އާ އަހަރުގެ ފުރަތަމަ ދުވަހުގެ ހަވީރު މާލެ، ވިލިމާލޭގައި 4 އިން 8 ވެހިކަލް ދުއްވުން މަނާ

އަންނަ އަހަރުގެ ޖެނުއަރީ މަހުގެ ފުރަތަމަ ދުވަހުގެ ހަވީރު، މާލެ އާއި ވިލިމާލޭގެ މަގުތަކުގައި ވެހިކަލް ދުއްވުން މާލޭ ސިޓީ ކައުންސިލުން މަނާކޮށްފި އެވެ.

އެ ކައުންސިލުން މިއަދު ކުރި އިއުލާނެއްގައި ބުނީ ޖެނުއަރީ މަހުގެ ފުރަތަމަ ދުވަސްވާ ހުކުރު ދުވަހު، ހަވީރު 4 އިން ރޭގަނޑު 8 އަށް، މާލެ އާއި ވިލިމާލޭގެ މަގުތަކުގައި އިންޖީނުލީ އުޅަނދު ދުއްވުން މަނާވާނެ ކަމަށެވެ. އެގޮތަށް ހަމަޖެއްސީ، އާއްމު ރައްޔިތުންނަށް ހިތްހަމަޖެހުމެއް ގެނެސްދިނުމަށްޓަކައި ކަމަށް ކައުންސިލުން ބުންޏެވެ.

އާ އަހަރުގެ ފުރަތަމަ ދުވަހު އާއްމު އުޅަނދުތަކަށް ދުއްވުން މަނާ ކުރި ނަމަވެސް ބައެއް އުޅަނދުތައް އިސްތިސްނާވެ އެވެ. އޭގެ ތެރޭގައި ހިމެނެނީ ސަލާމަތީ ބާރުތަކުގެ އުޅަނދުތަކާއި އެމްބިއުލާންސާއި ހާއްސަ އެހީއަށް ބޭނުންވާ މީހުންގެ ސައިކަލާއި ބަހުގެ ހިދުމަތުގެ އިތުރުން، ހާއްސަ ހުއްދައެއްގެ ދަށުން ދުއްވާ އުޅަނދުތަކެވެ.

ސިޓީ ކައުންސިލްގެ މި އެންގުމާ ޚިލާފުވާ ފަރާތްތައް ޖޫރިމަނާ ކުރާނެ ކަމުގެ އިންޒާރު އެތަނުން ދީފައި ވެ އެވެ.

ހާއްސަ ދުވަސް ދުވަހާ ގުޅިގެން، މާލޭގައި ބައެއް ވަގުތުތަކަށް ވެހިކަލް ދުއްވުން މަނާ ކުރެ އެވެ. އެ ދުވަހެއްގައި އާއިލާއާ އެކު ގިނަ ބަޔަކު، ހިތްހަމަ ޖައްސާލުމަށް މަގުމައްޗަށް ނިކުމެ އެވެ.