ކޮމިޓީން ނިންމީ މަލީހަށް ފިޔަވަޅު ނާޅައި މައްސަލަ ފައިލްކުރަން

ކުރީގެ ޓެލެކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު، ރައްޔިތުންގެ މަޖިލީހަށް ކުރެއްވި ތުހުމަތުތަކުގެ މައްސަލަ އިތުރަށް ނުބަލައި އެ މައްސަލަ ފައިލްކުރަން މަޖިލީހުގެ އިމްތިޔާޒާއި ސުލޫކު ކޮމިޓީން މިއަދު ނިންމައިފި އެވެ.

އެ ކޮމިޓީން ބެލީ މަލީހުގެ އިތުބާރު ނެތް ކަމަށް މަޖިލީހުން ފާސްކުރި ދުވަހު މުޅި މަޖިލީހަށް ނިސްބަތްވާ ގޮތަށް އޭނާ ކުރެއްވި ތުހުމަތުތަކެއްގެ މައްސަލަ އެވެ. އޭނާ އެ ދުވަހު ތުހުމަތުކުރެއްވީ މިނިސްޓަރުންގެ މަސައްކަތަށް މަޖިލީހުން ހުރަސް އަޅައި ބިރުދައްކާ ކަމަށެވެ. ކުރީގެ ޖެންޑާ މިނިސްޓަރު ޝިދާތާ ޝަރީފު މަގާމުން އިސްތިއުފާ ދެއްވީ އެގޮތަށް ބިރުދެއްކުމުން ކަމަށް ވެސް އޭނާ ތުހުމަތު ކުރެއްވި އެވެ.

މަލީހު މަޖިލީހަށް ކުރެއްވި ތުހުމަތުތައް އަނބުރައި ނުވެސް ގެންދަވައި ކޮމިޓީއަށް ޖަވާބުދާރީ ވެސް ވެވަޑައި ނުގެންނެވުމުން ކޮމިޓީން ނިންމާނީ އޭނާއާ ދެކޮޅަށް ދައުވާކުރަން ކަމަށް ބެލެވުނެވެ. އެކަމަކު ކޮމިޓީން މިއަދު ނިންމީ އޭނާގެ މައްސަަަލަ ފައިލްކޮށް އެކަން އޭނާ އަށް ސިޓީއަކުން އަންގަން މަޖިލީހުގެ ރިޔާސަތަށް ފޮނުވުމަށެވެ.

މަލީހުގެ ތުހުމަތުތައް އިމްތިޔާޒް އަދި ސުލޫކު ކޮމިޓީން ތަހުގީގުކުރަން ހުށަހެޅުއްވީ މަޖިލީހުގެ ރައީސް މުހައްމަދު ނަޝީދެވެ. އެމަނިކުފާނު ވިދާޅުވީ މަލީހު މަޖިލީހަށް ތުހުމަތުކުރެއްވި އިރު ހަގީގަތާ ހިލާފަށް ވާހަކަދައްކަވާފައިވޭތޯ ބެލުމަށް އެ މައްސަލަ ތަހުގީގުކޮށް، ދައުވާކުރެވެން އޮތް ނަމަ އޭނާއާ ދެކޮޅަށް ދައުވާ ވެސް ކުރައްވާނެ ކަމަށެވެ.

އެކަމަކު ކޮމިޓީން މިއަދު ނިންމީ މަލީހު ދެއްކެވީ މަލީހު ދެއްކެވީ "އަސްލެއް ނެތް ވާހަކައެއްކަން އެނގޭތީ" އޭނާގެ މައްސަލަ އިތުރަށް ނުބަލައި ފައިލްކުރުމަށެވެ. އެހެންވީމާ މަލީހު ދެއްކެވީ ހަގީގަތާ ހިލާފު ވާހަކައެއް ނަމަ އޭނާއާ ދޭތެރޭ ފިޔަވަޅާނެ ކަމަށް ނަޝީދު ވިދާޅުވި ނަމަވެސް ކޮމިޓީން މި ނިންމީ އެ ގޮތަކަށް ނޫނެވެ.

ކޮމިޓީގެ މިއަދުގެ ބައްދަލުވުމަށް އެގޮތަށް ހުށަހެޅުއްވީ ހިތަދޫ މެދު ދާއިރާގެ މެމްބަރު އަހުމަދު ރަޝީދެވެ. އެ ހުށަހެޅުއްވުމަށް މަކުނުދޫ ދާއިރާގެ މެމްބަރު މުހައްމަދު ރާއީ ތާއީދުކުރެއްވި އެވެ. އެ ހުށަހެޅުން ފާސްކުރީ ކޮމިޓީގެ މިއަދުގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.

އަހުމަދު ރަޝީދު ފުރަތަމަ ހުށަހެޅުއްވީ މަލީހަށް ސިޓީއަަކުން ނަސޭހަތް ދީފައި މައްސަލަ ނިންމައިލުމަށެވެ. އެކަމަކު ފަހުން އެ ހުށަހެޅުން އަނބުރާ ގެންދަވާފައި އޭނާ ދެން ހުށަހެޅުއްވީ މައްސަލަ ފައިލްކުރުމަށެވެ.

"އެކަމާ [މިނިސްޓަރުންނަށް ބިރުދެއްކި ކަމަށް ވިދާޅުވި ވިދާޅުވުމާ] ބެހޭ ގޮތުން މަލީހު އިތުރަށް ވާހަކަ ނުދެއްކެވުމުގެ ސަބަބުން އަޅުގަނޑުމެންނަކަށް ފާހަގައެއް ނުކުރެވުނު އެއީ ކޮން ކަމެއް ކަމެއް، [ބިރުދައްކަން މަޖިލީހުން ކުރި ކަމަށް އެވިދާޅުވަނީ ކޮންކަމެއް ކަމެއް]. އެހެންވީމާ އަޅުގަނޑަށް ފެންނަނީ މި މައްސަލަ މި ހިސާބުން ފައިލްކޮށްލަން،" އަހުމަދު ރަޝީދު ވިދާޅުވި އެވެ.

އަހުމަދު ރަޝީދުގެ ހުށަހެޅުމުގެ އިބާރާތަށް، "މަލީހު އެ ދުވަހު ދެއްކެވީ އެއްވެސް އަސްލެއް ނެތް ވާހަކައެއް" ކަމަށް އިތުރުކުރަން މަނަދޫ ދާއިރާގެ މެމްބަރު އަހުމަދު ހާރޫނު ހުށަހެޅުއްވި އެވެ.

"...މަލީހު ޖަމާލް ރައްޔިތުންގެ މަޖިލީހަށް ވަރަށް ބޮޑެތި ތުހުމަތުތަކެއް ކުރެވި. ބިރުދައްކާ ކަމަށާއި އަދި އިސްތިއުފާ ދެއްވަން މަޖުބޫރު ކުރި ކަމަށް. އެހެން ނަމަވެސް މި ކޮމިޓީއަށް ހާޒިރުކުރުމުން މިކަމާ ބެހޭ ގޮތުން އަޅުގަނޑުމެންގެ މެމްބަރުން ކުރި އެއްވެސް ސުވާލަކަށް ޖަވާބު ދެއްވާފައި ނުވާތީ މިއީ އެއްވެސް އަސާސެއްގެ މައްޗަށް ބިނާކޮށް އެމަނިކުފާނު ދެއްކެވި ވާހަކަފުޅެއް ކަމަށް ނުފެންނާތީ [މައްސަލަ ފައިލްކުރަން]،" އަހުމަދު ރަޝީދުގެ ހުށަހެޅުން ކޮމިޓީގެ މުގައްރިރު އަދި ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއް ލަތީފު ފަހުން އިބާރާތްކުރެއްވީ މިހެންނެވެ.

މަލީހު ވަކިކުރި ޖަލްސާގައި ނަޝީދު ވިދާޅުވި ގޮތުން، މަލީހަށް ދައުވާކުރަން ޖެހޭނީ ވެސް މިގޮތަށް ސާބިތުވެއްޖެ ނަމަ އެވެ.

މަލީހު ކޮމިޓީ އަށް އެއްވެސް ޖަވާބެއް ނުދެއްވައި ގޮންޖެއްސެވި

އިމްތިޔާޒް އަދި ސުލޫކު ކޮމިޓީން އިއްޔެ ބޭއްވި ޖަލްސާ އަށް މަލީހު ހާޒިރުވެވަޑައިގެންނެވި އެވެ.

އެ ބައްދަލުވުމަށް މަލީހު ވަޑައިގަތީ އޭނާގެ އިތުބާރު ނެތް ކަމަށް މަޖިލީހުން ފާސްކުރި ދުވަހު މަޖިލީހުގެ ތަޅުމުގައި ރައްޔިތުންގެ މަޖިލީހަށް އޭނާ ކުރެއްވި ބޮޑެތި ތުހުމަތުތަކާ ބެހޭ ގޮތުން ސުވާލު ކުރަން ކޮމިޓީން ބޭނުންވުމުންނެވެ. އެހެންވެ މަޖިލީހުން އޭނާ އަށް ފޮނުވި ސިޓީ އަށް އިޖާބަ ދެއްވައި ކޮމިޓީ އަށް އިއްޔެ ވަޑައިގެންނެވި ނަމަވެސް އޭނާ ތަކުރާރުކޮށް، އެ ކޮމިޓީގައި ވިދާޅުވީ، ގާނޫނުއަސާސީގެ ނުވަ ވަނަ މާއްދާގައި އޮތް ގޮތުން އޭނާއާ ސުވާލު ނުކުރެވޭނެ ކަމަށެވެ. ކޮމިޓީގެ މެމްބަރުން ތަކުރާރުކޮށް ސުވާލުކުރެއްވުމުން ވެސް މަލީހު ވިދާޅުވީ އެ ދުވަހު ދެއްކެވި ވާހަކަ މަޖިލީހުގެ އަރުޝީފުގައި ހުންނާނެ ކަމަށާއި އެ ވާހަކަތަކާ ގުޅިގެން މަޖިލީހުން ކުރަން ބޭނުންވާ ކަމެއް ކުރަންވީ ކަމަށެވެ.