާއްވަނީ އެ ޕާޓީގެ މެނިފެސްޓޯ ތަންފީޒުކުރުމާ ގުޅޭ ގޮތުން ކަމަށެވެ. އެ ޖަލްސާގައި ރައީސް އަބްދުﷲ ޔާމީން ބައިވެރިވެވަޑައިގަތުމަށް ހަމަޖެހިފައިވާތީ، މާދަމާ ރޭ 8:45 އަށް އެ މިނިސްޓްރީގެ ހުރިހާ މުވައްޒަފުން ކާނިވާ ސަރަހައްދަށް ދާން މިނިސްޓަރު އެދިވަޑައިގަންނަވާ ކަމަށެވެ.

މެމޯ އިން ނުވަތަ ނޯޓަކުން ބައެއް މުވައްޒަފުން ޖަލްސާ އަށް ދާން އަންގާފައިވާއިރު ކުންފުނިތަކާއި މިނިސްޓްރީތަކުގެ ސިޔާސީ ބޭފުޅުން މުވައްޒަފުންނާ ބައްދަލުކޮށް ވެސް ޖަލްސާގައި ބައިވެރިވާން އަންގަވާފައި ކަމަށް ވެސް އެނގިފައިވެ އެވެ. ބަލިވުމުގެ ސަބަބުން ޖަލްސާ އަށް ދާން އުޒުރުވެރިވާ މީހުން، ސަލާން ސެޓްފިކެޓް ހުށަހަޅަން ވެސް އަންގާފައިވެ އެވެ.

އެކަމަކު އެ ޖަލްސާ އަށް ދާން މުވައްޒަފުންނަށް އޮފީސްތަކުން ބިރު ދައްކާ ވާހަކަ ރައީސް ޔާމީން ފެކްޝަނުން ވަނީ ދޮގުކޮށްފަ އެވެ.

ރައީސް ޔާމީން ފެކްޝަނުގެ ސެކްރެޓަރީ ޖެނެރަލް، ނިލަންދޫ ދާއިރާގެ މެމްބަރު ޑރ. އަބްދުﷲ ހަލީލް އިއްޔެ ވިދާޅުވީ ޖަލްސާ އަށް ސަރުކާރު މުވައްޒަފުން އަދި އެހެން ބަޔަކު ވެސް ދާން މަޖުބޫރު ނުކުރާ ކަމަށެވެ. ސިޔާސީ ކަންކަމަކީ މަޖުބޫރުން ކުރުވާ ކަންކަން ނޫން ކަމަށާއި އެފަދަ އެއްވެސް އެންގުމެއް އެއްވެސް ބަޔަކަށް އަންގާފައި ނުވާނެ ކަމަށް އޭނާ ވިދާޅުވި އެވެ.

އޭނާ މިހެން ވިދާޅުވިޔަސް ޖަލްސާ ބޭއްވުމާ ގުޅޭ އިންތިޒާމްތައް ހަމަޖެއްސުމުގެ މަޝްވަރާ ބައްދަލުވުމުގައި އިސްކޮށް އުޅުއްވީ ކެބިނެޓުގެ ވަޒީރުންނާއި ރައްޔިތުންގެ މަޖިލީހުގެ ޕީޕީއެމް މެމްބަރުންނާއި ކުންފުނިތަކުގެ މެނޭޖިން ޑިރެކްޓަރުންނާއި ކައުންސިލް މެމްބަރުންނެވެ. އެ ބައްދަލުވުން އޮތީ އަންގާރަ ދުވަހު މެންދުރު މުލީއާގޭގަ އެވެ.