އައްޑޫން އަނެއްކާވެސް ކޮވިޑް ފެނިއްޖެ

އައްޑޫން އަނެއްކާ ވެސް ބަޔަކު ކޮވިޑް-19 އަށް ޕޮޒިޓިވްވެ، އެ މީހުންނާ ގުޅުން ހުރި މީހުންގެ ކޮންޓެކްޓް ޓްރޭސިން ހަދަން ފަށައިފި އެވެ.

އައްޑޫ އިކްއަޓޯރިއަލް ހޮސްޕިޓަލް (އޭއީއެޗް) އިން ބުނީ، އެ ބައްޔަށް މިއަދު އަލަށް ޕޮޒިޓިވްވެފައި ވަނީ 14 މީހަކު ކަމަށާއި އެންމެން ވެސް ތިބީ ހޯމް ކަރަންޓީނުގައި ކަމަށެވެ. ހިތަދޫން ކޮވިޑަށް ޕޮޒިޓިވް މި މީހުންގެ ތެރެއިން އަށް މީހުންނަކީ ބިދޭސީންނެވެ.

އޭއިއެޗުން ބުނިގޮތުގައި ބައްޔަށް ޕޮޒިޓިވް މީހުންގެ ތެރެއިން އެކަކު ކަރަންޓީނާ ވެސް ހިލާފުވެފައިވާ އިރު، ކޮންޓެކްޓް ޓްރޭސިން އަށް އޭނާގެ ފަރާތުން މިހާތަނަށް އެކަށީގެންވާ އެއްބާރުލުމެއް ވެސް ނުލިބެ އެވެ.

އައްޑޫން ކޮވިޑްގެ ކޭސްތަކެއް އެންމެ ފުރަތަމަ ފެނިފައި ވަނީ މިދިޔަ ފެބްރުއަރީ މަހުގެ ކުރީކޮޅު އެވެ. އެއާ އެކު އައްޑޫ މޮނިޓަރިންގެ ހާލަތަށް ގެނެސް، ރައްކާތެރިކަމުގެ ގޮތުން ގިނަ ފިޔަވަޅުތަކެއް އެޅި އެވެ. އޭގެ ތެރޭގައި ސްކޫލްތައް ބަންދުކުރުމާއި ޖަމާއަތުގައި ނަމާދުކުރުން މެދުކަނޑައިލުމާއި އެއް އަވަށުން އަނެއް އަވަށަށް ދިއުން މަނާކުރުމާއި ކެފޭ/ރެސްޓޯރަންޓްތައް އާންމުކޮށް ހުޅުވައިގެން ހިދުމަތް ދިނުމާއި އަދި ރޭގަނޑު ކާފިއު ހިންގުން ފަދަ ކަންކަން ހިމެނެ އެވެ.

އައްޑޫން ކޮވިޑް ޖެހުނު ގިނަ ބަޔަކު ބަލިން ރަނގަޅުވުމާ ގުޅިގެން މޮނިޓަރިންގެ ހާލަތު އުވައިލީ މިދިޔަ މަހުގެ 13 ވަނަ ދުވަހު އެވެ. އޭރު އައްޑޫން ކޮވިޑަށް ޕޮޒިޓިވްވި އެންމެން ބަލިން ރަނގަޅުވި ވާހަކަ އީއޭއެޗުން ބުނީ މިދިޔަ މަހުގެ 21 ގަ އެވެ.

މި ފަހަރު އަަނެއްކާ ވެސް އަލުން އައްޑޫން ބަޔަކު ކޮވިޑަށް ޕޮޒިޓިވްވެފައި ވަނީ މާޗް މަހުގެ 4 ގެ ފަހުން އިތުރު ކޭސްތަކެއް ނުފެނި ކޮވިޑްގެ ހާލަތު ވަރަށް ބޮޑަށް ރަނގަޅުވެފައި ވަނިކޮށެވެ. މާޗް މަހުގެ 4 އާ ހަމައަށް އައްޑޫން 92 މީހަކު ޕޮޒިޓިވްވި އެވެ. އޭގެ ތެރެއިން 35 މީހުންނަކީ ބިދޭސީންނެވެ.

ކޮވިޑް ޖެހިގެން އައްޑޫގައި އެޑްމިޓްކޮށް ފަރުވާ ދިނީ ހަ މީހަކަށެވެ.