ހަނިމާދޫ އެއާޕޯޓް ތަރައްގީކުރާނެ ބަޔަކު ހޯދަން އިންޑިއާ އެގްޒިމް ބޭންކުން ހުޅުވާލައިފި

ބޮޑެތި މަތިންދާބޯޓުތައް ޖެއްސޭ ގޮތަށް، ހަނިމާދޫ އިންޓަނޭޝަނަލް އެއާޕޯޓް ތަރައްގީކުރާނެ ބަޔަކު ހޯދަން އިންޑިއާ އެގްޒިމް ބޭންކުން މިއަދު ހުޅުވާލައިފި އެވެ.

ހަނިމާދޫ އެއާޕޯޓު އަލުން އަޅަނީ އިންޑިއާ ސަރުކާރުން ރާއްޖެއަށް ދޫކޮށްފައިވާ 800 މިލިޔަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުންނެވެ.

އެ މަޝްރޫއަށް ބިޑް ހުށަހަޅަަން ހުޅުވައިލުމަށް އިންޑިއާ އެގްޒިމް ބޭންކުން މިއަދު ކުރި އިއުލާނުގައިވާ ގޮތުން ބިޑް ހުށަހަޅަން ޖެހޭނީ އަންނަ މަހުގެ 22 ވަނަ ދުވަހު އިންޑިއާ ގަޑިން މެންދުރުފަހު 3:00 ގެ ކުރިންނެވެ. އެ މަޝްރޫއު ހިންގަން ހޯދަނީ، އިއުލާނުގައިވާ ގޮތުން، އިންޑިއާގެ ކުންފުންޏެކެވެ.

ހަނިމާދޫ އެއާޕޯޓް އަލުން އެޅުމުގެ ޕްރޮޖެކްޓް ކުރިއަށް ގެންދާނީ ދެ ފިޔަަވައްސަކަށް ބަހާލައިގެންނެވެ. ފުރަތަމަ ފިޔަވަހި ނިމޭ އިރު އެއާބަސް އޭ320 މަރުކާގެ މަތިންދާބޯޓްތަކާއި ބޯއިން 737 މަރުކާގެ މަތިންދާބޯޓުތައް އެ އެއާޕޯޓަށް ޖެއްސޭނެ އެވެ. ދެވަނަ ފިޔަވަހި ނިމޭއިރު، އެއާބަސް އޭ330 މަރުކާގެ މަތިންދާބޯޓުތަކާއި ބޯއިން ބީ777 މަރުކާގެ ބޯޓުތައް ޖެއްސޭ ވަރަށް އެއާޕޯޓް ތަރައްގީކުރާނެ އެވެ.

އެ އެއާޕޯޓުގެ މަސައްކަތް ނިމުމުން އޮންނާނެ ގޮތުގެ ކުރެހުންތައް އިންޑިއާ އެގްޒިމް ބޭންކްގެ އިއުލާނުގައި ހިމަނާފައި ވެ އެވެ.

އެގްޒިމް ބޭންކްގެ އިއުލާނުގައިވާ ގޮތުން ފުރަތަމަ ފިޔަވަހީގައި ވެސް ގިނަ މަސައްކަތްތަކެއް ކުރަން ޖެހެ އެވެ.

ފުރަތަމަ ފިޔަވަހީގައި ކުރާނެ ބައެއް މަސައްކަތްތަައް

- 2،460 މީޓަރުގެ ރަންވޭއެއް ހެދުން

- ދިގުމިނުގައި 164 މީޓަރު އަދި ފުޅާމިނުގައި 34 މީޓަރު ހުންނަ ދެ ޓެކްސީވޭ ހެދުން

- މަތިންދާބޯޓްތައް ޕާކްކުރާނެ އޭޕްރަން ހެދުން

- ވަކި ޖެޓީއަކުން އުޅަނދު ފަހަރު ގާތްކުރެވޭ ގޮތަށް ފިއުލް ފާމެއް އެޅުން

- އެއާޕޯޓަށް ދާ މަގުތަކާއި ކާރުޕާކްކުރާނެ ޕާކިން އޭރިއާ އާއި ތަރައްގީކުރުން

އިންޑިއާ ސަރުކާރުން ކުރިން ބުނެފައިވާ ގޮތުުގައި ހަނިމާދޫ އެއާޕޯޓުގެ ހުރިހާ މަަސައްކަތެއް ދެ އަހަރުދުވަހުގެ ތެރޭގައި ނިންމާނެ އެވެ. އެއީ ދިވެހި ސަރުކާރުން ވަރަށް އިސްކަންދޭ ޕްރޮޖެކްޓަކަށް ވާތީ އިންޑިއާ ސަރުކާރުންް ވެސް އެ ޕްރޮޖެޓަށް ބޮޑު އިސްކަމެއް ދޭނެ ކަމަށް ވެސް އޭރު ބުންޏެވެ.

އިންޑިއާ ސަރުކާރުން ރާއްޖެއަށް ދޫކޮށްފައިވާ ލައިން އޮފް ކްރެޑިޓް ފެސިލިޓީ އަކީ ރައީސް އިބްރާހީމް މުހައްމަދު ސޯލިހު 2018 ވަނަ އަހަރު އެގައުމަށް ކުރެއްވި ރަސްމީ ދަތުރުފުޅުގައި ދެ ގައުމުން އެއްބަސްވެގެން ދޫކުރި ފެސިލިޓީއެކެވެ. ހަނިމާދޫ އެއާޕޯޓް އަޅާނެ ބަޔަކު ހޯދަން އިންޑިއާގެ އެގްޒިމް ބޭންކުން އިއުލާނުކުރީ އެއީ އެ ބޭންކުގެ ލޯނަކުން ހިންގާ މަޝްރޫއަކަށް ވާތީ އެވެ.