ހުޅުދުއްފާރާއި އަލިފުށި މޮނިޓަރިން އިން ނަގައިފި

ރ. އަލިފުއްޓާއި އެއަތޮޅު ހުޅުދުއްފާރުން ކޮވިޑް-19ގެ ކޭސްތަކެއް ފެނިގެން އެ ދެ ރަށަށް އަރައި ފޭބުން މަނާކޮށްފައި އޮންނަތާ ގިނަ ދުވަސްތަކެއް ފަހުން އެކަން އުވާލައި އާއްމު ހާލަތަށް ބަދަލުކޮށްފި އެވެ.

މިދިޔަ މަހު 25ގައި ނެގި ސާމްޕަލެއް ޕޮޒިޓިވްވެ، އަލިފުއްޓަށް އަރައި ފޭބުން މަނާކުރީ މިދިޔަ މަހުގެ 27 ވަނަ ދުވަހު އެވެ. އެ ރަށުން ޕޮޒިޓިވްވީ، އުނގޫފާރަށް ދަތުރުކޮށްފައިވާތީ ކަރަންޓީނުކުރި ބައެއްގެ ކަރަންޓީނުގެ މުއްދަތު ހަމަވި ފަހުން ނެގި ސާމްޕަލަކުން އެއް އަހަރުގެ ކުއްޖެކެވެ.

އެއާ އެކު އަލިފުށި ބަންދުކުރިތާ 11 ވަރަކަށް ދުވަސް ފަހުން، މިއަދު ރަށް އާންމު ހާލަތަށް ގެނެސްފައިވާ ކަމަށް އެ ރަށު ކައުންސިލްގެ ރައީސް އަބްދުﷲ ރާޒީ ވިދާޅުވި އެވެ.

އޭނާ ވިދާޅުވީ މޮނިޓަރިން އުވާލިކަން އަންގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު މެންދުރު 1:30 ހާއިރު ލިޔުން ފޮނުވާފައިވާ ކަމަށެވެ. އާންމު ހާލަތަށް ގެނައީ އެ ރަށުން ނެގި 100 ސާމްޕަލް ނެގެޓިވްވެފައިވާތީ އެވެ.

އޭގެ އިތުރުން މިއަދު ވަނީ ހުޅުދުއްފާރު ވެސް އާންމު ހާލަތަށް ގެނެސްފަ އެވެ.

އުނގޫފާރަށް ދަތުރުކުރި މީހުންގެ ތެރެއިން ނެގި ސާމްޕަލެއް ޕޮޒިޓިވްވެ، ހުޅުދުއްފާރަށް އަރައި ފޭބުން މަނާކުރީ މީގެ 14 ދުވަސް ކުރިންނެވެ. ޖުމްލަ ހަތް މީހަކު އެ ރަށުން ވަނީ ޕޮޒިޓިވްވެފަ އެވެ. އެކަމަކު ރަށް އާންމު ހާލަތަށް ގެނެސްފައި މިވަނީ އެ ރަށުން ނެގި 80 ސާމްޕަލްގެ ނަތީޖާ ނެގެޓިވްވެފައިވާތީ ކަމަށް އެ ރަށު ކައުންސިލްގެ ރައީސް އަލީ ޖާވިދު ވިދާޅުވި އެވެ.

ރ. އަތޮޅުގެ ވެރިރަށް އުނގޫފާރުން މިދިޔަ މަހުގެ 19 ވަނަ ދުވަހު މީހަކު ޕޮޒިޓިވްވީ ރޯގާގެ އަލާމާތް ހުރެގެން ޑޮކްޓަރަށް ދެއްކުމުން ޓެސްޓް ހެދުމުންނެވެ. އެއާއެކު އަތޮޅުގެ ގިނަ ރަށްތަކަކަށް ކޮވިޑްގެ ބިރުވެރިކަން ބޮޑުވެގެންދިޔަ އެވެ. އެކަމަކު މި މަހު 3ގައި ވަނީ އުނގޫފާރު ވެސް އާންމު ހާލަތަށް ގެނެސްފަ އެވެ.