ހަބް ކުންފުންޏަށް ޑީއާރުޕީން ހަތް ލައްކަ ދައްކަން ޖެހޭނެ: ސުޕްްރީމް ކޯޓު

ހަބް ކުންފުންޏަށް ހަތް ލައްކައަށް ވުރެ ގިނަ ރުފިޔާ ދައްކަން ޑީއާރުޕީގެ މައްޗަށް ކުރި ހުކުމް ސުޕްރީމް ކޯޓުން ވެސް މިއަދު ދަމަހައްޓައިފި އެވެ.

ކުރީގެ ރައީސް މައުމޫން އަބްދުލްގައްޔޫމް ޑީއާރުޕީ ހިންގެވި ދުވަސްވަރު އެ ޕާޓީން ހަބް ކުންފުނީގެ ކިބައިން 2008 އާއި 2009 ވަނަ އަހަރާ ދެމެދު ހޯދި ޚިދުމަތްތަކަކަށް ދައްކަންޖެހޭ 718،000ރ. ނުދެއްކުމުން ހަބް ކުންފުނިން ދައުވާކުރި މައްސަލާގައި ސިވިލް ކޯޓުން 2014 ގައި ހުކުމްކުރީ އެ ފައިސާ އެ ޕާޓީން ދައްކަން ޖެހޭނެ ކަމަށެވެ. އެ ހުކުމަށް 2015 ވަނަ އަހަރު ހައި ކޯޓުން ވެސް އޮތީ ތާއީދުކޮށްފަ އެވެ.

ކާށިދޫ ދާއިރާގެ މެމްބަރު އަބްދުﷲ ޖާބިރު މިހާރު ހިންގާ ޑީއާރުޕީން އެ މައްސަލަ އިސްތިއުނާފު ކުރުމުން ސުޕްރީމް ކޯޓުން މިއަދު ކުރި ހުކުމުގައިވަނީ ހަބް ކުންފުނިން ފޮނުވި ބައެއް އިންވޮއިސްތަކުގެ ސައްހަ ކަމާ މެދު ޑީއާރުޕީން ސުވާލު އުފެއްދިޔަސް، އެ ސައްހަ ކަމަށާއި އިންވޮއިސްތަކުގައި ބުނާ ޚިދުމަތްތައް ހޯދި ކަމަށް ޑީއާރުޕީން ދަށު ކޯޓުގައި އެއްބަސްވެފައިވާ ކަމަށެވެ. އިންވޮއިސްތަކާ މެދު ޝަކުވާއެއް އޮތް ނަމަ، އެކަން އަންގަންޖެހޭ މުއްދަތުގައި ޑީއާރުޕީން އެފަދަ އެއްވެސް މައްސަލައެއް ފާހަގަ ކޮށްފައި ނުވާ ކަމަށް ހުކުމުގައިވެ އެވެ.

މީގެ އިތުރުން ބައެއް އިންވޮއިސްތަކުގައި ބަޔާންކުރާ އަގުތަކާ މެދު ޑީއާރުޕީން ސުވާލު އުފެއްދިޔަސް، ދެ ފަރާތުން އެއްބަސްވެފައިވާ އަސްލު އަގަކީ ކޮބައިކަން ސާބިތުކޮށް ދިނުމުގެ ބުރަ އޮތީ ޑީއާރުޕީގެ މައްޗަށް ކަމަށް ސުޕްރީމް ކޯޓުގެ ހުކުމުގައިވެ އެވެ. އިންވޮއިސްތަކުގައި ބުނާ ބައެއް ޚިދުމަތްތައް ނުލިބޭ ކަމަށް ޑީއާރުޕީން އިސްތިއުނާފް މަރުހަލާގައި ބުންޏަސް، ދަށު ކޯޓުގައި އެ ވާހަކަ އެއްވެސް މިންވަރަށް ފާހަގަ ކޮށްފައި ނުވާ ކަމަށް ސުޕްރީމް ކޯޓުގެ ހުކުމުގައިވެ އެވެ.

ސުޕްރީމް ކޯޓުގެ ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވަނީ އެ އިންވޮއިސްތަކަށް ޑީއާރުޕީން ފައިސާ ދައްކަންޖެހޭނެ ކަމަށް ސިވިލް ކޯޓާއި ހައި ކޯޓުން ކުރި ހުކުމް ރަނގަޅު ކަމަށެވެ.

އެ މައްސަލަ ބެއްލެވީ ފަނޑިޔާރު އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު ހުސްނުއްސުއޫދެވެ. އެ ބެންޗުގެ ރިޔާސަތު ބެލެހެއްޓެވީ ފަނޑިޔާރު އަޒްމިރަލްދާ އެވެ.

ކުރިން ރާއްޖޭގެ އެންމެ ބޮޑު އިދިކޮޅު ޕާޓީގެ ގޮތުގައި އޮތް ޑީއާރުޕީގެ އެތެރޭގެ ޚިޔާލު ތަފާތުވުންތަކުގައި އެ ޕާޓީގެ ރައީސް މައުމޫނާއި އެ ޕާޓީގެ އެހެން އިސްވެރިން ޕާޓީ ދޫކުރައްވައި، ވަޑައިގަތްއިރު މާލީ ބޮޑެތި މައްސަލަތަކެއް އޮތީ ކުރިމަތިވެފަ އެވެ.

ހަބް ކުންފުނީގެ އިތުރުން އެމްޓީސީސީ އާއި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރަށް ވެސް ގިނަ އަދަދެއްގެ ފައިސާ ދައްކަން ޑީއާރުޕީގެ މައްޗަށް ކޯޓުތަކުން އޮތީ ހުކުމްކޮށްފަ އެވެ.