މާފުށީ ޖަލަށް ބަޔަކު ނުވަދޭ، އާއްމު ހާލަތަށް ގެނެސްފި

ގަވައިދާ ހިލާފަށް ކ. މާފުށީ ޖަލަށް ބަޔަކު ވަންނަން އުޅުނު ކަމުގެ މައުލޫމާތު ލިބުން ނަމަވެސް އެއްވެސް މީހަކު ވަދެފައި ނުވާ ކަމަށް ކޮމިޝަނާ އޮފް ޕްރިޒަންސް އަހުމަދު މުހައްމަދު މިރޭ ވިދާޅުވެއްޖެ އެވެ.

މާފުށީ ޖަލަށް ބަޔަކު ވަތް ކަމުގެ މައުލޫމާތު ލިބިގެން އެތަން މިރޭ ކުއްލި ހާލަތަށް ގެނަ އެވެ. އަދި ގައިދީން ތިބި އަދަދު ގުނައި ޖަލު ބަލައި ފާސްކުރުމުގެ އޮޕަރޭޝަނެއް ވެސް ހިންގި އެވެ.

މި އޮޕަރޭޝަންގެ ތަފްސީލް ދެއްވަން ކުރެއްވި ޓުވީޓެއްގައި ކޮމިޝަނަރު ވިދާޅުވީ މާފުށީ ޖަލަށް ގަވައިދާ ހިލާފަށް ބަޔަކު ވަތް ކަމަށް މައުލޫމާތު ލިބުނު ނަމަވެސް އެއްވެސް މީހަކު ޖަލަށް ވަދެފައި ނުވާ ކަމަށެވެ. އަދި އެއްވެސް ގައިދީއަކު ވެސް ނުފިލާ ކަމަށް އޭނާ ވިދާޅުވި އެވެ.

އެހެންވެ ޖަލު މިހާރު ވަނީ އާންމު ހާލަތަށް ގެނެސްފަ އެވެ.

ސީސީޓީވީ ކެމެރާ ހަރުކޮށް، ސެކިއުރިޓީ ވަރުގަދަ މާފުށީ ޖަލުގައި ބައެއް ފަހަރު ގައިދީން ހަޅުތާލުކޮށް ހަމަނުޖެހުން ހިންގަ އެވެ. ނަމަވެސް މިފަހުން އެއްވެސް މީހަކު ޖަލުން ފިލަން މަސައްކަތް ކޮށްފައި ނުވެ އެވެ.

ޖަލުގައި އެންމެ ގިނައިން ދިމާވާ މައްސަލައަކީ ޖަލަށް މަނާތަކެތި ވެއްދުމެވެ. އަދި ޖަލު ބަލައި ފާސްކުރާ އިރު ބައެއް ފަހަރަށް ގިނަ އަދަދެއްގެ ފޯނާއި އިލެކްޓްރޯނިކް ސާމާނު އަތުލައިގަނެ އެވެ.