މަހަކަށް ވުރެ ގިނަ ދުވަސް ފަހުން ތިން ރަށެއް ހުޅުވާލައިފި

ކޮވިޑް ފެތުރޭތީ ބަންދުކޮށްފައި އޮތް ތިން ރަށެއް، މަހެއްހާ ދުވަސް ފަހުން މިއަދު އަލުން ހުޅުވާލައިފި އެވެ.

ބަލި ފެތުރުން ކޮންޓްރޯލް ކުރެވިފައިވާ ވާތީ، މޮނީޓަރިންގެ ހާލަތު އުވާލި ތިން ރަށަކީ ރ. ހުޅުދުއްފާރާއި ބ. ކެންދޫ އަދި ކ. ގާފަރެވެ. މި ރަށްތަކުގެ ކައުންސިލުން ވަނީ ރަށްތައް އަލުން ހުޅުވާލިކަން އިއުލާންކޮށްފަ އެވެ.

މި ރަށްތަކުގެ ތެރެއިން އެންމެ ގިނަ ދުވަހު ބަންދުކޮށްފައި އޮތީ ހުޅުދުއްފާރެވެ. ކޮވިޑްގެ ކޭހެއް ފެނިގެން އެ ރަށް ދެ ވަނަ ފަހަރަށް ބަންދުކުރީ މިދިޔަ މެއި މަހު 5 ގަ އެވެ. އެ ރަށުން 44 މީހަކަށް ބަލި ޖެހުނު އިރު، އެކަކު ވަނީ މަރުވެފަ އެވެ. މި ވަގުތު އެކްޓިވް އުޅެނީ އެންމެ ކޭސްއެކެވެ.

ރޯގާގެ އަލާމާތްތަކެއް ހުރި މީހަކު ޓެސްޓުކުރުމުން ކޮވިޑަށް ޕޮޒިޓީވްވެ، ކެންދޫ ބަންދުކުރީ މެއި 29 ގަ އެވެ. އޭގެ ފަހުން އެ ރަށުން 77 މީހަކަށް މި ބަލި ޖެހުނެވެ. އަދި އެކްޓިވް ކޭސްތައް މިހާރު ހުރީ ހަތަރެއްގަ އެވެ.

ގާފަރުން 114 މީހުންނަށް މި ބަލި ޖެހުނުއިރު، ކޮވިޑްގެ ކޭސްއެއް އެ ރަށުން ފުރަތަމަ ފެނުނީ މެއި 19 ގަ އެވެ. އަދި އެކްޓިވް ކޭސްތަކުގެ އަދަދު މިހާރު ހުރީ ހައެއްގަ އެވެ.

މި ރަށްތަކުގެ ކައުންސިލްތަކުން ބުނީ ރަށް އަލުން ހުޅުވާލި ނަމަވެސް، ރައްކާތެރިކަމުގެ ބައެއް ފިޔަވަޅުތައް އަދިވެސް އަޅާފައިވާ ކަމަށާ އަދި އެޗްޕީއޭގެ އުސޫލާ އެއްގޮތަށް އާންމުން ބޭރު ތެރޭގައި އުޅުމަށް އިލްތިމާސްކުރާ ކަމަށެވެ.