ބެލެވެނީ ކަނޑުމަތިން ފެނުނު މީހާ، މަރުވެފައި އޮތް މީހާއާ ގުޅުން އޮތް ކަމަށް

މަރުވެފައި އޮއްވާ ވ. އަތޮޅުގެ ފަޅުރަށަކުން މިއަދު ފެނުނު މީހާއަކީ މިއަދު ހަވީރު ކަނޑުމަތިން ސަލާމަތް ކުރި މީހާއާ އެކު ދަތުރުކުރި މީހެއް ކަމަށް ބެލެވޭ ކަމަށް އެނގިއްޖެ އެވެ.

މިއަދު ހަވީރު ވ. އަންބަރާ ކައިރިން ސިފައިން ސަލާމަތް ކުރީ ޑިންގީއެއްގައި އިން ފިރިހެނެކެވެ. އެ ޑިންގީއަށް ބަލާއިރު ބޮޑަށް ބެލެވެނީ އެއީ ސްރީ ލަންކާގެ އުޅަނދެއް ކަމަށެވެ. ސިފައިން ބުނިގޮތުގައި ޑިންގީގައި އިން މީހާގެ އަތުގައި ހުރި ލިޔެކިޔުމަށް ބަލާއިރު އެއީ ލަންކާގެ މީހެއް ކަމަށް ލަފާ ކުރެވެ އެވެ.

އެހެންވެ، އެއީ ލަންކާއިން ބެހިގެން އޮޔާ ދިޔަ މީހެއް ކަމަށް ބެލެވެ އެވެ.

ވ. ފޮއްތެޔޮ ބޮޑުފުށިން، މަރުވެފައި އޮތް ފިރިހެނެއްގެ ހަށިގަނޑު ފެނުނީ، މިއަދު ހެނދުނު އެ ރަށަށް ދަނޑި ކަނޑަން ގޮސް އުޅުނު ބަޔަކަށެވެ. އޭނާ އޮތީ ރަށުގެ ވަރަށް އެތެރޭގަ އެވެ. އެހެންވެ، ބެހިގެން އެ ރަށަށް ލެއްގީ ކަމަކަށް ނުބެލެވެ އެވެ.

އެނގިފައިވާ ގޮތުގައި މަރުވެފައި އޮތީ ވެސް ލަންކާގެ މީހެކެވެ. އެހެންވެ، މައުލޫމާތު އެނގޭ މީހުން ލަފާ ކުރަނީ އެ ދެ މީހުންނަކީ އެއް ޑިންގީއަކުން ދަތުރު ކުރި މީހުން ކަމަށެވެ.

"އަޅުގަނޑުމެންނަށް ބޮޑަށް ލަފާކުރެވެނީ ބެހިގެން ޑިންގީގައި އެ ރަށަށް ގޮސް އުޅެނިކޮށް، އެކަކު މަރުވީމާ އަނެކަކު އަނެއްކާވެސް ކަނޑުމައްޗަށް ނިކުތީ ކަމަށް،" މައުލޫމާތު އެނގޭ، ވ. އަތޮޅުގެ މީހަކު ބުންޏެވެ.

ފުލުހުން ބުނިގޮތުގައި މަރުވެފައި އޮތް މީހާގެ ހަށިގަނޑުގައި، ތުހުމަތު ކުރެވޭ އެއްވެސް ނިޝާނެއް ނެތެވެ. އެކަމަކު އެކަން ތަހުގީގު ކުރަމުން އަންނަ ކަމަށް ބުންޏެވެ.

ރިސޯޓެއްގެ ގޮތުގައި ތަރައްގީ ކުރުމަށް ފޮއްތެޔޮ ބޮޑުފުށި ވަނީ މީގެ ކުރިން އެކި މީހުންނަށް ދީފަ އެވެ. އެކަމަކު މިހާތަނަށް އެ ރަށުގައި އެއްވެސް މަސައްކަތެއް ނުކުރާއިރު، އެ ރަށަށް ގިނައިން ދަނީ ދަތުރުދާ މީހުންނާއި މަސްވެރިންނެވެ.