ސުޝާންތުގެ މަރުގެ ތުހުމަތު އެޅުނު ރިއާ މި އަހަރު ފިލްމީ މަސައްކަތްތަކަށް ނުކުންނާނެ

މިދިޔަ އަހަރު އެކްޓަރު ސުޝާންތު ސިންގް ރާޖްޕޫތު އަމިއްލައަށް މަރުވި މައްސަލާގައި ހައްޔަރުކޮށް ޖަލުގައި ވެސް ދުވަސްތަކެއް ހޭދަކުރި އޭނާ ލޯބީގެ ގޮތުން ގުޅިގެން އުޅުނު ބަތަލާ ރިއާ ޗަކްރަބަތީ އަލުން މި އަހަރު ފިލްމީ މަސައްކަތްތަކަށް ނުކުންނާނެ ކަމަށް ޑައިރެކްޓަރު ރޫމީ ޖެފްރީ ބުނެފި އެވެ.

ރޫމީގެ ރިލީޒްނުކުރެވި އޮތް ފިލްމު "ޗެހެރޭ" ގެ އެއް ބަތަލާ އަކީ ވެސް ރިއާ އެވެ. މަސައްކަތް ނިމިފައި އޮތް އެ ފިލްމުގެ ބަތަލުންނަކީ އިމްރާން ހާޝިމީ އާއި އަމީތާބް ބައްޗަނެވެ. ރޫމީ އަކީ ސުޝާންތުގެ މަރާ އެކު ރިއާ އަށް ކުރި ތުހުމަތުތަކަކާ ގުޅިގެން އެންމެ ފުރަތަމަ ދުވަހުން ފެށިގެން ވެސް 28 އަހަރުގެ ބަތަލާގެ ދިފާއުގައި ވާހަކަ ދެއްކި އެކެކެވެ.

ސުޝާންތު ދަންޖެހިގެން މަރުވުމާއި ޑިޕްރެޝަނާއި މަސްތުވާތަކެތި ރޯލެއް އަދާކޮށްފައިވާ އިރު، ރިއާ މިދިޔަ އަހަރުގެ ސެޕްޓެމްބަރުގެ މަހުގެ ކުރީކޮޅު ހައްޔަރުކުރީ ސުޝާންތަށް މަސްތުވާތަކެތި ހޯދައިދިން މައްސަލައިގަ އެވެ. އަދި އެ މައްސަލާގައި އޭނާ ޖަލުގައި ބަންދުކޮށް މަސް ދުވަސް ފަހުން ކަފާލާތުގެ ދަށުން ދޫކޮށްލީ އޮކްޓޯބަރު މަހުގެ ކުރީކޮޅު އެވެ.

ސުޝާންތުގެ މަރާ އެކު ރިއާ އަށް ތަޖުރިބާކުރަން ޖެހުނު ހިތްދަތިކަމުގެ ވާހަކަތައް ހިއްސާކޮށް ރޫމީ ބުނީ "ޖަލޭބީ" އާއި "ހާފް ގާލް ފްރެންޑް" ފަދަ ފިލްމުތައް ކުޅުނު ބަތަލާ ހުރީ އަލުން އެކްޓިން އަށް ނުކުންނަން ތައްޔާރަށް ކަމަށެވެ.

"ދެހާސް ވިއްސަކީ ރިއާ އަށް ވަރަށް ހިތްދަތި އަހަރެއް. އެ ކުއްޖާގެ ބޮލުގައި އެޅުވި ދޮގު ތުހުމަތުތަކުގެ ސަބަބުން އޭނާގެ ދިރިއުޅުން އެ ފުށްމިފުށް ޖަހާލި،" ސްޕޮޓްބޯއި އަށް ރޫމީ ބުންޏެވެ.

އޭނާ ބުނީ ޖަލުން މިނިވަންވި ފަހުން ވެސް ރިއާއާ އެތައް ފަހަރަކު ބައްދަލުވި ކަމަށެވެ. އެކަމަކު ކުރިއާ ހިލާފަށް ރިއާގެ މިޒާޖަށް ވަރަށް ބޮޑެތި ބަދަލުތަކެއް އައިސްފައިވާ ކަމަށް ބުންޏެވެ.

"އޭނަ ވާހަކަ ދައްކާލެއް ވަރަށް މަދު. ވިސްނާލަބަލަ ދޮގު ތުހުމަތުތަކެއް އަޅުވައި އާދައިގެ އާއިލާއެއްގެ ޒުވާން އަންހެން ކުއްޖަކު މަސް ދުވަސްވަންދެން ޖަލުގައި ހޭދަކުރަން ޖެހުނީމަ އޭނާ އުފުލާނެ ވޭނާއި ހިތްދަތިކަމާ ދޭތެރޭ." ރޫމީ ބުންޏެވެ.

ރޫމީ ބުނިގޮތުގައި އޭނާ އަބަދު ވެސް ބައްޕައެއް ފަދައިން އަދި ގާތް ރަހުމަތްތެރިއެއްގެ ގޮތުގައި ރިއާ އަށް ހިތްވަރުދޭން ހުންނާނެ އެވެ.

"އަހަންނަށް ވަރަށް ޔަގީން ހަޔާތުގެ މުޅިން އާ ބާބެއް ފަށަން ރިއާ މި އަހަރު ފިލްމީ މަސައްކަތްތަކަށް ނުކުންނާނެ. އޭނާ ހުރީ ވެސް އެ ހިތްވަރުގައި،" ރޫމީ ބުންޏެވެ.

ރިއާ އަކީ ޔާޝްރާޖް ފިލްމްސް (ވައިއާރްއެފް) އިން 2013 ގައި ގެނެސްދިން "މޭރޭ ޑޭޑް ކީ މަރޫޓީ" އިން ބޮލީވުޑަށް ނުކުތް ބަތަލާއެކެވެ.