ފުލުހުންގެ މުއައްސަސާ އިސްލާހުކުރަން ފާސްކުރި ބިލް ރައީސް ތަސްދީގުކުރައްވައިފި

ފުލުހުންގެ މުއައްސަސާ މިހާރަށް ވުރެން ހަރުދަނާކޮށް އިސްލާހީ ބަދަލުތަކެއް ގެންނަން ރައްޔިތުންގެ މަޖިލީހުން ފާސްކުރި ދިވެހި ފުލުހުންގެ ޚިދުމަތުގެ ބިލް ރައީސް އިބްރާހިމް މުހައްމަދު ސޯލިހް މިއަދު ތަސްދީގު ކުރައްވައިފި އެވެ.

އެ ބިލް ފާސްކޮށްފައި ވަނީ ލާއިންސާނީ އަނިޔާވެރި އަމަލުތަކާއި ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތު ކުރެވޭ ނުވަތަ އެފަދަ މައްސަލައެއް ދައުލަތުގެ އިދާރާތަކާއި ކޮމިޝަންތަކަށް ހުށަހަޅާފައިވާ ފުލުހުންނާ މެދު ގާނޫނަށް އަމަލުކުރަން ފަށާތާ ހަތަރު މަސް ދުވަހުގެ ތެރޭގައި ފިޔަވަޅު އަޅަން ޖެހޭގޮތަށެވެ. މި ފިޔަވަޅު އަޅަން ޕޮލިސް ކޮމިޝަނަރަށް ލަފާ ދޭނީ، މި ގާނޫނަށް އަމަލުކުރަން ފަށާތާ ދެ ހަފުތާ ތެރޭގައި އެކުލަވާލަން ޖެހޭ ފުލުހުންގެ ބޯޑުންނެވެ.

މި ގާނޫނަށް އަމަލުކުރަން ފެށުމަށް ހަމަޖެހިފައި ވަނީ ގެޒެޓުގައި ޝާއިއުކުރާތާ ތިން މަސްދުވަސް ހަމަވާ ތާރީޚުން ފެށިގެންނެވެ.

ފުލުހުންގެ ސިޔާސަތުތައް ކަނޑައެޅުމުގައި ވަޒީރަށް ލަފާ ދޭ އެންމެ އިސް ފަރާތަކީ ވެސް އާއްމު މެމްބަރުންގެ މައްޗަށް އެކުލެވިގެންވާ އެ ބޯޑެވެ. ފުލުހުންގެ ޚިދުމަތުގެ ގާނޫނުގައި ހޯމް މިނިސްޓަރަށް އިތުރު ބާރުތަކެއް ދީފަ އެވެ. އެއީ، ފުލުހުންގެ ކަންކަމުގައި ސިޔާސީ ގޮތުން ޒިންމާވާ އެންމެ އިސް ފަރާތަކަށް ވާތީ އޭނާގެ މަސްއޫލިއްޔަތު ފުރިހަމައަށް އަދާކުރުމަށެވެ.

ގާނޫނު އޮތީ ފުލުހުންގެ ޚިދުމަތް ލާމަރުކަޒުކުރާ ގޮތަށެވެ. ރީޖަނަލް ކޮމާންޑްތަކަކާއި ސަރަހައްދީ ޕޮލިސް ކޮމާންޑްތަކެއް އުފައްދައި އެ ސަރަހައްދެއްގައި ހިނގާ ޖިނާއީ އިޖުރާއަތުގެ ހުރިހާ ކަންކަން އެ ސަރަހައްދެއްގެ ތެރޭގައި ބެލެހެއްޓޭ ގޮތަށެވެ. ފުލުހުންގެ ކުރިއެރުމާއި ތަމްރީނަށް ވެސް އެ ގާނޫނުން ފުރުސަތު ފަހިކޮށްދީފައިވެ އެވެ.

ރައީސް އޮފީހުން ބުނިގޮތުގައި އާ ގާނޫނުގެ މަގްސަދުތަކުގެ ތެރޭގައި ދިވެހި ފުލުހުންގެ ޚިދުމަތުގެ އެންމެހާ ކަންކަމަކީ ގާނޫނުއަސާސީ އާއި ގާނޫނުއަސާސީގައި ބަޔާންކޮށްފައިވާ ދުސްތޫރީ ހަމަތަކާއި އިންސާނީ ހައްގުތަކާއި ކަރާމަތަށް އިހްތިރާމްކުރުމާ އެކު ގާނޫނުގެ ހުކޫމަތުގެ ތެރެއިން ދެވޭ ޚިދުމަތެއްކަން ކަށަވަރުކުރުން ހިމެނެ އެވެ. އަދި ވަކިފަރާތަކަށް ނުޖެހި، ނުފޫޒަކަށް ވެސް ލެނބުމެއް ނެތި ހަމަހަމަކަމާ އެކު ގާނޫނު ނަގަހައްޓައި ތަންފީޒުކުރުމާއި އަމަންއަމާންކަމާއި ދާޚިލީ ސަލާމަތާއި ރައްކާތެރިކަމުގެ ގޮތުން ކުރަން ޖެހޭ ކަންކަން ކުރުމުގެ ގާނޫނީ ބާރާއި އިހްތިޔާރު ފޯރުކޮށްދިނުން ހިމެނޭ ކަމަށް ވެސް ރައީސް އޮފީހުން ބުންޏެވެ.

ގާނޫނަށް އަމަލުކުރަން ފެށުމާ އެކު "މޯލްޑިވްސް ޕޮލިސް ސާވިސް"ގެ ނަން "ދިވެހި ފުލުހުންގެ ޚިދުމަތަށް" ބަދަލުވާނެ އެވެ. އެކަމަކު އިނގިރޭސި ބަހުން ބޭނުންކުރާނެ ނަމަކީ "މޯލްޑިވްސް ޕޮލިސް ސާވިސް" ކަމަށް ގާނޫނުގައިވެ އެވެ.

ފުލުހުންގެ ޚިދުމަތުގެ ގާނޫނާ އެކު މުއައްސަސާއެއް އިސްލާހީ ބަދަލުތަކެއް އަންނާނެ ކަަމަށް ސަރުކާރުން ބުނި ނަމަވެސް އިދިކޮޅުން މި ބިލާ ދެކޮޅެވެ. ޕީޕީއެމާއި ޕީއެންސީގެ މެމްބަރުން ވިދާޅުވެފައި ވަނީ މުޅި ބިލް އެކުލަވާލާފައި އޮތީ ބަދަލު ހިފަން ކަމަށެވެ.