ޚިޔާނާތުން ގެއްލުނު ފައިސާއާ މެދު މިއީ ވިސްނަން ޖެހޭ ހާލަތެއް: އޭސީސީ

ދުރާލައި ރާވައިގެން ހިންގާ ކޮރަޕްޝަންގެ އަމަލުތަކުން ރައްޔިތުންގެ އެތައް ފައިސާއެއް ގެއްލިގެންދާއިރު، ގައުމު މިއަދު އޮތް ހާލަތަކީ އެފަދަ ފައިސާއަށް ބޭނުންޖެހި، އެންމެން ގުޅިގެން ކޮރަޕްޝަން ނައްތާލަން ވިސްނަންޖެހޭ ހާލަތެއް ކަމަށް އެންޓި ކޮރަޕްޝަން ކޮމިޝަން (އޭސީސީ) ގެ ރައީސް މަރިޔަމް ޝިއުނާ މިއަދު ވިދާޅުވެއްޖެ އެވެ.

މި އަހަރުގެ އެންޓި ކޮރަޕްޝަން ކޮމިޝަން ދުވަހާ ގުޅިގެން ނެރުއްވި ހިތޯބުގައި ޝިއުނާ ވިދާޅުވީ، ކޮރަޕްޝަންގެ އަމަލުތަކުގެ ސަބަބުން ގައުމީ ތަރައްގީ އާއި ރައްޔިތުންގެ އަސާސީ ޚިދުމަތްތަކަށް ހުރަސްއެޅެނީ އެތައް ފައިސާއެއް ގެއްލިގެންދާތީ ކަމަށެވެ. ރާއްޖެ މިހާރު އޮތީ ކޮރަޕްޝަންގެ ސަބަބުން ގެއްލިގެންދާ ފައިސާއާ މެދު ވިސްނަން ޖެހޭ ހާލަތެއްގައި ކަމަށް ވިދާޅުވި އެވެ.

މި ދަނޑިވަޅު، ކޮވިޑް-19ގެ ބަލިމަޑުކަމުން އިގްތިސާދު ހަމަ މަގަށް އަޅުވައި ރައްޔިތުންގެ ފުރާނަ ސަލާމަތް ކުރުމަށާއި ބޭނުންވާ އަސާސީ މުހިއްމު ޚިދުމަތްތަކަށް ބޮޑެތި ހޭދަތަކެއް ކުރަން ޖެހިފައިވާ ކަން އޭސީސީން ފާހަގަކޮށްފައިވެ އެވެ.

"މިއަދުގެ ހާލަތަށް ބަލާއިރު ގައުމު މިވަނީ އެގޮތުން [ކޮރަޕްޝަނުން] ގެއްލިގެން ގޮސްފައިވާ ފައިސާއަށް ނުހަނު ބޭނުން ޖެހިފަ އެވެ،" ޝިއުނާ ވިދާޅުވި އެވެ.

ކޮރަޕްޝަނާ ދެކޮޅަށް ބައިނަލްއަގުވާމީ ފެންވަރެއްގައި މަސައްކަތްކުރާ މި ދުވަހަށް މި އަހަރު ކަނޑައަޅާފައިވާ ޝިއާރަކީ "ބަލިމަޑުކަމުން އަރައިގަތުން-ނަޒާހަތްތެރިކަމާ އެކު" މި އެވެ.

ޝިއުނާ ވިދާޅުވި ގޮތުގައި މި ބަލިމަޑުކަމުގެ ތެރޭގައި ވެސް އެންމެ ބޮޑަށް ފާހަގަކުރެވުނު އެއް ކަމަކީ މިފަދަ ނުރައްކާތެރި ބަލިމަޑުކަމުން އަރައިގަތުމަށް ކުރާ މަސައްކަތްތަކަށް ވެސް ކޮރަޕްޝަންގެ އަމަލުތަކުން ހުރަސް އަޅާ މިންވަރެވެ. ކޮރަޕްޝަނުން ގެއްލިފައިވާ އަދި ގެއްލެމުންދާ ފައިސާއަކީ މިފަދަ ބަލިމަޑުކަމެއް އޮތް ހާލަތެއްގައި އެކަށީގެންވާ ސިއްހީ ނިޒާމެއް ގާއިމް ނުކުރެވި ސިއްހީ ޚިދުމަތެއް ނުލިބި އެތައް ރައްޔިތުންނެއްގެ ފުރާނަ ދޫކޮށްލުމަށް މަޖުބޫރުވާ ހާލަތް މެދުވެރިކުރުވާ މައިގަނޑު އެއް ސަބަބު ކަމަށް ވިދާޅުވި އެވެ.

މިއީ ދުނިޔޭގެ ގިނަ ގައުމުތަކުގެ ހާލަތުކަން ވެސް ޝިއުނާ ފާހަގަކުރެއްވި އެވެ.

"މި ހާލަތަން އަރައިގަތުމަށްޓަކައި ނަޒާހަތްތެރިކަން އިސްކޮށް، ކޮރަޕްޝަނާ ދެކޮޅަށް އަޑުއުފުލާ، ކޮރަޕްޝަން ހުއްޓުވުމަށްޓަކާ ނިޒާމީ ބަދަލު ތަކެއް ގެންނަންޖެހެ އެވެ،" އޭނާ ވިދާޅުވި އެވެ.

ޝިއުނާ ވިދާޅުވި ގޮތުގައި މި ބަލިމަޑުކަމުގެ ތެރެއިން ލިބުނު އެންމެ މުހިއްމު ފިލާވަޅަކީ ކިތަންމެ ބޮޑު ނުރައްކާތެރި ބަލިމަޑުކަމެއްގައި ވެސް ކޮރަޕްޝަންގެ އަމަލުތައް ހިންގާ މީހުން އެއްވެސް އިންސާނިއްޔަތުކަމެއް ނެތި ރައްޔިތުންގެ މުދަލާއި ފައިސާ ނަހަމަ ގޮތުގައި ބޭނުން ކުރަން ފަސްނުޖެހޭނެ ކަމެވެ. އާ އުކުޅުތައް ބޭނުންކޮށްގެން ވެސް ކޮރަޕްޝަންގެ އަމަލުތައް ހިންގަމުންދާ ތަން ދުނިޔޭގެ އެކި ގައުމުތަކުން ވެސް ފެންނަ ކަމަށް ވިދާޅުވި އެވެ.

އޭނާ ވިދާޅުވީ ކޮވިޑުގެ ބަލިމަޑުކަމުން އަރައިގަތުމަށް ސިއްހީ ދާއިރާއަށް ބިލިއަނުން ހަރަދުކުރާއިރު ހާލަތާ ގުޅުވައި އިމަޖެންސީ ޕްރޮކިއުމެންޓް މަރުހަލާއެއް ކުރިމަތިވުމަކީ ކޮރަޕްޝަނަށް ހުޅުވޭ އިތުރު ފުރުސަތެއް ކަމަށެވެ.