މަސްތުން ސަލާމަތްވާން ފަރުވާ ނުފެށި 600 އަށް ވުރެ ގިނަ މީހުން

މަސްތުވާތަކެތިން ސަލާމަތްވުމަށް ޑްރަގް ކޯޓުން ހުކުމްކުރިއަސް ފަރުވާ ނުފެށި ތިބި މީހުންގެ އަދަދު 600 އަށް ވުރެ މައްޗަށް އަރައިފި އެވެ.

"މިހާރު" އަށް ލިބިފައިވާ މައުލޫމާތުތަކަށް ބަލާއިރު އެންމެ ގިނައިން ތިބީ ރިހެބިލިޓޭޝަން ސެންޓަރުން ފަރުވާ ހޯދަން ހުކުމްކޮށްފައި ތިބި މީހުންނެވެ. އޭގެ ތެރެއިން 391 މީހަކަށް ފަރުވާ ނުފެށި ދިގުލައިގެން ދާއިރު، ކޮމިއުނިޓީ ސާވިސް ސެންޓަރަށް ދާން 166 މީހުން މި ވަގުތު ވެސް ވެއިޓިން ލިސްޓުގައި އެބަ ތިއްބެވެ.

ގދ. ތިނަދޫގައި ހުންނަ ޑްރަގް ޑިޓޮކްސިފިކޭޝަން ސެންޓަރުން 19 މީހުން، ފުވައްމުލަކުގައި ހުންނަ ސެންޓަރުން ހަ މީހުން، ސ. ހިތަދޫ ސެންޓަރުން 43 އަދި ހުޅުމާލޭގައި ހުންނަ ހާފްވޭ ހައުސް އިން ފަރުވާ ހޯދަން ހުކުމްކޮށްފައި 23 މީހުން ތިބިކަން ވެސް، އެ މައުލޫމާތުތަކުން އެނގެ އެވެ.

އެކަމަކު މިހާ ގިނަ ބަޔަކު ފަރުވާ ނުފެށި ދޫވެފައި މި ތިބީ، އެތަންތަނުގައި އެވަރުގެ ޖާގަ ނެތިގެން ކަމެއް ނުވަތަ ގަސްދުގައި ނުގޮސް ތިބީ ކަމެއް ކަށަވަރެއް ނުވެ އެވެ.

ރިހެބިލިޓޭޝަން އަމުރެއް ހިނގަން ފަށަނީ، އެ މީހަކަށް އެ އަމުރު ލިބިއްޖެކަން ކަށަވަރުކޮށްދޭ ވަގުތުން ފެށިގެންނެވެ. އެ އަމުރުގެ ދަށުން ދޫކޮށްފައި ތިބި އެކަމަކު ފަރުވާ ނުލިބޭ މީހުންގެ އަދަދު 648 އަށް މިހާރު އަރަ އެވެ.

ފަރުވާ ނުފެށި ލަސްވާ ނަމަ، ތިން އަހަރުގެ ޓާމިނޭޓް ހުކުމް ތަންފީޒުކުރެ އެވެ.

ޑިސެމްބަރު 31، 2011 ގައި އަމަލުކުރަން ފެށި ގާނޫނުގެ ދަށުން، މަސްތުވާތަކެތި ބޭނުންކުރާ މީހުންނަށް ފަރުވާ ދިނުމަށް ނޭޝަނަލް ޑްރަގް އެޖެންސީ (އެންޑީއޭ) އިން 18 މަސް ދުވަހުގެ ތެރޭގައި ހަ ވައްތަރެއްގެ މަރުކަޒު އުފައްދަން ޖެހެ އެވެ. އެއީ، ޑިޓޮކްސިފިކޭޝަން ސެންޓަރު، ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރު، ކުޑަކުދިންނަށް ހާއްސަ ޑްރަގް އެންޑް ޓްރީޓްމަންޓް އެންޑް ރިހިބިލިޓޭޝަން ސެންޓަރު، އަންހެނުންނަށް ހާއްސަ ޑްރަގް އެންޑް ޓްރީޓްމަންޓް އެންޑް ރިހިބިލިޓޭޝަން ސެންޓަރު، ހާފްވޭ ހައުސް އަދި ޑްރަގް އޮފެންޑާ ރިމާންޑް ސެންޓަރެވެ. ނަމަވެސް އޭގެ ފަހުން ނުވަ އަހަރު ވެގެން ދާއިރު އިރު މީގެ ތެރެއިން ޑްރަގް އޮފެންޑާ ރިމާންޑް ސެންޓަރު އަދި ގާއިމެއް ނުކުރެވެ އެވެ.

އެންޑީއޭއިން ބުނީ ހުޅުމާލޭގައި ޑްރަގް އޮފެންޑާ ރިމާންޑް ސެންޓަރެއް އަޅަން އެމްޓީސީސީއާ މިހާރު ހަވާލުކޮށްފައިވާ ކަމަށެވެ. އެ ސެންޓަރުން ފަރުވާ ދޭނީ، ގާނޫނުގައި ބުނާ ގޮތުން، މަސްތުވާތަކެތި ބޭނުންކުރުމާއި ޕެޑްލްކުރުމުގެ ކުށުގެ ތުހުމަތުގައި ހައްޔަރުކުރެވޭ މީހުން، އެ މީހުންގެ ބަންދުގެ މުއްދަތުގައި އެ ތަނުގައި ބައިތިއްބައިގެންނެވެ.

މަސްތުވާތަކެތީގެ ވަބާގައި ޖެހި، އެއިން ސަލާމަތްނުވާ މީހުން މާލޭގައި ވަރަށް ބޮޑަށް ގިނަވެފައިވާކަން، ނޫސްވެރިން ބޭނުންކޮށްގެން މިދިއަ ހަފުތާގައި ފުލުހުން ހިންގި އޮޕަަރޭޝަނުން ވަނީ ހާމަވެފަ އެވެ. އޭގެ ތެރޭގައި ވަންނާނެ ތަނެއް ނެތި، މާލޭގެ އާންމު ތަންތަނުގައި ނިދާ މީހުން ވެސް ހިމެނެ އެވެ.

އޭގެ ބައެއް މީހުން ބުނާ ގޮތުގައި ފަރުވާއަށް އެދި ފޯމު ހުށައެޅިތާ އަހަރަކަށް ވުރެ ގިނަ ދުވަސް ވީ އިރު ވެސް އެންޑީއޭއިން އެއްވެސް ޖަވާބެއް ނުލިބެ އެވެ.