މައްސަލަ ހޫނުވެ ވަޓްސްއެޕްގެ އާ އުސޫލު ފަސްކޮށްފި

މައްސަލަ ހޫނުވެ ވަޓްސްއެޕްގެ އާ އުސޫލަށް އަމަލުކުރުން ފަސްކޮށްފި

17 ޖެނުއަރީ 2021

ވަޓްސްއެޕް ބޭނުންކުރާ މީހުންގެ ވަރަށް ގިނަ މައުލޫމާތު އެ އެޕް ހިންގާ ފޭސްބުކާ ހިއްސާކުރަން ޖެހޭ ގޮތަށް ނިންމައި އެ އުސޫލަށް އަންނަ މަހުގެ ކުރީކޮޅު އަމަލުކުރަން ނިންމުމާ އެކު އާންމުންގެ ފަރާތުން ކުރިމަތިވި ފާޑުކިޔުންތަކާއި ޕްރެޝަރުތަކާ ހެދި އެކަން ފަސްކޮށްފި އެވެ.

އަހުމަދު އަދްޝަން

އަންނަ މަހުގެ 8 ގެ ފަހުން، ވަޓްސްއެޕް ބޭނުންކުރާ މީހުންނަށް "މަޖުބޫރުކޮށްގެން" އަމަލުކުރަން ނިންމިި އުސޫލާ ގުޅިގެން ވަރަށް ގިނަ ބަޔަކު އެ ޕްލެޓްފޯމާ ފެއަށް ޖެހި، ޓެލެގްރާމާއި ސިގްނަލްއާ ދިމާއަށް މިސްރާބު ޖަހާފައިވެ އެވެ.

ނަމަވެސް އާ އުސޫލަށް އަމަލުކުރަން ފެށުން ފަސްކޮށް ވަޓްސްއެޕުން ނެރުނު ބަޔާނެއްގައި ބުނީ އެ އުސޫލު އިތުރަށް މުރާޖަައާކުރަން ނިންމާފައިވާތީ ކުރިއެކޭ އެއްގޮތަށް ވަޓްސްއެޕްގެ އަހުލުވެރިން އެ އެޕް ބޭނުންކުރެވޭނެ ކަމަށެވެ.

Thank you to everyone who’s reached out. We're still working to counter any confusion by communicating directly with @WhatsApp users. No one will have their account suspended or deleted on Feb 8 and we’ll be moving back our business plans until after May - https://t.co/H3DeSS0QfO
— WhatsApp (@WhatsApp) January 15, 2021

މިކަމަށް ދީފައި ވަނީ ތިން މަސް ދުވަހުގެ މުހުލަތެކެވެ. މާނަ އަކީ އާ އުސޫލަށް އަމަލުކުރަން ފެށުން އަންނަ މަހުގެ 15 އާ ހަމައަށް ފަސްކުރުމެވެ.

ވަޓްސްއެޕުން ބުނެފައިވާ ގޮތުގައި އާ އުސޫލުގައި ކަންބޮޑުވާން ޖެހޭ ވަރުގެ ކަމެއް ނެތެވެ. އެކަމަކު މިކަން ބޮޑު މައްސަލައަކަށްވީ ހަގީގަތް އޮޅޭ ގޮތަށް ގިނަ ވާހަކަތަކެއް ފެތުރިގެން ދިއުން ކަމަށް ބުންޏެވެ. ދެހާސް ސާދައިގެ ފަހުން ފޭސްބުކްގެ ދަށުން ހިންގާ ވަޓްސްއެޕުން ބުނިގޮތުގައި އާ އުސޫލުގެ މައިގަނޑު މަގުސަދަކީ އެފްބީގެ ދަށުން ހިންގާ އެހެން ޕްލެޓްފޯމްތައް ވެސް އެއާ ގުޅުވާފައި އޮންނަ ގޮތަށް ގުޅުވުމުގެ މަސައްކަތްކުރުމެވެ.

We will make sure users have plenty of time to review and understand the terms. Rest assured we never planned to delete any accounts based on this and will not do so in the future.
— WhatsApp (@WhatsApp) January 15, 2021

ނަމަވެސް ވަޓްސްއެޕް ބޭނުންކުރާ ވަރަށް ގިނަ ބަޔަކު ވަނީ ފޭސްބުކާ އެ މީހުންގެ މައުލޫމާތު ހިއްސާކުރަން ޖެހުމަކީ ވަރަށް ބޮޑު މައްސަލެއް ކަމަށް ބުނެ ކަންބޮޑުވުން ފާޅުކޮށް، އާ އުސޫލަށް އެއްބަސްވާން ފޮނުވާ ނޮޓިފިކޭޝަނަށް ވެސް އިޖާބަ ނުދީފަ އެވެ.

We want to address some rumors and be 100% clear we continue to protect your private messages with end-to-end encryption. pic.twitter.com/6qDnzQ98MP
— WhatsApp (@WhatsApp) January 12, 2021

ވަޓްސްއެޕުން ބުނީ އާންމުންގެ މެދުގައި އާ އުސޫލާ މެދު ކަންބޮޑުވުން އުފެދުނީ އޮޅުންބޮޑު މައުލޫމާތުތަކާ ހެދި ކަމަށެވެ. އެހެންވެ އަދިވެސް ކަށަވަރުކޮށްދޭ ކަމަކީ އެ އެޕަށްދޭ އެއްވެސް މައުލޫމާތެއް ފޭސްބުކާ ހިއްސާކުރަން ނުޖެހޭނެ ކަމެވެ. އަދި ވަޓްސްއެޕަކީ ބޭނުންކުރަން ރަައްކާތެރި "އެންޑް-ޓު-އެންޑް-އެންކްރިޕްޓެޑް" ޕްލެޓްފޯމެއް ކަމަށް ވެސް ބުންޏެވެ.

ދެހާސް ނުވައެއްގައި ވުޖޫދަށް އައި ވަޓްސްއެޕް ބޭނުންކުރާ މީހުންގެ އަދަދު 2 ބިލިއަނަށް ވުރެ ގިނަ އެވެ.